bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Quechuan
/
Quechuan (Tayta Diospa Wilakuynin) 2003
/
Genesis 47
Genesis 47
Quechuan (Tayta Diospa Wilakuynin) 2003
← Chapter 46
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 37
Chapter 38
Chapter 39
Chapter 40
Chapter 41
Chapter 42
Chapter 43
Chapter 44
Chapter 45
Chapter 46
Chapter 47
Chapter 48
Chapter 49
Chapter 50
Chapter 48 →
1
Tsaypita Faraón kaqman chayaykur José kayno nirqan: «Canaánpitami papänï lapan wawqïkunawan shakamushqa uyshankunata, cabrankunata y wäkankunata qatikurkur y imaykankunatapis apakurkur. Kananqa Gosénchömi patsarpaykan».
2
Tsaypitami pitsqa wawqinkunata akrarkur Joséqa pusharqan Faraón reqinanpaq.
3
Tsawraqa Josépa wawqinkunata Faraón tapurqan kayno nir: «¿Ima aruylatataq yachapäkunki?» Tsaymi nipäkurqan: «Unay aylükunanöpis uyshakunata y cabrakunata ashmakuylatami yachapäkü, tayta.
4
Canaáncho pasaypa muchuy kaptin y uywäkunapaqpis qewa mana kaptinmi kay nacionman shapäkamushqä. Tsaymi qamta ruwakü aylükunawan Goséncho täkunäpaq».
5
Tsayno niptinmi Joséta Faraón kayno nirqan: «Papänikiwan wawqikikuna alipaqmi shapäkamushqa.
6
Kay Egipto nación munaynikicho kaykaptinqa papäniki y wawqikikuna täkunanpaq Gosén particho alinnin kaq chakrata rikatsiy. Paykunacho mayqantapis mas ali mitsiq kaqta churanki noqapa uywäta mitsipämänanpaq».
7
Tsaynölami papänin Jacobtapis Joséqa pusharqan Faraón reqinanpaq. Faraónpa nawpanman chayaykurmi Jacobqa winchikur kayno nirqan: «Tayta Dios yanapaykuläshunki».
8
Tsaymi Faraón tapurqan kayno nir: «¿Ayka watayuqnataq kaykanki?»
9
Tsawraqa kayno nirqan: «Wakpa kaypa puriykar pachak kimsa chunka (130) watatanami usharkü, tayta. Pasaypa nakar puriptï noqapaqqa vïdapis vïdanatsu. Imano karpis unay aylükuna kawashqan watamanqa manami chayäraqtsu».
10
Nirkurnami Faraónta Tayta Dios yanapaykunanpaq manakurir Jacob aywakurqan.
11
Tsaypita Faraón nishqannölami Joséqa papäninta y wawqinkunata rikatsirqan Egiptucho mas alinnin kaq partita tänanpaq. Tsaynöpami papänin y wawqinkuna chakrayuq karqan Ramesés particho.
12
Tsaycho taptinmi mikuyta José kamariparqan papäninta, wawqinkunata y lapan aylunkunata.
13
Maytsaychöpis mikuy manana kaptinmi pasaypa muchuy karqan Egiptucho y Canaánchöpis. Tsaymi runakuna pachapita pasaypa nakarqan.
14
Tsayjinanpa muchuy kaptinmi Joséqa Egipto runakunata y cananeo runakunata trïguta rantikurqan. Trïguta rantikushqan qellaytami Faraónpa palaciunman churarqan.
15
Tsaynöpami Egipto runakunapa y cananeo runakunapapis qellaynin ushakarqan. Tsaymi Egipto runakunaqa Joséman aywaykur kayno nipäkurqan: «Mikuyta rantipäkunäpaq qellaynï mananami kannatsu. Tayta, mikuyta kamaripaykalämay yarqaypita mana wanupäkunäpaq».
16
Tsayno niptinmi José kayno nirqan: «Qellayniki mana kaptinqa uywaykikunata apamuy trïguwan trukanantsipaq».
17
Tsaymi Egipto runakunaqa cawallunkunata, uyshankunata, cabrankunata, wäkankunata y bürrunkunatapis José kaqman apapäkurqan trïguwan trukananpaq. Uywankunawan trukaypami juk wata mikunanpaq trïguta taripäkurqan.
18
Wata pasarkuptinnami Joséman yapay aywaykur kayno nipäkurqan: «Musyashqaykinöpis lapan qellaynïtanami ushapäkushqä trïguta rantiylawan, tayta. Lapan uywäkunapis qampana kaykaptinqa imäkunapis mana kannatsu trïguwan trukanantsipaq. Tsaynöpami chakräkunalawanna quëdashqä.
19
Tsayno kaykaptinqa trïguta rantikamänaykipaq chakräkunata y kikïkunatapis rantiykalämay, tayta. Rantimaptikiqa Faraónpa ashmayninnachari kapäkushaq. Muruta kamaripaykalämay chakrakunata murupäkunäpaq. Yarqaypita wanunätaqa ama munaykuytsu, tayta. Noqakuna ushakaptïqa chakrakunapis purunyanqachari».
20
Egipto runakuna yarqanar tsayno nipäkuptinmi chakrankunata trïguwan trukaypa José rantirqan. Tsaynöpami intëru Egiptucho lapan chakrakunapis Faraónlapana karqan.
21
Tsaynölami runakunapis paypa ashmaynilanna karqan.
22
Cürakunapa chakrankunatami itsanqa José mana rantirqantsu, paykuna mikunanpaq trïguta Faraón kamaripaptin. Tsaymi cürakunaqa chakrankunata mana rantikurqantsu.
23
Tsaypitanami lapan runakunata José kayno nirqan: «Kananqa Faraónpana kanaykipaqmi chakrantinta rantishqä. Trïgu muruta apapäkuy murupäkunaykipaq.
24
Murushqayki trïgu poquptin cada pitsqa arröbapita juk arröbata Faraónpaq rakinki. Tsaypita putsuq kaqnami kanqa yapay murunaykipaq, tsurikikunawan y wayikicho wakin taqkunawanpis mikunaykipaq».
25
Tsawraqa runakuna kayno nirqan: «Tayta, qam ali runa karmi yarqaypita wanurkaykaptï salvamashqanki. Kananpitaqa Faraónpa ashmayninnami kapäkushaq».
26
Tsaypita patsami kananyaqpis José nishqannöla cada pitsqa arröba trïgupita juk arröbata Faraónpaq apapäkun. Cürakunami itsanqa mana apantsu chakrankunata Faraónta mana rantikushqa kar.
27
Jacobpis y paypita miraqkunapis Egiptucho Gosén partita posisionta chaskipäkurqan. Tsaychömi atskaman mirapäkurqan.
28
Egiptucho Jacob tarqan chunka qanchis watami. Payqa kawarqan pachak chusku chunka qanchis (147) watayuq kashqanyaqmi.
29
Wanunanpaqna kaykashqanta yarparmi tsurin Joséta qayaykatsir Israel kayno nirqan: «Ruwakushayki, hïju. Lilïta yataykamar promitimay wanuptï kay Egiptucho mana pampamänaykipaq.
30
Wanukur unay aylükuna kaqmanmi aywakushaq. Ayätana Egiptupita apar aylükuna pamparashqanman pampaykulanki». Tsawraqa José kayno nirqan: «Nimashqaykinöchari kanqa, papä».
31
Tsayno niykaptinpis papäninqa kaynömi nirqan: «Apamänaykipaq Tayta Diospa jutincho jurar promitimay, hïju». Tsayno niptinmi Tayta Diospa jutincho jurar José awnirqan. Awnirkuptinnami cämanman Israel wequkuykurqan.
← Chapter 46
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 37
Chapter 38
Chapter 39
Chapter 40
Chapter 41
Chapter 42
Chapter 43
Chapter 44
Chapter 45
Chapter 46
Chapter 47
Chapter 48
Chapter 49
Chapter 50
Chapter 48 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
32
33
34
35
36
37
38
39
40
41
42
43
44
45
46
47
48
49
50