1 Timothy 2

Quechuan (Tayta Diospa Wilakuynin) 2003

← Chapter 1 Jump to: Chapter 3 →

1Timoteo, wawqi panikunata shakyätsiy Tayta Diosta agradëcikur lapan runakunapaq imaypis manakärinanpaq.

2Tsaynöpis Tayta Diosta manakäritsun reykunapaq y wakin autoridäkunapaq. Ali mandananpaq Tayta Dios yanapaptinmi noqantsipis jawkala Tayta Dios munashqanno kawapäkushunpaq.

3Lapan runakunapaq manakurqa salvamaqnintsi Tayta Dios munashqannömi manakuykantsi.

4Payqa munan lapan runakuna ali wilakuyninta chaskikur salvashqa kanantami.

5Juklaylami Tayta Diosqa. Tayta Dioswan ali kawanantsipaq juk runalami amistatsimantsi. Tsay runaqa Jesucristumi.

6Paymi wanushqa lapan runakunata salvananpaq. Tsayno salvakuq kashqantaqa tiempun chayamuptinmi Tayta Dios musyatsimashqantsi.

7Tsay ali wilakuyta mana Israel runakunata wilapar apostolnin kanäpaqmi Tayta Dios churamashqa. Tsaymi yachaykätsï Diospa ali wilakuyninta chaskikur Jesucristuman yärakärinanpaq. Mana lulakuypami [Jesucristupa jutincho] rasun kaqta nï.

8Noqa munä wawqikuna maytsaychöpis mana rimanakuypa ni pitapis mana nanaparaypa makinkunata joqarkärir Tayta Diosta manakärinantami.

9Warmikunapis kamaraqlata jatikäritsun. Jamurpaypaq röpakunataqa ama jatikäritsuntsu. Tsaynöpis ama yarpachakäritsuntsu aqtsanta altsakunalanpaqqa ni qoriwanpis ni perlaswanpis adornakunalanpaqqa. Aläpa chanin röpakunatapis ama jatikäritsuntsu.

10Tsaypa trukanqa Tayta Dios munashqanno kawaq warmikunano alikunata rurar kawapäkutsun.

11Juntakashqancho yachatsipäkuptin warmikuna upälala yachakäritsun.

12Noqa manami munätsu warmikuna olqukunata yachatsinanta ni mandananta. Tsaypa trukanqa upälakäritsun.

13Tsayno nï Adánta kamarkurraq Evata kamashqa kaptinmi.

14Tsaynöpis manami Adántatsu Satanás engañarqan, sinöqa Evatami. Engañaptinmi jutsata rurarqan.

15Tsayno kaptinpis warmikuna salvakärinqa wawankunata shumaq ashmar, Tayta Diosman yärakur, pïmaytapis kuyar, shumaq tantiyakur y Tayta Dios munashqanno kawarmi.

← Chapter 1 Jump to: Chapter 3 →