Ephesians 5

Quechuan QXO (Biblia en Quechua del sur de Conchucos)

← Chapter 4 Jump to: Chapter 6 →

1Tayta Diospa kuyay wamrankuna kaykarqa pay jutsaynaq kanqannö qamkunapis jutsaynaq kayay.

2Jesucristo kuyakuq kanqannö qamkunapis kuyakuq kayay. Kuyakuq karmi noqantsik raykur wanur Tayta Diospä mushkuq sacrificiunö kashqa.

3Tayta Dios kuyanqan santu runakuna kaykarqa fornicación jutsata ama rurayaytsu, imapäpis ama mallaqashqa kayaytsu, ni ima jutsatapis ama rurayaytsu. Tsaykunapäqa parlayllapis ama parlayaytsu.

4Llutankunata, manakaqkunata ni llutan yarpayman apaq brömakunatapis ama parlayaytsu. Tsaypa rantinqa Tayta Diosta imaykapitapis agradëcikuyay.

5Shumaq tantiyakuyay: fornicación jutsata ruraqkuna y ambiciösu kaqkunaqa Tayta Diospa y Jesucristupa mandakuyninman manam yaykuyanqatsu. (Ambiciösu kaqkunaqa ïduluta adoraqnömi kaykäyan.)

6Mana cäsukur jutsa ruraqkunataqa Tayta Diosmi rabyar castiganqa. Tsaynö kaykaptinqa jutsata rurayänaykipä pipis parlapäyäshuptiki ama cäsuyankitsu.

7Wakin runakuna jutsata rurayaptinpis qamkunaqa ama rurayankitsu.

8Ñöpataqa qamkunapis jutsata rurarmi tsakaychö kaykaqnö kawayarqayki. Kananmi sïqa Jesucristuta chaskikur atsikyaqchöna kawaykäyanki. Tsaynö kaykarqa Tayta Dios munanqannöna qoyay qoyay kawayay.

9Atsikyaqchöna kawarmi kuyapäkuq kayanki, allillatana rurayanki y rasun kaqllatana parlayanki.

10Tayta Dios munanqannö kawayänaykipä imaypis yarpachakuyay.

11Tayta Diosta mana cäsuq runakuna llutankunata rurayaptinpis qamkunaqa ama rurayaytsu. Tsaypa rantinqa llutan ruraykunata dëjayänanpä tantiyatsiyanki.

12Paykuna pakayllapa jutsata rurayanqanqa pasaypa penqakuypämi. Tsaykunataqa ama parlayaytsu.

13Atsikyaptin ima kanqanpis rikakanqannömi paykuna jutsata rurayanqanpis musyakanqa.

14Jutsa ruraqkuna tantiyayänanpämi juk parlapis nin: «Punuy siki, rikchay. Wanushqa kanqaykipita kawamuy. Jesucristum aktsipaykäshunki».

15Tsaynö kaykaptinqa imanö kawayanqaykitapis tantiyakuyay. Mana tantiyakuq runanö kawayänaykipa rantinqa yachaq runanö kawayay.

16Runakuna mana allita rurar kawayaptinpis qamkunaqa allikunallata imaypis rurayay.

17Mana tantiyakuq runanöqa ama kawayaytsu. Tsaypa rantinqa Señornintsik munanqannö kawayänaykipä shumaq tantiyakuyay.

18Ama upyayaytsu. Machashqa runaqa llutankunatam ruran. Tsaypa rantinqa Espíritu Santupa poderninchö kawayay.

19Salmukunata, cantukunata y cörukunata cantar llapan shonquykikunawan Tayta Diosta alabayay.

20Ima kaptinpis Señornintsik Jesucristupa jutinchö Tayta Diosta agradëcikuyay.

21Jesucristupita mantsapakur juknintsik juknintsikpis respitanakur kawashun.

22Warmikuna, Señor Jesucristuta cäsuyanqaykinölla runaykikunatapis cäsuyay.

23Warmiqa runanpa poderninchömi kaykan. Tsaynöllam iglesiapis Jesucristupa poderninchö kaykan. Iglesianam paypa cuerpun y paymi iglesiapa salvaqnin.

24Tsaynö kaykaptinqa Jesucristuta iglesian cäsunqannö warmipis runanta imaykachöpis cäsutsun.

25Runakuna, iglesiata Jesucristo kuyanqannö warmikikunata kuyayay. Iglesiata kuyarmi wanuymanpis Jesucristo charqan.

26Tsaynö wanurqan payman yärakuqkuna Tayta Diospa palabranwan mayllashqa kar santu kayänanpämi.

27Tsaymi kikinpa puntanman pushanqa atsikyaypa atsikyaykaqta, jutsaynaqta, santuta y pay munanqannö kaykäyaqta.

28Pipis warminta kuyarqa kikinpa cuerpuntapis kuyanmi. Tsaymi cuerpunta kuyanqannölla warmintapis kuyanman.

29Manam pipis cuerpunta maltratantsu, sinöqa alimentarmi cuidan. Tsaynöllam Jesucristupis iglesianta cuidan.

30Noqantsikmi Jesucristupa cuerpun, [aytsan y tullun] kaykantsik.

31Tayta Diospa palabranmi nin: «Mamanpita y papäninpitam runa yarqukun warminwan mana rakikaypa täkunanpä. Tsaynö täkurnam ishkanpis jukllayllanö kayanqa».

32Tsay qellqashqa kaqchömi Jesucristuwan jukllayllanö kanqantsikta tantiyatsimantsik. Tsaynö tantiyatsimanqantsikqa pasaypa kushikuypämi.

33Tsaymi yapaypis nï: Cuerpuykikunata kuyayanqaykinölla warmikikunatapis kuyayay. Warmikunapis runankunata respitayätsun.

← Chapter 4 Jump to: Chapter 6 →