Hebrews 2

Quechuan (Tayta Diospa Wilakuynin) 2003

← Chapter 1 Jump to: Chapter 3 →

1Angilkunapitapis Jesucristo mas munayniyuq kaykaptinqa wilakuyninta mayashqantsikunata shumaq cäsukushun. Mana cäsukurqa lutankunatapis ruraykushwanchari.

2Angilkuna apamushqan leykunata mana cäsukuq runakunatapis Tayta Dios castigaykaptinqa

3¡imajinanparaq castigamäshun salvamänantsipaq kaq wilakuyta mana cäsukuptintsiqa! Tsay wilakuytami Señor Jesucristo puntata wilakurqan. Tsaypitanami wilakushqanta mayaqkuna noqantsita wilamashqantsi.

4Wilakuynin rasunpa kashqanta Tayta Dios musyatsimashqantsi señalkunata y mantsariypaq milagrukunata rurashpanmi. Tsaynöpis musyatsimashqantsi Espíritu Santuwan habilidäkunata kikin munashqanno qomashpantsimi.

5Mushuq patsata manami angilkunapa makinmantsu Tayta Dios churashqa, sinöqa Jesucristupa makinmanmi.

6Tsaymi palabrancho kayno niykan: ¿Imanataq runa kaykan tsayjinanpa paypaq yarpachakunaykipaq? ¿Imanataq runa kaykan shumaq kuyaykunaykipaq?

7Runata kamashqanki cäsi angilno munayniyuq kananpaqmi. Reytanöpis churashqanki munayniyuq y respitashqa kananpaqmi. [Lapan kamashqaykikunatapis munayninmanmi churashqanki.]

8Kay patsacho kaqkunataqa lapantami makinman churashqanki. Makinman lapanta churashqanta niptinpis manaraqmi rikantsiraqtsu runapa munaynincho lapan kashqanta.

9Tsayta manaraq rikarpis y Jesucristo kay patsacho kashqanyaq angilkunapita mënus munayniyuq kaykaptinpis musyantsimi munayniyuq y respitashqana kananpaq Tayta Dios payta churashqanta. Tayta Dios kuyapäkuq karmi payta tsayno churarqan lapan runakunata salvananpaq wanushqa kaptin.

10Jesucristo salvamaqnintsi kananta munarmi lapantapis kamaq y lapanpaq munayniyuq Tayta Dios payta kachamurqan noqantsi rayku nakar wanunanpaq. Tsaynöpami wamrankunata salvar gloriaman pushanqa.

11Tsaymi runakunata salvaq Jesúspis y salvashqan kaqkunapis tsay Taytalana kaykantsi. Tsay Taytala karmi salvashqan kaqkunata Jesucristo mana penqakuypa nimantsi wawqinkuna y paninkuna kashqantsita.

12Tayta Diospa palabranchöpis Jesucristo kaynömi niykan: «Salvakuq kashqaykipitami wawqïkunata wilapäshaq. Paykunawan juntakaykurmi alabashayki».

13Mastapis kaynömi niykan: «Noqaqa paylamanmi yärakushaq». Tsaynöpis kayno nin: «Tayta Dios qomashqan wamräkunawanmi kaycho kaykä».

14Diospa wamrankuna ushakaqla kaptinmi Jesucristupis noqantsino yurirqan y noqantsino wanurqan. Tsayno wanurmi wanuypaq munayniyuq diabluta vincirqan.

15Tsaynöpami wanuyta mantsakur kawashqantsipita jorqamashqantsi. Kananqa wanuytapis manami mantsakuntsinatsu.

16Jesucristuqa manami angilkunata yanapananpaqtsu shamurqan, sinöqa Abraham aylu kaqkunata yanapananpaqmi.

17Yanapamänantsipaqmi noqantsino kay patsacho runa karqan. Tsaynöpami Tayta Diospa nawpancho kuyapäkuq y lapantapis cumpliq mandaq cüra rikakurqan. Paymi sacrificiu kashqa jutsantsikunapita Tayta Dios perdonamänantsipaq.

18Jesucristutapis Satanás tentar nakatsishqa kaptinmi noqantsitapis tentamaptintsi Jesucristo yanapamäshun.

← Chapter 1 Jump to: Chapter 3 →