2 Corinthians 13

Quechuan (Tayta Diospa Wilakuynin) 2003

← Chapter 12 Jump to:

1Kananwanqa kimsa kutinami qamkunaman watukuq shamushaq. Yarpapäkuy Tayta Diospa palabrancho kayno qelqaraykashqanta: «Ishkay o kimsa testïgukuna careaptinraqmi pipis jutsayuq kashqan musyakanqa».

2Qamkuna kaqman shamur jutsa ruraykaqkunata maynami nirqä jutsa rurashqanta kacharinanpaq. Kananpis nawpaykikunacho kaykaqnömi lapaykita yapay kayno nï: Kanan kutimur tsaynöla jutsata ruraykaqta tarirqa manami kuyapäshaykitsu.

3Tsayraqmi musyapäkunki qamkunata nishqäkuna Jesucristo munashqanno kashqanta. Jesucristupis manami mayqanikitapis jutsaykipita tsapäshunkitsu. Tsaypa trukanqa jutsa rurayta mana kachariptiki munayninwanmi corrigipäkushunki.

4Munayniynaq runano cruzcho wanuptinpis Tayta Diosmi munayninwan payta kawaritsimushqa. Tsaynölami noqakunapis Jesucristuman yärakur kikiläkunapitaqa munayniynaq kaykarpis Tayta Diospa munayninwan qamkunata corrigishaykipaq.

5Jesucristuman rasunpa yärakärishqaykita o mana yärakärishqaykitapis kikikikuna tantiyakäriy. ¿Manaku tantiyapäkunki Jesucristo qamkunawan kaykashqanta? Payman mana yärakuptikiqa manami qamkunawantsu kaykan.

6Rasunpa payman yärakurqa Jesucristo kachamashqanta tantiyakärinkimanmi.

7Tayta Diosta manakurkaykä nishqäkunata chaskikur jutsa ruraykunata kacharinaykipaqmi. Manami munayniyuq kashqäta tantiyapäkunaykipaqtsu manakurkaykä, sinöqa munayniynaq kashqäta yarparpis Tayta Dios munashqanno kawapäkunaykipaqmi.

8Tsayno nipäkü Tayta Diospa ali wilakuyninta imapis mana tsapänanpaqmi. Paypa wilakuyninta pïmaypis chaskikunantami munapäkü.

9Tsaymi Tayta Diosta manakurkaykä lapanchöpis pay munashqanno kawapäkunaykipaq. Pay munashqanno kawapäkuptikiqa munayniynaq kashqäta runakuna yarpaptinpis kushikümi.

10Kay qelqamushqäkunata cäsukäriptiki qamkuna kaqman chayamushpä imatapis mananami nishaykinatsu. Manami lakikatsinäpaqtsu apóstol kanäpaq Tayta Dios churamashqa, sinöqa qamkunata shakyätsir yanapanäpaqmi.

11Wawqi panikuna, imaypis kushikäriy. Tayta Dios munashqanno kawanaykipaq jukniki juknikipis shakyätsinakäriy. Mana chikinakuypa juk shonqula kawapäkuy. Tsayno kawaptikimi kuyapäkuq y ali kawayta qomaqnintsi Tayta Dios imaypis yanapashunki.

12Jukniki juknikipis qaqlaykikunacho mutsanakushpayki winchinakäriy.

13Kaycho kaykaq lapan wawqi panikunapis salüduntami qamkunapaq apatsikamun.

14Señor Jesucristo, Tayta Dios y Espíritu Santu imaypis kuyapaykuläshunki. [Amén.]

← Chapter 12 Jump to: