Titus 2

Quechuan QXO (Biblia en Quechua del sur de Conchucos)

← Chapter 1 Jump to: Chapter 3 →

1Peru qamqa Jesucristupa willakuynin ninqannölla wawqikunata y panikunata yachatsiy.

2Ruku kaqkunata yachatsinki llutankunata mana rurayänanpä, pïmaypitapis respitashqa kayänanpä y shumaq yarpachakuskir imatapis rurayänanpä. Tsaynölla yachatsinki Tayta Diosman llapan shonqunkunawan criyikuyänanpä, kuyapäkuq kayänanpä y imaykapitapis pacienciakuq kayänanpä.

3Chakwankunatapis yachatsinki Tayta Dios munanqannö shumaq kawayänanpä, pitapis mana tumpayänanpä y mana machar kayänanpä. Tsaypa rantinqa wakintapis alli kawayänanpä yachatsiyätsun.

4Tsayrä churakashqa jipashkunata yachatsiyätsun runanta y wamrankunata kuyayänanpä.

5Tsaynölla yachatsiyätsun shumaq yarpachakuskir imatapis rurayänanpä, runanta jukwan mana engañayänanpä, wayinchö rurayninkunata shumaq rurayänanpä, kuyapäkuq kayänanpä y runanta cäsuyänanpä. Tsaynö alli kawaqta rikarmi Tayta Diospa palabranta pipis penqakuyman churanqatsu.

6Tsaynölla jövinkunatapis tantiyatsinki shumaq yarpachakuskir allillata rurayänanpä.

7Rikayäshunaykipä kikikipis alli kaway. Pitapis yachatsirqa Tayta Diospa willakuynin ninqallanta yachatsiyanki.

8Pipis mana rimashunaykipä rasun kaqllata yachatsinki. Tsaynö alli yachatsiptikiqa contrantsik kaqkuna penqakur manam wasantsikta rimayanqatsu.

9Esclävukunatapis yachatsinki patronninta cäsuyänanpä y mandanqantapis kushishqa rurayänanpä. Tsaynölla yachatsinki mana aynikuyänanpä

10y patronninpa imantapis mana suwapuyänanpä. Tsaypa rantinqa patronnin yärakunanpä allillata rurayätsun. Jesucristuman criyikuq esclävukuna alli kawaqta rikarmi runakuna tantiyayanqa salvamaqnintsik Tayta Diospa willakuynin alli kanqanta.

11Llapan runakunata salvananpämi Tayta Dios kuyamarnintsik Jesucristuta mandamurqan.

12Paymi yachatsimantsik kikintsik munanqantsiknö kawanantsikpa rantin jutsa ruraykunata dëjaskir pay munanqannö allita rurar kawanantsikpä.

13Tsaynö kawarmi salvamaqnintsik Jesucristo kutimunqanyaq alistakushqa shuyaraykäshun. Paymi poderösu Diosnintsik kar llapan runakuna rikay chipipirrä kutimunqa.

14Jutsa ruraypita jipimänantsikpämi wanurqan. Perdonamarnintsikmi qorimarquntsik kuyanqan runakuna kanantsikpä y llapan shonquntsikwan imatapis allillata ruranantsikpä.

15Wawqi Tito, kay yachatsinqäkunata pitapis mana mantsaypa yachatsinki, animatsinki y tantiyatsinki. Penqakuyman pipis mana churashunaykipä shumaq kawanki.

← Chapter 1 Jump to: Chapter 3 →