Hebrews 3

Quechuan (Tayta Diospa Wilakuynin) 2003

← Chapter 2 Jump to: Chapter 4 →

1Wawqi panikuna, gloriaman chayapäkunaykipaq Tayta Dios qayaykäshuptikiqa chaskikushqantsi Jesucristo pï kashqantapis shumaq tantiyakäriy. Paymi apostolnintsi y mandaq cürantsi kaykan.

2Wayinta ali rikananpaq Tayta Dios nishqanta Moisés cumplishqannömi Jesucristupis lapanta cumplirqan.

3Musyashqantsinöpis wayi kuyaylapaq kaptin manami wayitatsu alabantsi, sinöqa wayi ruraqtami. Tsaynöpis manami Moisésta alabanantsipaqtsu kaykantsi, sinöqa Jesucristuta alabanantsipaqmi.

4Wayipis albañil sharkatsiptinraqmi kan. Tsaynölami Tayta Dios kamaptinraq lapanpis kaykan.

5Tayta Diospa wayinta Moisés ali rikarpis ashmaynölami karqan. Tsayno karmi shamuq watakunacho Tayta Dios tantiyatsimänantsipaq kaqkunata qelqarqan.

6Jesucristumi itsanqa Tayta Diospa Tsurin kar wayipa duëñun kaykan. Payman yärakur nishqankunata imaypis cumplirqa noqantsimi paypa wayin kaykantsi.

7Tsaymi Espíritu Santu kayno nishqanta shumaq tantiyakushun: «Tayta Dios nishqanta kanan junaq mayaykarqa

8chunyaq jirkacho pruëba kaptin unay ayluykikuna chukru shonqu kashqanno ama kapäkuytsu.

9Tsaychömi chusku chunka (40) wata yanapashqäta rikaykarpis paykunaqa munashqanta ruratsimayta munarqan.

10Tsaymi pasaypa rabyar kayno nirqä: «Kay runakunaqa oqrakashqanömi karkaykan. Yätsishqätapis manami chaskikärintsu».

11Tsayno rabyarmi kayno nir jurarqä: «Paykunaqa promitishqä jamayman manami yaykupäkunqatsu» ».

12Wawqi panikuna, cuidädu qamkunapis chukru shonqu y mana yärakuq kar imayyaqpis kawaq Tayta Diospita witikärinkiman.

13Tsaypa trukanqa waran waran jukniki juknikipis shakyätsinakäriy Tayta Dios munashqanno kawapäkunaykipaq. Tsaynöpami jutsa ruray mana engañashuptiki shonquyki mana chukruyanqatsu.

14Wanunantsiyaq Tayta Diosman yärakur pay munashqanno kawashpantsimi Jesucristo herenciata chaskishqanno noqantsipis herenciata chaskishunpaq.

15Tayta Diospa palabrancho kaynömi nin: «Tayta Dios nishqanta kanan junaq mayaykarqa unay ayluykikuna chukru shonqu kashqanno ama kapäkuytsu».

16Tantiyakäriy. ¿Pïkunataq Tayta Dios nishqanta mayaykarpis contran sharkapäkurqan? ¿Manaku Egiptupita Moisés jorqamushqan Israel runakuna karqan?

17¿Pïkunataq chusku chunka (40) wata Tayta Diosta rabyanätsirqan? ¿Manaku chunyaq jirkacho Tayta Dios ushakätsishqan jutsa ruraq runakuna karqan?

18¿Pïkunatataq Tayta Dios jurashpan nirqan promitishqan jamayman mana yaykunanpaq? ¿Manaku payta mana cäsukuq runakuna karqan?

19Paykunaqa mana criyishqanpitami yaykupäkurqantsu.

← Chapter 2 Jump to: Chapter 4 →