1 Chronicles 29

Quechuan (Tayta Diospa Wilakuynin) 2003

← Chapter 28 Jump to:

1Tsaypitanami tsaycho juntaraykaq Israel runakunata rey David kayno nirqan: «Rey kananpaq tsurï Salomónta Tayta Dios akrashqa kaptinpis payqa mözularaqmi kaykan. Tsaynöpis sharkatsinanpaq kaq templuqa manami runapa wayintsu kanqa, sinöqa Tayta Diospa wayinmi.

2Tsaymi sirvishqä Tayta Diospa templunta tsurï sharkatsinanpaq puëdishqäpita kamarishqä qorita, yoraq qellayta, broncita, fiërruta y qerukunatapis. Tsaynölami kamarishqä ónice rumikunata, tukuy casta kuyaylapaq rumikunata y tsaytsika marmoltapis.

3«Tsaynöpis sirvishqä Tayta Diospa templunta imanöpapis ruratsiyta munashpämi tsay jananmanpis kikïpa kaqta qorita y yoraq qellayta churashqä.

4Churashqä qoriqa kaykan pachak waranqa (100,000) kïlu Ofirpita alinnin kaq qorimi. Tsaynöpis churashqä yoraq qellaynami kaykan ishkay pachak kimsa chunka pusaq waranqa (230,000) kïlu. Tsay qellayqa kanqa templu perqata enchapatsinanpaqmi.

5Tsaynöpis tsay qoripita y yoraq qellaypitami yachaq runakuna templupa adornunkunata rurapäkunqa. Kananqa Tayta Diospa templunta sharkatsinantsipaq qamkunapis kashqanman tupu churapäkamuy, taytakuna».

6Tsayno niptinmi cada aylupa y cada trïbupa mandaqninkuna, waranqa (1,000) soldädukunapa capitanninkuna, pachak (100) soldädukunapa capitanninkuna y David arutsishqan runakunapa capatazninkunapis apamunanpaq kushishqa promitipäkurqan.

7Tsaymi templuta sharkatsinanpaq apapäkurqan pachak soqta chunka pitsqa waranqa (165,000) kïlu qorita, chunka waranqa (10,000) qoripita rurashqa qellayta, kimsa pachak kimsa chunka waranqa (330,000) kïlu yoraq qellayta, soqta pachak waranqa (600,000) kïlu broncita y kimsa millón kimsa pachak waranqa (3,300,000) kïlu fiërruta.

8Tsaynölami tesorëruta entregapäkurqan tsaytsika kuyaylapaq rumikunata. Tesorëruqa karqan Gersónpita miraq Jehielmi.

9Tayta Diospa templunta sharkatsinanpaq lapan shonqunwan apapäkurmi runakuna pasaypa kushikärirqan. Tsaynölami rey Davidpis pasaypa kushikurqan.

10Tsawraqa lapan runakunapa nawpancho Tayta Diosta adorar David kayno nirqan: «¡Israel yärakushqan Tayta Dios, imayyaqpis alabashqa kaykulay!

11Tayta Dios, qamlami lapanpaq munayniyuq kaykanki. Qam japalaykita pïmaypis alabaykuläshunki. Lapan contraykikunatami vincinki. Lapanpitapis mas respitashqami kaykanki. Jana patsapis, kay patsapis y lapan imaykapis qampami kaykan. Qampa makikichömi imaykapis kaykan. Lapanpitapis mas munayniyuq kaptikimi qamta alabapäkü.

12«Qam yanapaptikimi runakuna rïcuyan. Qam yanapaptikimi respitashqa karkaykan. Qammi lapanta mandanki. Kalpayuq kaypis y munayniyuq kaypis qampitami kaykan. Respitädu kananpaq y munayniyuq kananpaqpis qammi runakunata yanapanki.

13Tayta Diosnilä, tsaypitami qamta agradëcikur kushishqa alabapäkü.

14«Templuykita sharkatsinäpaq lapan apamushqäkunapis qampita chaskishqalämi kaykan, Tayta. Tsaymi noqapis ni mandashqä runakunapis mana merecïtsu apapäkamushqäkunata chaskimänaykipaq.

15Unay aylükuna qorpala kashqannömi noqakunapis kay patsacho qorpala karkaykä. Lantuyno pasaqlami karkaykä.

16Tayta Diosnilä, templuykita sharkatsinäpaq apamushqäkunapis qampita chaskishqalämi kaykan.

17«Tayta Diosnilä, musyankimi runakuna shonquncho imata yarpashqantapis. Pipis munashqaykino kawaptinqa kushikunkimi. Tsaymi noqapis templuykipaq lapan shonqüwan apamushqä. Tsaynöpis kuyashqayki runakuna lapan shonqunwan apamushqanta rikar kushikümi.

18Unay aylükuna Abraham, Isaac y Israel yärakushqan Tayta Dios, noqakunata imaypis yanapaykalämay lapan shonqüwan qam munashqaykino kawapäkunäpaq.

19Tsurï Salomóntapis tantiyaykatsilay mandamientuykikunata, yachatsikuynikikunata y leynikikunata lapan shonqunwan imaypis cäsukunanpaq. Kamaripashqäkunawan templuykita shumaq sharkatsinanpaq yanapaykulay».

20Tayta Diosta tsayno manakurirmi runakunata David kayno nirqan: «Lapayki Tayta Diosnintsita alabapäkuy». Tsayno niptinmi unay aylunkuna yärakushqan Tayta Diospa nawpanman y reypa nawpanman lapan qonqurpakuykur alabapäkurqan.

21Tsaypita jukaqnin junaqnami waranqa (1,000) turituta, waranqa carnikunata y waranqa carnishkunata pishtarkur rupatsina sacrificiukunata rupatsipäkurqan. Tsaynölami wakin sacrificiukunatapis rupatsir jananman vïnutapis winaparqan. Tsay sacrificiukunata lapan Israel runakunapa jutinchömi rupatsipäkurqan.

22Tsay junaqmi Tayta Diospa nawpancho kushishqa mikupäkurqan y upupäkurqan. Nirkurna Tayta Diospa nawpancho Davidpa tsurin Salomónpa umanman aceitita winaparqan rey kananpaq. Tsaywanqa ishkay kutinami rey kananpaq umanman aceitita winaparqan. Tsaynölami Sadoctapis mandaq cüra kananpaq aceitita winaparqan.

23Tsaynömi Salomónta Tayta Dios churarqan papänin Davidpa trukan Israel runakunapa mandaqnin rey kananpaq. Rey kashpan lapan rurashqankunapis ali kaptinmi Israel runakuna lapanpis payta respitar cäsukärirqan.

24Tsaynölami mandaq runakuna, soldädukuna y Davidpa tsurinkunapis rey Salomónta kushishqa chaskikärirqan.

25Salomónta lapanchöpis Tayta Dios yanapaykashqantami Israel runakuna tantiyakärirqan. Tsayno yanapaptinmi puntata reykunapitapis mas munayniyuq rikakurqan.

26Lapan Israel runakunapa mandaqnin reymi Isaípa tsurin David karqan.

27Puntataqa Hebrón markachömi qanchis wata rey karqan. Nirkurmi Jerusalénchöpis kimsa chunka kimsa (33) wata rey karqan. Tsawraqa Israel runakunapa mandaqnin rey karqan chusku chunka (40) watami.

28David pasaypa awkinnami wanukurqan. Payqa karqan rïcu runa y pïmaypita respitashqami. Paypa trukannami tsurin Salomónna rey karqan.

29Rey David lapan rurashqankuna qalaykunanpita ushananyaqmi qelqaraykan profëta Samuel qelqashqancho, profëta Natán qelqashqancho y profëta Gad qelqashqancho.

30Tsaychömi qelqaraykan imano mandashqanpis, munayniyuq kashqanpis, ima pasashqankunapis, Israel nación imano kashqanpis y wakin nacionkuna imano kashqanpis.

← Chapter 28 Jump to: