Haggai 2

Quechuan QXO (Biblia en Quechua del sur de Conchucos)

← Chapter 1 Jump to:

1Tsay watallachömi qanchis killa ishkay chunka juk (21) junaqchö profëta Hageuta Tayta Dios nirqan:

2«Judápa gobernadornin Zorobabelta, mandaq sacerdöti Josuéta y wakin runakunatapis niy:

3«Punta kaq templuta rikaqkuna musyayanmi kuyayllapä kanqanta. Kananqa ¿imanötä kaykan? ¿Manaku manakaqman churashqa kaykan?»

4«Tayta Diosmi nin: «¡Zorobabel, valuray! Mandaq sacerdöti Josué, ¡qampis valuray! Kay nacionchö täraqkuna, ¡llapayki valurayay! Qamkunawan kaykaptïqa mas valuratsinakur llapayki aruyay.

5Unay castaykikuna Egiptupita yarqayämuptin imaypis yanapanäpämi paykunawan pactuta rurarqä. Tsaymi qamkunawanpis Espïritü kaykan. Tsaynö qamkunawan kaykaptïqa ama mantsariyaytsu.

6«Ichikllanam faltaykan ciëlutapis, kay patsatapis, lamartapis tsuktsukyätsinäpä.

7Tsaynöllam llapan nacionkunatapis tsuktsukyätsishä. Tsaynö ruraptïmi imayka riquëzankunatapis kay templuman apayämunqa. Tsaynöpam kay templuchö kuyayllapä kaqkunapis junta kanqa. Noqa llapanta mandaq Tayta Diosmi tsaynö nï.

8«Noqapam qellaypis, qoripis kaykan.

9Kanan shäriykätsiyanqayki templuqa punta kaq templupitapis mas kuyayllapämi kanqa. Tsaymi kaychö llapaykikunapis tranquïluna kawayanki. Noqa llapanta mandaq Tayta Diosmi tsaynö nï».

10Ishkay wata rey Darío mandakuq kaykaptinmi isqun killa ishkay chunka chusku (24) junaqchö profëta Hageo Tayta Diospa willakuyninta willakur nirqan:

11«Llapanta mandaq Tayta Diosmi nin: «Leynïkunapita sacerdötikunata tapur ninki:

12«Pipis sacrificiuta rupatsinanpä sagrädu aytsata röpanwan pitushqa apaptin tsay röpanpa kuchun vïnuta o aceitita o ima mikuytapis töpaptin ¿tsay vïnu, aceiti o ima mikuypis sagrädutsurä kanqa?» Tsaynö tapuptinmi sacerdötikuna «manam» niyarqan.

13Tsaymi Hageo yapay tapur nirqan: «Juk runa ayata yatanqanpita impüru kaykar mikuykunata yataptin ¿tsay mikuykunapis impürutsurä kanqa?» Tsaynö tapuptinmi sacerdötikuna niyarqan: «Awmi, tsayqa impürum kanqa».

14Tsaymi Hageo nirqan: «Tayta Diosmi nin: «Tsaynömi kay runakunapis impüru kaykäyan. Tsaymi llapan rurayanqankuna y noqapä apayämunqanpis impüru kaykan.

15«Templüta manarä shäritsiyta qallar ima päsayäshunqaykitapis shumaq tantiyakuyay.

16Ishkay chunka (20) säcu mikuyta qoriyänaykipä mururpis cosëchachöqa chunka säcullatam qoriyarquyki. Pitsqa chunka (50) uyllu vïnuta jipiyta yarparpis ishkay chunka (20) uyllutam jipiyarquyki.

17Usyawan, ranchawan y runtu tamyawanmi llapan murukuyanqaykitapis ushakätsirqü. Tsaynö ruraykaptïpis qamkunaqa manam templüta shäritsiyarquykitsu.

18«Kanan kaykantsik isqun killa ishkay chunka chusku (24) junaqchömi. Kanan junaqmi templupa cimientunkunata allitsar qallaykuyarquyki.

19Tsaymi kananpita bendicionnïta llapan aruyanqaykiman churamushä. Tsaynö churamuptïmi tröjaykikunachö mikuynikikunapis ushakanqatsu y üvaykikuna, hïgusnikikuna, granadïllaykikuna y olïvusnikikunapis shumaq wayunqa».

20Tsay junaqllam Hageuta Tayta Dios yapay nirqan:

21«Judápa gobernadornin Zorobabelta willay ciëluta y kay patsatapis tsuktsukyätsimunäpä kanqanta.

22Reykunatam penqakuyman churashä. Munayyuq nacionkunatapis vincishqa kayänanpämi permitishä. Guërra carrëtankunatapis manijaqnintintam ushakätsishä. Caballun muntashqa aywaqkunatapis kikinkunapura wanutsinakuyänanpämi permitishä.

23Salatielpa tsurin sirvimaqnï Zorobabel, tsay junaqmi sëllakunä sortïjänö kanaykipä churashayki. Tsaynö kanaykipämi qamta akrarqü. Noqa llapanta mandaq Tayta Diosmi tsaynö nï».

← Chapter 1 Jump to: