1 Thessalonians 1

Quechuan QXO (Biblia en Quechua del sur de Conchucos)

Jump to: Chapter 2 →

1Tesalónica markachö kaykaq criyikuq mayikuna: Noqa Pablo, wawqintsik Silvano y Timoteum kay cartata cartakayämü. Qamkunaqa Papänintsik Tayta Diospa y Señor Jesucristupa poderninchömi kaykäyanki. Tayta Dios [y Señor Jesucristo] kuyapäyäshurniki alli kawayänaykipä yanapaykuyälläshuy.

2Qamkunapä Tayta Diosta mañakurmi imaypis agradëcikuyä

3payman criyikur allillata rurayanqaykipita, pïmaywanpis kuyanakuyanqaykipita y imanö ñakarpis Señornintsik Jesucristo kutimunanta shuyaraykäyanqaykipita.

4Wawqikuna y panikuna, musyayämi Tayta Dios kuyar akrayäshunqaykita.

5Tsayta musyayä alli willakuyninta Espíritu Santupa poderninwan willakuptï criyikuyaptikim. Qamkunapis musyayankim kuyayanqäta y Tayta Dios munanqannö kawayanqäta.

6Noqakunapa conträ y Señor Jesucristupa contran shäriyanqannömi qamkunapapis contraykikuna shäriyan. Pasaypa ñakarpis Espíritu Santu yanapayäshuptikim Jesucristupa willakuyninta kushishqa wiyakuyanki.

7Tsayta musyarmi Macedonia y Acaya provinciakunachö llapan wawqikuna y panikuna tantiyakuyan qamkunanö cäsukuyänanpä.

8Qamkuna kaqpita aywarmi Señor Jesucristupa willakuyninta Macedonia y Acaya provinciakunapa päsar maytsaychöpis willakuyan. Willakuyninta willakuyanqannöllam shumaq criyikuyanqaykitapis willakuyan. Tsaymi maypa chäyaptïpis parlayan Tayta Diosman criyikuyanqaykita. Mana willayaptïpis

9maytsaychömi musyaykäyan shumaq criyikuyanqaykita y ïdulukunata adorayänaykipa rantin imayyaqpis kawaq Tayta Diostana adorayanqaykita. Payqa rasunpa kaq Diosmi.

10Tsaynöllam musyayan Tayta Diospa Tsurin Jesucristo gloriapita kutimunanpä kanqanta shuyaykäyanqaykita. Paytam Tayta Dios wanunqanpita kawatsimushqa. Paymi juiciu final junaqchö castïgupita salvamäshun.

Jump to: Chapter 2 →