Luke 24

Odia NTS2024 2024 (ದೆವಾಚಿ ಖರಿ ಖಬರ್)

← Chapter 23 Jump to:

1ಆಯ್ತಾರ್‍ಚೆ ಸಕ್ಕಾಳಿ ಫಿಡೆ ಅಪ್ನಿ ತಯಾರ್ ಕರಲ್ಲಿ ಸುಗಂದ್ ತೆಲಾ ಘೆವ್ನ್ ತ್ಯಾ ಬಾಯ್ಕೊಮನ್ಸಾ ಸಮಾದಿಕ್ಡೆ ಗೆಲ್ಯಾ.

2ತನ್ನಾ ಸಮಾದಿತ್ ಭುತ್ತುರ್ ಜಾತಲ್ಯಾ ವಾಟೆ ವೈಲೊ ಗುಂಡೊ ಗುಳ್ವುನ್ ಕಡೆಕ್ ಕರಲ್ಲೊ ತೆಂಕಾ ದಿಸ್ಲೊ.

3ತಸೆಮನುನ್ ತೆನಿ ಸಮಾದಿತ್ ಭುತ್ತುರ್ ಗೆಲ್ಯಾನಿ ಖರೆ ಥೈ ತೆಂಕಾ ಧನಿಯಾ ಜೆಜುಚೆ ಮಡೆ ಗಾವುಕ್ನಾ.

4ಹೆ, ಬಗುನ್ ತೆನಿ ಅಜಾಪ್ ಹೊಲ್ಯಾನಿ, ತನ್ನಾ ದೊನ್ ಮಾನ್ಸಾ, ಎಗ್ದಮ್ ಝಳ್-ಝಳ್ತಲೆ ಕಪ್ಡೆ ನೆಸುನ್ ತೆಂಚ್ಯಾ ಇದ್ರಾಕ್ ಇಬೆ ರ್‍ಹಾಲೆ.

5ತೆಂಕಾ ಬಗುನ್ ಭಿಂವ್ನ್ ತ್ಯಾ ಬಾಯ್ಕೊಮನ್ಸಾ ಜಿಮ್ನಿರ್ ಡಬ್ ಪಡ್ಲ್ಯಾ ತನ್ನಾ ತ್ಯಾ ಮಾನ್ಸಾನಿ ಝಿತ್ತೊ ಹೊತ್ತ್ಯಾಕ್, ಮರಲ್ಲ್ಯಾತ್ನಿ ಯೆವ್ನ್ ಕಶ್ಯಾಕ್ ಹುಡ್ಕುಕ್ ಲಾಗ್ಲ್ಯಾಶಿ?

6ತೊ ಹಿತ್ತೆ ನಾ ತೆಕಾ ಝಿತ್ತೊ ಕರುನ್ ಉಟ್ವುನ್ ಹೊಲಾ. ಗಾಲಿಲಿಯಾತ್ ಹೊತ್ತ್ಯಾ ತನ್ನಾ ತೆನಿ ತುಮ್ಕಾ ಕಾಯ್ ಸಾಂಗಟಲ್ಲ್ಯಾನ್ ಮನುನ್ ಯಾದ್ ಕರುನ್ ಘೆವಾ;

7“ಮಾನ್ಸಾಚ್ಯಾ ಲೆಕಾಕ್ ಪಾಪಿ ಲೊಕಾಂಚ್ಯಾ ಹಾತಾತ್ ಧರುನ್ ದಿವ್ಕ್ ಪಾಜೆ, ಅನಿ ಕುರ್ಸಾರ್ ಮಾರುಕ್ ಪಾಜೆ, ಅನಿ ತಿನ್ ದಿಸಾ ಹೊಲ್ಲ್ಯಾ ಮಾನಾ ಝಿತ್ತೊ ಹೊವ್ನ್ ಉಟುಕ್ ಪಾಜೆ”.

8ತನ್ನಾ ತ್ಯಾ ಬಾಯ್ಕೊಮನ್ಸಾಕ್ನಿ ಹ್ಯಾ ಗೊಸ್ಟಿಯಾಂಚಿ ಯಾದ್ ಯೆಲಿ.

9ತೆನಿ ಸಮಾದಿತ್ನಾ ಗೆಲ್ಯಾನಿ, ಅನಿ ಅಕ್ರಾ ಜಾನಾ ಶಿಸಾಕ್ನಿ, ಅನಿ ಹುರಲ್ಲ್ಯಾಕ್ನಿ ಥೈ ಕಾಯ್-ಕಾಯ್ ಹೊಲ್ಲೆ ಸಾಂಗಟ್ಲ್ಯಾನಿ.

10ತ್ಯಾ ಬಾಯ್ಕೊಮನ್ಸಾ ಕೊನ್- ಕಾಯ್ ಮಟ್ಲ್ಯಾರ್ ಮಾಗ್ದೆಲಾಚಿ ಮರಿ. ಜೊನ್ನಾ, ಅನಿ ಜಾಕೊಬಾಚಿ ಬಾಯ್ ಮರಿ; ಅನಿ ಹುರಲ್ಲ್ಯಾ ದುಸ್ರ್ಯಾ ಬಾಯ್ಕೊಮನ್ಸಾನಿ ಮಿಳುನ್, ಅಪೊಸ್ತಲ್ಯಾಕ್ನಿ ಹೆ, ಸಗ್ಳೆ ಸಾಂಗಟ್ಲ್ಯಾನಿ.

11ತನ್ನಾ ಅಪೊಸ್ತಲಾನಿ ಹ್ಯಾ ಬಾಯ್ಕಾಮನ್ಸಾ ಕಾಯ್ಕಿ ನಸಲ್ಲೆಚ್ ಸಾಂಗುಕ್ ಲಾಗ್ಲ್ಯಾತ್ ಮನುನ್ ಯವಜ್ಲ್ಯಾನಿ, ಅನಿ ತೆನಿ ಸಾಂಗಟಲ್ಲೆ ಖರೆ ಮನುನ್ ಮಾನುನ್ ಘೆವ್ಕ್‌ನ್ಯಾತ್.

12ಖರೆ ಪೆದ್ರು ಉಟ್ಲೊ, ಅನಿ ಸಮಾದಿಕ್ಡೆ ಪಳುನ್ ಗೆಲೊ ತೆನಿ ವ್ಹಾಕುನ್ ಸಮಾದಿತ್ ಬಗಟಲ್ಲ್ಯಾ ತನ್ನಾ, ಜೆಜುಚ್ಯಾ ಮಡ್ಯಾಕ್ ಲಪಟಲ್ಲಿ, ತಿ ಫಾಳಿ ಸೊಡುನ್ ತೆಕಾ ಕಾಯ್ಬಿ ದಿಸುಕ್‍ ನಾ, ತನ್ನಾ ತೊ ಘರಾತ್ ಫಾಟಿ ಪರ್ತುನ್ ಗೆಲೊ, ಅನಿ ಸಗ್ಳೆ ಹೊಲ್ಲೆ ಬಗುನ್ ಅಜಾಪ್ ಹೊಲೊ.

13ತ್ಯಾಚ್ ದಿಸ್ ಜೆಜುಚ್ಯಾ ಫಾಟ್ನಾ ಹೊತ್ತ್ಯಾ ಲೊಕಾನಿತ್ಲೆ ದೊಗೆ ಜಾನಾ, ಜೆರುಜಲೆಮಾಕ್ನಾ ಚಲುನ್‍ ಗೆಲ್ಯಾರ್ ಸುಮಾರ್ ಸಾತ್ ಮೈಲ್ ಹೊತಾ ತವ್ಡ್ಯಾ ಧುರ್ ಹೊತ್ತ್ಯಾ ಎಮ್ಮಾವ್ಸ್ ಮನ್ತಲ್ಯಾ ಗಾಂವಾಕ್ ಜಾವ್‍ಲಾಗಲ್ಲೆ.

14ತೆನಿ ಎಕಾಮೆಕಾಕ್ಡೆ, ಹ್ಯಾ ಸಗ್ಳ್ಯಾ ಹೊಲ್ಲ್ಯಾ ಸಂಗ್ತಿಯಾಂಚ್ಯಾ ವಿಶಯಾತ್ ಬೊಲುಲಾಗಲ್ಲೆ.

15ತೆನಿ ಅಶೆ ಬೊಲುನ್ಗೆತ್ ಜಾತಾನಾ, ಜೆಜು ತೆಂಚ್ಯಾ ಜಗ್ಗೊಳ್ ಗೆಲೊ, ಅನಿ ತೆಂಚ್ಯಾ ವಾಂಗ್ಡಾ-ವಾಂಗ್ಡಾಚ್ ಚಲುನ್ ಜಾವ್ಕಲಾಲೊ.

16ತೆನಿ ತೆಕಾ ಬಗಟ್ಲ್ಯಾನಿ ಖರೆ, ಕಸೆಕಿ ತೆಂಕಾ ತೆಚಿ ವಳಕುಚ್ ಗಾವುಕ್‍ನಾ.

17ಜೆಜುನ್ ತೆಂಕಾ,“ತುಮಿ ಚಲುನ್ಗೆತ್ ಜಾತಾ-ಜಾತಾ ಖಲ್ಯಾ ವಿಶಯಾತ್ ಬೊಲುಲಾಗಲ್ಲ್ಯಾಶಿ? ಮನುನ್ ಇಚಾರ್‍ಲ್ಯಾನ್. ತನ್ನಾ ತೆನಿ ತೊಂಡಾ ಬಾವುನ್ ಘೆವ್ನ್ ಇಬೆ ರ್‍ಹಾಲ್ಯಾನಿ.

18ತೆಂಚ್ಯಾತ್ಲ್ಯಾ ಎಕ್ಲ್ಯಾನ್ ಕ್ಲಿಯೊಪಾಸ್;ಮನ್ತಲ್ಯಾನ್. ತೆಕಾ, ಹ್ಯಾ ಫಾಟ್ಲ್ಯಾ ಗೆಲ್ಲ್ಯಾ ದಿಸಾತ್ನಿ, ಜೆರುಜಲೆಮಾತ್ ಕಾಯ್-ಕಾಯ್ ಹೊಲಾ ಮನುನ್ ಗೊತ್ತ್ ನಸಲ್ಲೊ ತಿಯಾ ಎಕ್ಲೊಚ್ ಕಾಯ್ಕಿ?” ಮನುನ್ ಇಚಾರ್‍ಲ್ಯಾನ್.

19ತನ್ನಾ ತೆನಿ,“ ಕಾಯ್ ಹೊಲೆ?” ಮನುನ್ ಇಚಾರ್‍ಲ್ಯಾನ್. ತನ್ನಾ ತೆನಿ “ನಜರೆತಾಚ್ಯಾ ಜೆಜುಕ್ ಹೊಲ್ಲೆ.” ಮನುನ್ ಜಬಾಬ್ ದಿಲ್ಯಾನಿ. “ದೆವಾನ್ ಅನಿ ಮಾನ್ಸಾನಿ ಹ್ಯೊ ಮಾನುಸ್ ಎಕ್ ಪ್ರವಾದಿ ಮನುನ್ ಮಾನಲ್ಲೊ ಹೊತ್ತೊ, ಸಗ್ಳ್ಯಾ ರಿತಿನ್ ತೆಕಾ ಸಗ್ಳೊ ಬಳ್ ಹೊತ್ತೊ, ತೆನಿ ಅಪ್ನಿ ಸಾಂಗ್ಲ್ಯಾನ್ ಅನಿ ತಸೆಚ್ ಕರುನ್ ದಾಕ್ವುಲ್ಯಾನ್”.

20ಅಮ್ಚ್ಯಾ ಮುಖ್ಯ ಯಾಜಕಾನಿ, ಅನಿ ಅಮ್ಚ್ಯಾ ಅದಿಕಾರ್‍ಯಾನಿ, ತೆಕಾ ಮರ್‍ನಾಚಿ ಶಿಕ್ಷಾ ದಿ ಸರ್ಕೆ ಕರ್‍ಲ್ಯಾನಿ, ಅನಿ ತೆಕಾ ಕುರ್ಸಾ ವರ್‍ತಿ ಮಾರ್‍ಲ್ಯಾನಿ.

21ಅನಿ ಅಮಿ ಹ್ಯೊ ಇಸ್ರಾಯೆಲಾಕ್ ಸ್ವತಂತ್ರ್ ಹಾನುನ್ ದಿತಲೊ ಎಕ್ಲೊ ಮನುನ್ ಯವಜಲ್ಲ್ಯಾವ್. ಹೆ ಸಗ್ಳೆ ಹೊವ್ನ್ ಆಜ್ ತಿನ್ವೊ ದಿಸ್.

22ಅಮ್ಚ್ಯಾ ಉಲ್ಲ್ಯಾ ಬಾಯ್ಕೊಮನ್ಸಾನಿ, ಅನಿ ಅಮ್ಕಾ, ಅನಿ ಉಲ್ಲೆ ಅಚಿತ್ತರ್ ಹೊಯ್ ಸರ್ಕೆ ಕರ್‍ಲ್ಯಾನಿ, ತೆನಿ ತೆಕಾ ಥವಲ್ಲ್ಯಾ ಸಮಾದಿಕ್ಡೆ ಗೆಲ್ಯಾನಿ.

23ಖರೆ ತೆಂಕಾ ತೆಚೆ ಮಡೆಚ್ ದಿಸುಕ್ನಾ. ತೆನಿ ಯೆಲ್ಯಾನಿ, ಅನಿ ಅಪ್ನಾಕ್ ದೆವಾಚಿ ದುತಾ ದಿಸ್ಲಿ, ಅನಿ ತೆನಿ ತೊ ಝಿತ್ತೊ ಹಾಯ್ ಮನುನ್ ಸಾಂಗಟ್ಲ್ಯಾನಿ,

24ಅಮ್ಚ್ಯಾತ್ಲ್ಯಾ ಉಲ್ಲ್ಯಾನಿ ಸಮಾದಿಕ್ಡೆ ಜಾವ್ನ್ ಬಗ್ಲ್ಯಾನಿ ತನ್ನಾ, ಬಾಯ್ಕೊಮನ್ಸಾನಿ ಸಾಂಗಲ್ಲ್ಯಾ ಸರ್ಕೆಚ್ ತೆಂಕಾ ಗಾವ್ಲೆ, ಖರೆ ತೊ ತೆಂಕಾ ದಿಸುಕ್ ನಾ; ಮಟ್ಲ್ಯಾನ್.

25ತನ್ನಾ ಜೆಜುನ್ ತೆಂಕಾ. “ತುಮಿ ಕವ್ಡೆ ಪಿಶೆ ಹಾಸಿ ಪ್ರವಾದ್ಯಾನಿ ಸಾಂಗಟಲ್ಲ್ಯಾ ವರ್‍ತಿ ವಿಶ್ವಾಸ್ ಕರ್‍ತಲ್ಯಾತ್ ತುಮಿ ಲೈ ಸಾವ್ಕಾಸ್!

26ಮೆಸ್ಸಿಯಾಕ್ ಅಪ್ನಾಚ್ಯಾ ಮಹಿಮೆತ್ ಜಾವ್ಚ್ಯಾ ಅದ್ದಿ ಹ್ಯೊ ಸಗ್ಳೊ ಕಸ್ಟ್ ಸೊಸ್ತಲೊ ಗರ್ಜೆಚೊ ನ್ಹಯ್ ಕಾಯ್?” ಮಟ್ಲ್ಯಾನ್.

27ಅನಿ ಜೆಜುನ್ ಮೊಯ್ಜೆಚ್ಯಾ ಪುಸ್ತಕಾಕ್ನಾ ಧರಲ್ಲೆ ಸಗ್ಳ್ಯಾ ಪ್ರವಾದ್ಯಾನಿ ಅಪ್ನಾಚ್ಯಾ ವಿಶಯಾತ್ ಕಾಯ್-ಕಾಯ್ ಪವಿತ್ರ್ ಪುಸ್ತಕಾತ್ ಲಿವಲ್ಲೆ ಹಾಯ್, ತೆ ಸಗ್ಳೆ ತೆಂಕಾ ಸೊಡ್ಸುನ್ ಸಾಂಗಟ್ಲ್ಯಾನ್.

28ತೆನಿ ಜಾವ್ಲಾಗಲ್ಲ್ಯಾ ಗಾಂವಾಂಚ್ಯಾ ಜಗ್ಗೊಳ್ ಯೆವ್ನ್ ಪಾವಲ್ಲ್ಯಾ ತನ್ನಾ ಜೆಜುನ್ ಅಪ್ನಿ ಫಿಡೆ ಜಾತಲ್ಯಾ ಸರ್ಕೆ ಕರುನ್ ದಾಕ್ವುಲ್ಯಾನ್.

