Titus 1

Quechuan QXO (Biblia en Quechua del sur de Conchucos)

Jump to: Chapter 2 →

1Noqa Pablum, Tayta Diospa sirviqnin y Jesucristupa apostolnin kar, Tayta Dios akranqan kaqkunata willakuyninta yachaykätsï Jesucristuman criyikur pay munanqannö kawayänanpä.

2Tayta Dios kay patsata manarä kamar awninqannöllam pay akranqan kaqkuna gloriachö imayyaqpis kawayanqa. Tayta Diosqa manam llullakuntsu, sinöqa awninqanta imaypis cumplinmi.

3Tiempu chämuptinnam willakuyninta willakuyaptin salvamaqnintsik Tayta Dios awninqanta cumplin. Tsaynö cumplirmi noqatapis willakunäpä churamashqa.

4Tito, noqa yärakunqänö Jesucristuman yärakurmi kuyay tsurïnö kanki. Papänintsik Tayta Dios y salvamaqnintsik Jesucristo kuyapäshurniki alli kawanaykipä yanapaykulläshuy.

5Creta islachö jaqimurmi qamta nirqä problëmakunata arreglanaykipä. Tsaynöllam nirqä marka marka aywar wawqikuna y panikuna qorikäyanqanchö mayor wawqikunata churanaykipä.

6Mayor wawqi kananpäqa pïmaypitapis respitashqa y juk warmiyuqllam kayanman. Tayta Diosman criyikurmi tsurinkunapis allillata rurar papäninta y mamanta cäsuyanman.

7Tayta Diosta sirviq kaykarqa y wawqikunata panikunata cuidaq kaykarqa mayor wawqikuna kayätsun pïmaypitapis mana despreciashqa, mana runa tukuq, imallapitapis mana rabyakuq, mana machaq, mana pelyaq y imatapis mana chaskipakuq.

8Tsaypa rantinqa kayätsun patsatsikuq, allillata ruraq, alli yarpayyuq, Tayta Dios munanqannö kawaq y llutankunata mana ruraq.

9Jesucristupa willakuyninta yachakuyanqannölla alli yachatsiq kayätsun. Tsaynöpam Tayta Dios munanqannö kawayänanpä wawqikunata y panikunata animatsiyanqa y llutan yachatsikuqkunatapis llutankunata mana yachatsiyänanpä shumaq tantiyatsiyanqa.

10Atskaqmi llutan yachatsikuqkuna wawqikunata y panikunata engañar puriykäyan. Paykunaqa mana tantiyarmi Israel runakunanö cuerpunta señalakuyänanpä yachaykätsiyan.

11Wakin wawqikunata y panikunatam llapan castankunatawan engañayashqa. Paykunaqa imatapis sakyayänan raykurmi llutankunata yachaykätsiyan. Tsaynö llutanta yachatsiyänanta ama dëjaytsu.

12Juk Creta runam marka mayinkunapä qellqar nirqan: «Creta runakunaqa llulla, mana alli ashmanö, mallaqashqa y qelam kayan».

13Rasun kaqtam tsay runa qellqarqan. Tsaymi llutan yachatsikuqkunata shumaq tantiyatsinki Tayta Dios munanqannö kawayänanpä.

14Tsaynölla tantiyatsinki Israel runakuna llutan yachatsiyanqankunata mana cäsuyänanpä. Llutan yachatsikuqkunaqa Tayta Diospa palabranta mana cäsurmi yarpayllankunapita yachaykätsiyan.

15Llutan yarpaq y mana cäsukuq karmi imapis mana alli kanqanta yarpäyan. Peru Jesucristupa willakuyninman yärakuqkunam sïqa Tayta Dios kamanqankuna llapanpis alli kanqanta tantiyakuyan.

16Tsay llutan yachatsikuqkunam niyan: «Noqakunaqa Tayta Dios munanqannömi kawayä». Tsaynö niyaptinpis llutankunata rurar kawayanqanta rikarmi runakuna tantiyayan Tayta Diosta mana cäsuyanqanta. Paykunaqa Tayta Diosta mana cäsurmi runa mayinta chikirnin imatapis allitaqa rurayantsu.

Jump to: Chapter 2 →