1 Timothy 3

Quechuan (Tayta Diospa Wilakuynin) 2003

← Chapter 2 Jump to: Chapter 4 →

1Mayor wawqi kayta munaqkunaqa alitami yarparkaykan. Tsay nishqäqa rasun kaqmi kaykan.

2Mayor wawqikuna kanman pipitapis mana jamurpashqa, juk warmiyuqla, shumaq tantiyakuq, shumaq yarpachakurir imatapis ruraq, pïmaypitapis respitashqa, patsatsikuq y shumaq yachatsikuq.

3Tsaynöpis kanman mana upyaq, pitapis achäquita mana ashipaq, kuyapäkuq, qellaylapaq mana wanuq

4y warminta y tsurinkunata shumaq ashmaq. Tsaynöpis tsurinkunata yachatsinman cäsukuq y respitakuq kananpaq.

5Wayincho taqkunata shumaq mana yachatsirqa ¿imanöparaq Tayta Diosman yärakuqkunata yachatsinman?

6Jesucristuman tsayraq yärakuqkunaqa manami mayor wawqi kanmantsu. Yachaq tukurqa diablu maldicionashqa kashqannömi paykunapis maldicionashqa kanqa.

7Jesucristuta mana chaskikuq runakunapis rikakärinanpaq mayor wawqikuna ali kawapäkutsun. Ali kawaptinqa paykunapaq manami pipis rimarkaykanqanatsu ni diablupis toqlanman ishkitsinqatsu.

8Tsaynöpis diäcunukuna kanman respitashqa, imatapis awnishqanta cumpliq, mana upyaq y rïcu kayta munar mana sakyapakuq.

9Jesucristupa wilakuyninta yachakushqannöla jutsata mana ruraypa kawapäkunman.

10Diäcunu kananpaq manaraq churar shumaq musyapäkunman imano kawashqantapis. Ali kawashqanta musyaykurraq diäcunu kananpaq churapäkunman.

11Diäcunupa warminpis kanman respitashqa, pitapis mana tumpaq, shumaq tantiyakuq y awnishqanta cumpliq.

12Diäcunukunaqa juk warmiyuqla kanman. Warminta y tsurinkunata shumaq ashmapäkunman.

13Diäcunu kashqanta cumplirqa pïmaypitapis ali respitashqami kanqa. Mana mantsakuypami Jesucristuman yärakushqanta wilakunqa.

14Timoteo, shamuyta yarparpis puntataqa kay cartalataraqmi apaykätsimü.

15Jukla mana shamuptïpis kay cartata liyirnami tantiyanki wawqi panikunata imano yachatsinaykipaqpis. Noqantsiqa imayyaqpis kawaq Diospa iglesian karmi wilakuyninta wilakuntsi y lutan yachatsikuqkunata corrigintsi.

16Tayta Dios musyatsimashqantsi wilakuyqa shumaqmi kaykan. Tsay wilakuynin kaynömi niykan: Jesucristuqa runanömi yurirqan. Wanushqanpita Espíritu Santumi kawaritsimurqan. Angilkunapis payta rikarqanmi. Mana Israel runakunatami wilakuyninta wilakuqkuna wilaparqan. Maytsaychöpis paymanmi yärakurkaykan. Gloriaman kutiykurmi Tayta Diospa nawpancho kaykan.

← Chapter 2 Jump to: Chapter 4 →