Ephesians 2

Quechuan QXO (Biblia en Quechua del sur de Conchucos)

← Chapter 1 Jump to: Chapter 3 →

1Ñöpataqa qamkuna jutsa rurayllachö karmi imayka wanushqanö kayarquyki.

2Wakin runakunanöllam Tayta Diosta mana cäsur Satanáspa poderninchö kawayarquyki.

3Tsaynöllam noqantsikpis mana allikunata munapar y mana allikunapä yarpar kawarquntsik. Tsaynö kawanqantsikpitam wakin runakunatanö Tayta Dios castigamänantsikpä karqan.

4Tsaynö kaykashqapis Tayta Dios kuyapäkuq karmi pasaypa kuyamarquntsik.

5Tsaymi jutsa ruraychö imayka wanushqanö kaykashqapis Jesucristuta wanunqanpita kawatsimur noqantsiktapis wanushqanö kanqantsikpita kawatsimarquntsik. Kuyapäkuq kayninwanmi salvamarquntsik.

6Jesucristuwan kawatsimanqantsiknömi gloriachö paywan jamatsimarquntsik.

7Tsaynöpam Jesucristuchö kashqa pasaypa kuyapämanqantsikta shamuq watakunachö pïmaypis tantiyayanqa.

8Tayta Dios kuyapäkuq karmi Jesucristuman yärakushqa salvacionta qaramarquntsik. Manam kikintsikpitatsu ni allita ruranqantsikpitatsu salvacionta tarirquntsik, sinöqa Tayta Diospitam. Tsaymi ni pipis alabakur ninqatsu: «Allita ruranqäpitam Tayta Dios salvamashqa».

10Jesucristuchö kashqam allikunata rurar kawanantsikpä mushuq kawayta Tayta Dios qaramarquntsik. Tsaynö kawanantsikpämi unaypitana destinamarquntsik.

11Ñöpata imanö kayanqaykitapis ama qonqayaytsu. Israel runakunaqa señalakushqa karmi señalakunni kayaptiki manakaqman churayäshurqayki.

12Jesucristupa willakuyninta manam musyayarqaykitsu. Israel runa mana kayaptikim Tayta Dios awninqanta chaskiyänaykipä ruranqan pactukunapis qamkunapätsu karqan. Kay patsachö Diosniynaq y oqrakashqam kawayarqayki.

13Tayta Diospita karuchö kashqa karpis Jesucristuchö karnam yawarninta jichanqanpita Tayta Diospa lädunchöna kaykäyanki.

14Jesucristo tsaynö salvayäshurquyki alli kawayta qaramaqnintsik karmi. Mana rikanakunanpä tsaparaq pirqata juchutsiqnömi Israel runa o mana Israel runa kaptintsikpis juk castanölla kanantsikpä qorimarquntsik.

15Tsaynö qorimarquntsik Israel runakunapa leyninkunata, mandamientukunata y reglamentukunata anularmi. Jesucristuchö mushuq runa kanantsikpämi Israel runakunatapis y mana Israel runakunatapis qorimarquntsik.

16Cruzchö wanurmi Tayta Dioswan amishtatsimarquntsik mana chikinakur allina kawanantsikpä.

17Kay patsaman Jesucristo shamurmi Tayta Diospa poderninchö alli kawanantsikpä willakuyta willakurqan. Tsay willakuyqa Tayta Diospita karuchö kaykaq mana Israel runakunapä y paypa puntanchö kaykaq Israel runakunapämi.

18Tsaymi Israel runa y mana Israel runa kashqapis Tayta Diosta imay hörapis mañakunantsikpä Jesucristo raykur Espíritu Santu yanapamantsik.

19Tsaynö kaptinmi qamkunaqa mana Israel runakuna karpis jäpanatsu kaykäyanki, sinöqa Tayta Diospa wamrankunana karmi llapan salvashqa kaqkunawan tsay castallana kaykäyanki.

20Alli cimientushqa wayinömi kaykäyanki. Tsay wayipa cimientunqa apostolkuna y profëtakuna yachatsiyanqankunam. Jesucristunam wayipa esquïnanchö mas allinnin kaq rumi kaykan.

21Jesucristuman yärakushqam rumita shumaq pirqaqnö noqantsiktapis churaykämantsik Tayta Diospa sagrädu templun kanantsikpä.

22Qamkunapis Jesucristuman yärakurmi templu pirqaraykaq ruminö kaykäyanki. Tsay templuchömi Tayta Diospa Espïritun taykan.

← Chapter 1 Jump to: Chapter 3 →