29ಖರೆ ತೆನಿ ತೆಕಾ ಬಲ್ವುಲ್ಯಾನಿ,ಅನಿ “ ಅತ್ತಾ ದಿಸ್ ಬುಡುಕ್ ಯೆಲೊ, ಅನಿ ಅತ್ತಾ ಮಟ್ಲ್ಯಾರ್ ಕಾಳೊಕ್ ಹೊತಾ, ಖೈ ಜಾತೆ,”ಯೆ, ಅನಿ ಅಮ್ಚ್ಯಾ ವಾಂಗ್ಡಾ ರ್‍ಹಾ ಮನುನ್ ಲೈ ಮಾಗ್ಲ್ಯಾನಿ. ತೊ ತೆಂಚ್ಯಾ ವಾಂಗ್ಡಾ ರ್‍ಹಾವ್‍ಸಾಟ್ನಿ ಮನುನ್ ತೆಂಚ್ಯಾ ವಾಂಗ್ಡಾ ಗೆಲೊ.

30ತೊ ತೆಂಚ್ಯಾ ವಾಂಗ್ಡಾ ಜೆವ್ನಾಕ್ ಬಸ್ಲೊ, ಅನಿ ಭಾಕ್ರಿ ಘೆಟ್ಲ್ಯಾನ್, ಅನಿ ಧನ್ಯವಾದ್ ದಿವ್ನ್ ಮೊಡ್ಲ್ಯಾನ್, ಅನಿ ತೆಂಕಾ ದಿಲ್ಯಾನ್.

31ತನ್ನಾ ತೆಂಚೆ ಡೊಳೆ ಉಗಡ್ಲೆ, ಅನಿ ತೆಂಕಾ ತೆಚಿ ವಳಕ್ ಗಾವ್ಲಿ, ಖರೆ ತೊ ತೆಂಚ್ಯಾ ಇದ್ರಾಕ್ನಾ ನಾ ಹೊಲೊ.

32ತನ್ನಾ ತೆನಿ ಎಕಾಮೆಕಾಕ್ನಿ,“ ವಾಟೆನ್ ಯೆತಾನಾ ತೊ ಅಮ್ಚೆಕ್ಡೆ ಬೊಲುನ್ಗೆತ್ ಪವಿತ್ರ್ ಪುಸ್ತಕಾಚ್ಯಾ ವಿಶಯಾತ್ ಸಾಂಗುನ್ಗೆತ್ ಯೆತಾನಾ, ಅಮ್ಚ್ಯಾ ಭುತ್ತುರುಚ್ ಎಕ್ ಆಗ್ ಪೆಟ್ಲ್ಯಾ ಸರ್ಕೆ ಹೊಯ್ನಶಿ ಕಾಯ್?” ಮನುನ್ ಬೊಲ್ಲ್ಯಾನಿ.

33ತನ್ನಾ ತಾಬೊಡ್ತೊಬ್ ತೆನಿ ಉಟ್ಲ್ಯಾನಿ, ಅನಿ ಅಕ್ರಾ ಜಾನಾ ಶಿಸಾ, ಅನಿ ಹುರಲ್ಲಿ ಲೊಕಾ ಹೊತ್ತ್ಯಾಕ್ಡೆ ಜೆರುಜಲೆಮಾಕ್ ಗೆಲ್ಯಾನಿ.

34ಅನಿ “ ಧನಿ ಖರೆಚ್ ಝಿತ್ತೊ ಹೊಲಾ! ಸಿಮಾವಾಕ್ ತೊ ದಿಸ್ಲೊ!” ಮನುನ್ ಸಾಂಗಟ್ಲ್ಯಾನಿ.

35ತನ್ನಾ ವಾಟೆನ್ ಜಾತಾನಾ ಅಪ್ನಾಕ್ ಕಾಯ್-ಕಾಯ್ ಹೊಲೆ, ಅನಿ ತೆನಿ ಭಾಕ್ರಿ ಮೊಡುನ್ ದಿತಾನಾ ತೆಚಿ ವಳಕ್ ಅಸೆ ಕರುನ್ ಧರ್‍ಲ್ಯಾನಿ ಮನುನ್ ಸಗ್ಳೆ ಸಾಂಗಟ್ಲ್ಯಾನಿ.

36ತೆನಿ ದೊಗೆ ಜಾನಾ ಹೆ ಸಗ್ಳೆ ತೆಂಕಾ ಸಾಂಗ್ತಾ ಸಾಂಗ್ತಾನಾಚ್ ಜೆಜು ತೆಂಚ್ಯಾ ಮದ್ದಿ ಇಬೆ ರ್‍ಹಾಲೊ, ಅನಿ “ ಸಮಾದಾನ್ ತುಮ್ಕಾ” ಮಟ್ಲ್ಯಾನ್.

37ತೆನಿ ಎಗ್ದಮ್ ಭಿಂವ್ನ್ ಗೆಲೆ, ತೆನಿ ಅಮಿ ಭುತಾಕ್ ಬಗುಲಾವ್ ಮನುನ್ ಯವಜ್ಲ್ಯಾನಿ.

38ಖರೆ ಜೆಜುನ್ ತೆಂಕಾ,“ ತುಮಿ ಅಶೆ ಕಾಯ್ ಭೆದ್ರಕ್ ಸರ್ಕೆ ಇಬೆ ರ್‍ಹಾಲ್ಯಾಶಿ, ಅನಿ ಹ್ಯೊ ಸಂಶೆವ್ ತುಮ್ಚ್ಯಾ ಮನಾತ್ನಿ ಕಶ್ಯಾಕ್ ಯೆವ್ಲಾ?

39ಮಾಜ್ಯಾ ಹಾತಾಕ್ನಿ, ಅನಿ ಪಾಯಾಕ್ನಿ ಬಗಾ, ಅನಿ ಬರೆ ಕರುನ್ ಬಗಾ, ಮಿಯಾಚ್ ತೊ, ಮಾಕಾ ಅಪ್ಡುನ್ ಬಗಾ ತುಮ್ಕಾ ಕಳ್ತಾ. ಎಕ್ ಭುತಾಕ್ ಮಾಕಾ ಹೊತ್ತ್ಯಾ ಸರ್ಕೆ ಮಾಸ್ ಅನಿ ಹಡ್ಡಾ ರ್‍ಹಾಯ್ನಾತ್.” ಮಟ್ಲ್ಯಾನ್.

40ಹೆ ಸಾಂಗುನ್ ತೆನಿ ತೆಂಕಾ ಅಪ್ನಾಚಿ ಹಾತಾ, ಅನಿ ಪಾಯಾ ದಾಕ್ವುಲ್ಯಾನ್.

41. ತೆಂಕಾ ಲೈ ಕುಶಿ ಹೊಲಿ ಅನಿ ಅಜಾಪ್ ಹೊಲೆ; ಅಜುನ್‍ಬಿ ತೆಂಕಾ ವಿಶ್ವಾಸ್ ಹೊವ್ಕ್ ನತ್ತೊ. ತೆಚೆಸಾಟ್ನಿ ತೆನಿ ತೆಂಕಾ,“ತುಮ್ಚ್ಯಾಕ್ಡೆ ಕಾಯ್ ತರ್ ಖಾವ್ಕ್ ಹಾಯ್ ಕಾಯ್?” ಮನುನ್ ಇಚಾರ್‍ಲ್ಯಾನ್.

42ತೆನಿ ತೆಕಾ ಎಕ್ ಭಾಜಲ್ಲಿ ಮಾಸೊಳಿ ದಿಲ್ಯಾನಿ.

43ತೆನಿ ತಿ ಘೆಟ್ಲ್ಯಾನ್, ಅನಿ ತೆಂಚ್ಯಾ ಇದ್ರಾಕುಚ್ ಖಾಲ್ಯಾನ್.

44ಮಾನಾ ತೆನಿ, “ಮಿಯಾ ತುಮ್ಚ್ಯಾ ವಾಂಗ್ಡಾ ಹೊತ್ತ್ಯಾ ತನ್ನಾಚ್ ಮೊಯ್ಜೆಚ್ಯಾ ಪುಸ್ತಾಕಾತ್ನಿ, ಪ್ರವಾದ್ಯಾನಿ ಲಿವಲ್ಲ್ಯಾ ಪುಸ್ತಾಕಾತ್ನಿ, ಅನಿ ಕಿರ್ತನಾತ್ನಿ ಜೆ ಕಾಯ್ ಮಾಜ್ಯಾ ವಿಶಯಾತ್ ಲಿವಲ್ಲೆ ಹಾಯ್, ತೆ ಖರೆ ಹೊವ್ಕ್ ಪಾಜೆ ಮನುನ್ ಹೆ ಸಗ್ಳೆ ತುಮ್ಕಾ ಸಾಂಗಟಲ್ಲೊ”.

45ಮಾನಾ ತೆನಿ ಪವಿತ್ರ್ ಪುಸ್ತಕಾಚ್ಯಾ ವಿಶಯಾತ್ ಕಳ್ವುನ್ ಘೆವ್‍ಸಾಟ್ನಿ ತೆಂಚಿ ಮನಾ ಉಗಡ್ಲ್ಯಾನ್.

46ಅನಿ ತೆಂಕಾ,“ ಅಶೆ ಲಿವಲ್ಲೆ ಹಾಯ್; ಮೆಸ್ಸಿಯಾ ಕಸ್ಟ್ ಸೊಸುಕ್ ಪಾಜೆ ಅನಿ ತಿನ್ ದಿಸಾಂಚ್ಯಾ ಮಾನಾ ಝಿತ್ತೊ ಹೊವ್ನ್ ಉಟುನ್ ಯೆವ್ಕ್ ಪಾಜೆ.

47ಅನಿ ತೆಚ್ಯಾ ನಾವಾನ್ ಸಗ್ಳ್ಯಾ ದೆಶಾಕ್ನಿ ಪಾಪಾಚೆ ಜಿವನ್ ಬದ್ಲುಕ್,ಅನಿ ಪಾಪಾಂಚಿ ಮಾಪಿ ಗಳ್ಸುನ್ ಘೆವ್ಕ್, ಬರಿ ಖಬರ್ ಸಾಂಗುಕ್ ಪಾಜೆ, ಹೆ ಕಾಮ್ ಜೆರುಜಲೆಮಾತ್ನಾ ಚಾಲು ಹೊತಾ.”ಮನುನ್ ಲಿವಲ್ಲೆ ಹಾಯ್.

48ತುಮಿಚ್ ಹ್ಯಾ ಸಗ್ಳ್ಯಾ ಸಂಗ್ತಿಯಾಂಚೆ ಸಾಕ್ಷಿ.

49ಅನಿ ಮಿಯಾ ಮಾಜ್ಯಾ ಬಾಬಾನ್ ತುಮ್ಕಾ ಗೊಸ್ಟ್ ದಿಲ್ಲೆ ಧಾಡುನ್ ದಿತಾ, ಖರೆ “ತುಮಿ ವೈನಾ ತುಮ್ಚೆ ವರ್‍ತಿ ತೊ ಬಳ್ ಉತ್ರುನ್ ಯೆಯ್ ಪತರ್ ಜೆರುಜಲೆಮಾತುಚ್ ರ್‍ಹಾವ್ಕ್ ಪಾಜೆ.” ಮನುನ್ ಸಾಂಗಟ್ಲ್ಯಾನ್.

50ಮಾನಾ ತೆನಿ ತೆಂಕಾ ಶಾರಾಚ್ಯಾ ಭಾಯ್ರ್ ಬೆಥನಿಯಾ ಎವ್ಡ್ಯಾ ಧುರ್ ಘೆವ್ನ್ ಜಾವ್ನ್ ಥೈ ಅಪ್ನಾಚಿ ಹಾತಾ ವೈರ್ ಕರುನ್, ತೆಂಕಾ ಆಶಿರ್ವಾದ್ ದಿಲ್ಯಾನ್.

51ತೊ ಆಶಿರ್ವಾದ್ ದಿತಾ-ದಿತಾನಾಚ್, ತೆಕಾ ತೆಂಚ್ಯಾ ಮದ್ನಾ ವೈರ್ ಸರ್‍ಗಾಕ್ ಉಕ್ಲುನ್ ಘೆವ್ನ್ ಜಾವ್ನ್ ಹೊಲೆ.

52ತೆನಿ ತೆಚೆ ಆರಾದನ್ ಕರ್‍ಲ್ಯಾನಿ, ಅನಿ ಕುಶಿನ್ ಜೆರುಜಲೆಮಾಕ್ ಪರ್ತುನ್ ಗೆಲ್ಯಾನಿ.

53ಅನಿ ದೆವಾಕ್ ಧನ್ಯವಾದ್ ದಿವ್ನಗೆತ್ ದೆವಾಚ್ಯಾ ಗುಡಿತುಚ್ ತೆನಿ ಎಳ್ ಕಾಡ್ಲ್ಯಾನಿ.

← Chapter 23 Jump to: