Hosea 14

Quechuan (Tayta Diospa Wilakuynin) 2003

← Chapter 13 Jump to:

1Israel runakuna, jutsa rurashqaykipitami castïguman chayapäkushqanki. Tsayno kaykarqa kuyashuqniki Tayta Diosman kutikäriy.

2Tayta Diosta kayno nir manakäriy: «Lapan jutsäkunata perdonaykalämay, Tayta. Kuyapämar chaskiykalämay. Alabashqäkunami qampaq ofrenda kanqa.

3Asiria runakunaqa manami salvapäkamantsu. Ni paykunapa cawallukunata muntakurkur pelyarpis manami vincipäkushaqtsu. Runa rurashqankunataqa manami «Diosnïmi kanki» nir adorashaqnatsu. Qamman yärakamuptinmi waktsakunatapis kuyapanki».

4Tayta Diosmi kayno nin: «Rabyashqa kaykashqä pasaptinmi imaypis cäsukamänaykipaq yanapashayki. Jutsata rurashqaykipitapis perdonashaykimi.

5Bendicionnïta churamur shulyanömi qamkunapaq kashaq. Qamkunanami liriu wayta kuyaylapaq tuktushqannömi kankipaq. Líbanucho jatusaq cedru yöra shumaq sapitsashqanömi kapäkunkipaq.

6Olïvu yörakunapa rämankuna palqar mashtakashqannömi qamkunapis atskaman mirapäkunkipaq. Líbano munticho cedru ali asyaptin kushikuypaq kashqannömi qamkunapis kushikuypaq kankipaq.

7Qamkunaqa yapaymi noqapa makïcho kawankipaq. Trïgu shikshiraykaqno y üva tsintsimuqnömi kankipaq. Líbanucho wayuq üvapita vïnu ali kashqanta maytsaychöpis parlashqannömi qamkunapaqpis ali kawashqaykita maytsaychöpis parlapäkunqa.

8Noqami qamkunata imapitapis tsapaykä. Noqami copösu pïnu yörano lantupaykä. Noqami lapanchöpis yanapaykä. Tsayta tantiyarmi kayno ninkipaq: «¡Ïdulukunaqa manami imapaqpis välintsu!» »

9Yachaqkuna y yarpaysapakuna kay wilakuyta tantiyakäritsun. Tayta Diospa näninqa derëchumi. Ali runakunaqa tsaypa purir manami tunintsu. Jutsasapakunami itsanqa tsay nänipa aywar ishkipäkunqa.

← Chapter 13 Jump to: