2 Corinthians 6

Quechuan (Tayta Diospa Wilakuynin) 2003

← Chapter 5 Jump to: Chapter 7 →

1Wilakuqnin karmi qamkunata ruwakärï kuyapäkuq Tayta Diosta mana yupaytupänaykipaq.

2Palabranchöpis kaynömi qelqaraykan: «Kuyapashqä hörami manakamashqaykita mayashqä. Salvanäpaq kaq junaqmi qamta salvashqä». Tayta Dios kuyapäshunayki höraqa kanan hörami kaykan. Tayta Dios salvashunayki junaqqa kanan junaqmi kaykan.

3Noqakuna wilakushqäta pipis manakaqman mana churananpaqmi imatapis lutanta rurapäkütsu.

4Tsaypa trukanqa Tayta Diosta sirviq kashqäta runakuna musyananpaqmi pay munashqanno kawapäkü imano nakarpis, ima pishïmaptinpis, fiyupa lakikurpis,

5astapäkamaptinpis, carcilman wichqapäkamaptinpis, maqapäkamaptinpis, utikashqa wilakurpis y punuyta mikuyta mana tarirpis.

6Tsaynöpis Tayta Diosta sirviq kashqäta tantiyakärinanpaqmi jutsata mana ruraypa kawapäkü, wilakuyninta shumaq tantiyapäkü, chikimaqnïkunata perdonapäkü, pïmaytapis kuyapä, Espíritu Santupa munaynincho kawapäkü, pipaqpis ali shonqu kapäkü,

7Diospa wilakuyninta wilakärï y pay yanapamaptin imatapis alita rurapäkü. Conträ sharkapäkuptinpis pay munashqanno alilatami rurapäkü.

8Wakin runakunami ali rikapäkaman y wakinnami mana ali rikapäkaman. Tsaynöpis wakinmi favornï parlapäkun y wakinnami conträ rimapäkun. Rasun kaqlata parlaptïpis lulakushqätami yarpapäkun.

9Wakinqa reqiykämarpis manami reqiq tukümantsu. Wanushqäta yarpaptinpis kawarkaykäraqmi. Chikimashpan nakatsimarpis manami wanutsipäkamashqatsu.

10Lakishqa karpis kushishqalami kawarkaykä. Waktsa karpis atskaqta rïcuyätsiqnömi karkaykä. Imäkuna mana kaptinpis noqakunapami lapanpis kaykan.

11Corintucho taq wawqi panikuna, lapan shonqüwan kuyarmi imatapis mana pakaypa lapan yarpashqäta wilapashqä.

12Qamkunata kuyar mana qonqaypa yarparaykaptïqa ¿imanirtaq qonqaykamashqanki?

13Tsaymi tsurïtano kayno nipäkushayki: Noqakuna kuyashqäno qamkunapis kuyamashpayki yarparkalämay.

14Wawqi panikuna, musyashqaykinöpis manami pipis törutawan bürruta yüguntsu. Tsaynölami qamkunapis Jesucristuta mana chaskikuqkunawan yügushqano kankimantsu. Ali ruraypis manami mana ali ruraywan tinkuntsu. Atski kashqanchöpis tsakay manami kantsu.

15Jesucristupis Belialwan manami tantiyanakuntsu. Tsaynölami Jesucristuta chaskikuqkunawan mana chaskikuqkunapis mana tantiyanakuntsu.

16Tsaynöpis Tayta Diospa templunman ïdulukunata jamatsishqan manami alitsu kaykan. Noqantsiqa imayyaqpis kawaq Tayta Diospa templunmi kaykantsi. Palabranchöpis Tayta Dios kaynömi niykan: «Paykunawanmi täshaq. Paykunawanmi purishaq. Paykunapa Diosninmi kashaq. Paykunami kuyashqä runakuna kanqa».

17Mastapis palabrancho kayno niykan: «Jutsata rurar kawaq runakunapita witikäriy. Paykunapita yarqukäriy. Imatapis impüruyätsikuqkunata ama yatapäkuytsu. Tsayno kawaptikimi chaskishayki.

18Qamkunapa taytaykimi kashaq. Qamkunami wamräkuna kankipaq. Lapanpaq munayniyuq Tayta Dios karmi tsayno nï».

← Chapter 5 Jump to: Chapter 7 →