Hosea 12

Quechuan (Tayta Diospa Wilakuynin) 2003

← Chapter 11 Jump to: Chapter 13 →

1Efraín runakunaqa pasaypa lulakuylaman y wanutsinakuylaman uman churakashqa karmi Asiria runakunawan pactuta rurarkaykan. Egipto nacionwanpis pactuta rurashpanmi aceitita aparkaykätsin. Tsay nacionkunawan pactuta rurarqa wayralawan pachan juntananpaq kashqanta yarpaq runanömi manakaqlapaq rurarkaykan. Inti jeqamunan kaq lädupita shamuq akaq wayrata qoyayta qatikachaq runanömi manakaqkunata rurarkaykan».

2Judá runakunapitapis Tayta Dios rabyashqami kaykan. Tsaymi jutsata rurashqanman tupu castiganqa.

3Unay ayluntsi Jacobpis wawqinpa talonninta aptakushqami yurirqan. Awkisna kaykarmi Tayta Dioswan pelyarqan.

4Angilwan pelyar vinciykurmi bendicionninta qonanpaq waqapashpan ruwakurqan. Tsaypitanami Bet-elcho Tayta Dios yuriparkur parlaparqan.

5Paymi lapanta mandaq Tayta Dios kaykan. ¡Paypa jutinpis Yahwehmi kaykan!

6Tsayno kaykaptinqa jutsa ruraykunata kacharir Tayta Diosta perdonta manakäriy. Tayta Diosta promitishqaykinöla leyninkunata cäsukur kawapäkuy. Kuyashuqniki Tayta Diosman imaypis yärakäriy.

7Tayta Diosmi kayno nin: «Qamkunaqa cananeo runakunanömi runa mayikita pësuwan engañarkaykanki. Runa mayikita engañar mishkipäkunkiraqmi.

8Tsayno engañarmi kushishqa kayno nirkaykanki: «Aläpami rïcuyashqä. Negociupaq suertï kanmi. Runakunata engañashqäta manami pipis cuentata qokuntsu».

9Tsayno nipäkurpis tantiyakäriy unay ayluykikuna Egiptucho kashqanpita patsa Tayta Diosniki kashqäta. Tsaymi castigaptï toldukunalacho tankipaq Ramäda fiestata rurar tashqaykino.

10«Jutsa ruraykunata kacharinaykipaqmi profëtakunawan wilakatsimurqä. Wilapäshunaykipaqmi sueñuynincho yaparir yaparir revelarqä. Imamanpis tinkutsiypa tantiyatsishunaykipaqmi kachamurqä.

11«Galaad particho taq runakunaqa ïdulukunata manakaqlapaqmi sirvipäkun. Gilgalcho taq runakunapis törukunata pishtarkur manakaqlapaqmi juk dioskunapaq sacrificiukunata altarkunacho ruparkaykätsin. Tsaymi altarninkunata lapanta talamar ushashaq. Perqashqan rumikunapis chakrachömi mashtaranqa».

12Unay ayluntsi Jacobqa Aram partimanmi qeshpir aywakurqan. Tsaychömi uyshata mitsipakuypa warmita ashirqan.

13Tsaypita unaytanami Israel runakunata Egiptupita juk profëtawan Tayta Dios jorqamurqan. Tsay profëtawanmi paykunata cuidatsirqan.

14Tsayno kaykaptinpis qamkunaqa Tayta Diosta pasaypami rabyanaykätsinki. Pasaypa jutsayuq kapäkushqaykipitami Tayta Dios castigashunkipaq. Castigashqa kanaykipaqqa kikikikunami jutsayuq karkaykanki.

← Chapter 11 Jump to: Chapter 13 →