Haggai 1

Quechuan QXO (Biblia en Quechua del sur de Conchucos)

Jump to: Chapter 2 →

1Tayta Diospa willakuyninta profëta Hageo willakunqanmi kaychö qellqashqa kaykan. Paymi rey Darío Persia nacionchö mandar ishkay watamanna aywaykaptin joqta kaq killa punta kaq junaqchö willakurqan. Tsay willakunqan Judápa gobernadornin Zorobabelpä y mandaq sacerdöti Josuépämi karqan. Zorobabelqa Salatielpa tsurinmi karqan. Josuénam Josadacpa tsurin karqan.

2Llapanta mandaq Tayta Diosmi Israel runakunata nin: «Qamkunam niyanki: «Tayta Diospa templunta yapay shäritsinantsikpä manarämi tiempu chämunrätsu».

3Tsaymi Tayta Diospa willakuyninta profëta Hageo willakur nirqan:

4«¿Templü juchushqa kaykaqta rikaykarku qamkuna kuyayllapä wayikikunachö kushishqa taykäyanki?»

5Llapanta mandaq Tayta Diosmi nin: «Imanö kawayanqaykitapis shumaq tantiyakuyay.

6Atskata mururpis wallkallatam cosechayanki. Atskata mikurpis manam pachaykikuna juntantsu. Yakuta upuyaptikipis yakunaynikikuna manam pärantsu. Rakta röpata jatikuyaptikipis manam qoñütsiyäshunkitsu. Arupakur gänanqaykipis manam aypantsu».

7Llapanta mandaq Tayta Diosmi nin: «Imanö kawayanqaykitapis shumaq tantiyakuyay.

8Templuta yapay shäritsiyänaykipä muntikunapa aywar qeruta apayämuy. Templüta shäritsiyaptikim kushikushä. Tsaychömi kushishqa alabayämanki.

9«Qamkuna atskata cosechayta yarparpis wallkallatam qoriyanki. Wayikikunaman churakuyanqaykitapis juk pükayllam ushakätsï. Imanir tsaynö ruranqätapis tantiyakuyay. Tsaynö rurä templü juchutsishqa kaykaqta rikaykarpis kikikikunapa wayillaykikunapä yarpachakuyaptikim.

10Tsaynö kayaptikim tamyatsimütsu. Tsaymi chakraykikunachö muruyanqaykipis wayunnatsu.

11Pasaypa usya kananpä noqam permitirqü. Tsaymi trïgupis, üvapis, olïvuspis, ni imayka mikuypis wayunnatsu. Ashmakunapäpis manam qewa kannatsu. Runakunapis manakaqllapämi aruyan».

12Profëta Hageo willakunqanta wiyarmi Salatielpa tsurin Zorobabel, Josadacpa tsurin mandaq sacerdöti Josué y llapan runakuna pasaypa mantsarir Tayta Dios ninqanta wiyakuyarqan.

13Tsaymi profëta Hageuwan willakatsir Judá runakunata Tayta Dios nirqan: «Noqaqa yanapanäpä qamkunawanmi kaykä».

14Tsaynö nirmi Tayta Dios animatsirqan aruyänanpä. Tsaymi Judápa gobernadornin Zorobabel, mandaq sacerdöti Josué y wakin runakunapis llapanta mandaq Tayta Diospa templunta shäritsir qallaykuyarqan.

15Arur qallaykuyarqan joqta kaq killa ishkay chunka chusku (24) junaqchömi. Tsayqa karqan rey Darío ishkay wata mandakuq kaykaptinmi.

Jump to: Chapter 2 →