1 John 5

Quechuan QXO (Biblia en Quechua del sur de Conchucos)

← Chapter 4 Jump to:

1Jesús salvamaqnintsik Cristo kanqanta criyiqkunam llapanpis Tayta Diospa wamran kayan. Tayta Diosta kuyarqa wamrankunatapis kuyantsikmi.

2Wamrankunata kuyanqantsikta musyantsik Tayta Diosta kuyar mandamientunkunata cumplirmi.

3Tayta Diosta kuyarqa mandamientunkunatam cumplintsik. Mandamientunkunata cumpliyqa manam ajatsu.

4Tsaynö kaykan Tayta Diospa wamrankuna Satanásta vincishqa kaptinmi. Tayta Diosman yärakurmi payta vincintsik.

5¿Pitä Satanásta vincin? Jesucristo Tayta Diospa Tsurin kanqanta criyiqkunallam.

6Jesucristo Diospa Tsurin kanqanta musyantsik bautizakunqan höra wamran kanqanta Tayta Dios nimushqa kaptinmi y yawarninta jichar wanushqa kaptinmi. Manam bautizakuptin Tayta Dios nimushqa kaptillantsu musyantsik, sinöqa yawarninta jichar wanushqa kaptinmi. Tsaynöllam Diospa Tsurin kanqanta musyantsik Espíritu Santu tantiyatsimashqa. Espíritu Santu tantiyatsimanqantsikqa rasun kaqllam kaykan.

7Jesucristo Diospa Tsurin kanqanta [ciëluchö kaykaq] kimsa testïgukunam musyatsimantsik. [Tsay testïgukunam kaykäyan Tayta Dios, Tsurin Jesucristo y Espíritu Santu. Paykuna kimsaq karpis jukllayllam kaykan.

8Tsaynöllam kay patsachöpis kimsa testïgukuna musyatsimantsik.] Tsay testïgukunam kayan Espíritu Santu, Jesucristo bautizakunqan y wanur yawarninta jichanqan. Tsay kimsa testïgukuna tsayllatam musyatsimantsik.

9Runa willamanqantsikta criyiykarqa Tayta Dios nimanqantsikman masrä criyishun. Tsurin Jesucristupita Tayta Dios nimanqantsikqa masmi välin runakuna willamanqantsikpitapis.

10Jesucristo Diospa Tsurin kanqanta criyiq kaqmi Tayta Dios tantiyatsinqanta criyin. Peru Jesucristo Diospa Tsurin kanqanta mana criyiq kaqmi sïqa Tayta Dios tantiyatsinqantapis criyintsu. Mana criyirmi Tayta Diosta manakaqman churan.

11Mana ushakaq kawayta qaramanqantsiktam Tayta Dios tantiyatsimarquntsik. Tsay kawaytaqa tarintsik Tsurin Jesucristuman criyikurmi.

12Tayta Diospa Tsurinman criyiq kaqqa mana ushakaq kawaytam tarin. Peru mana criyiq kaqmi sïqa tsay kawayta tarinqatsu.

13Tayta Diospa Tsurinman yärakuyaptikim kay cartata apatsimü mana ushakaq kawayta tariyanqaykita musyayänaykipä.

14Tayta Dios munanqannö kananpä imatapis mañakushqaqa wiyamanqantsiktam musyantsik.

15Wiyamanqantsikta musyarmi mañakunqantsiknö yanapamänantsikpä kanqantapis musyantsik.

16Wawqikuna y panikuna jutsa ruranqanta mayqaykipis musyarqa paykunapä Tayta Diosta mañakuyay. Perdonananpä kaq jutsa kaptinqa Tayta Diosmi perdonanqa. Mana perdonananpä kaq jutsa kaptinqa Tayta Diosta ama mañakuyaytsu.

17Mana alli rurayqa llapanpis jutsallam. Tsaynö kaptinpis Tayta Dios mana perdonananpä kaq jutsa kaykanmi.

18Musyantsikmi Tayta Diospa wamran kar jutsata mana rurar kawanqantsikta. Tsaynöllam Tayta Diospa Tsurin Jesucristo Satanáspita tsapämantsik.

19Musyantsikmi Tayta Diospa wamranna kanqantsikta. Tsaynömi musyantsik llapan kay patsa Satanáspa poderninchö kanqanta.

20Musyantsikmi Tayta Diospa Tsurin Jesucristo kay patsaman shamur Tayta Diosta reqinantsikpä tantiyatsimanqantsikta. Tsaymi Tayta Diospa y Tsurin Jesucristupa poderninchö kawaykantsik. Jesucristuqa kikin Diosmi. Paymi mana ushakaq kawayta qaramantsik.

21Kuyay wamräkuna, ima ïdulukunamanpis ama yärakuyaytsu. [Amén.]

← Chapter 4 Jump to: