1 John 1

Quechuan QXO (Biblia en Quechua del sur de Conchucos)

Jump to: Chapter 2 →

1Qamkunamanmi Kawatsikuq Palabra imanö kanqanta qellqamü. Payqa imapis manarä kaptinmi karqanna. Paytam rikayarqü, yatayarqü y wiyayarqü.

2Tsay Kawatsikuqta Tayta Dios mandamuptinmi payta rikayarqä. Tsaymi qamkunata willayä mana ushakaq kawayta qaramaqnintsik kanqanta. Paymi Tayta Dioswan kaykanqanpita noqantsikman shamushqa.

3Rikayanqäta y wiyayanqätam qamkunata musyatsiyä. Tsaynöpam Tayta Diospa y Tsurin Jesucristupa puntanchö kawayanqänö qamkunapis paypa puntanchö kawayanki.

4Tsaykunatam qellqamü kushishqa kawanantsikpä.

5Jesucristo yachatsiyämanqallantam willayä: Tayta Diosqa aktsim. Paychöqa manam ima tsakaypis kantsu.

6Tsaymi mayqantsikpis «Tayta Dios munanqannömi kawaykä» nikar tsakäpakushqanö purirqa llullakuykantsik. Tsaynö kawarqa manam rasunpatsu Tayta Dios munanqannö kawaykantsik.

7Tayta Dios atsikyaychö kanqannö noqantsikpis atsikyaychö kawarmi juknintsik juknintsik kuyanakuntsik. Tsaynöllam Tsurin Jesucristo yawarninwan llapan jutsantsikta mayllamantsik.

8Mayqantsikpis «jutsaynaqmi kä» nirqa manam rasun kaqtatsu parlaykantsik, sinöqa llullakuykantsikmi.

9Jutsa ruranqantsikpita confesakushqam sïqa promitimanqantsikta cumplir Tayta Dios perdonamäshun. Payqa alli ruraq karmi llapan jutsantsikta mayllamäshun.

10«Noqaqa jutsaynaqmi kä» nirqa pay ninqankunata manakaqmanmi churaykantsik. Tsaynö karqa manarämi willakuyninta chaskikurquntsikrätsu.

Jump to: Chapter 2 →