Zephaniah 1

Quechuan QXO (Biblia en Quechua del sur de Conchucos)

Jump to: Chapter 2 →

1Kaychömi Tayta Diospa willakuyninta Sofonías willakunqan qellqashqa kaykan. Amónpa tsurin Josías Judá nacionpa mandaqnin rey kaykanqan witsanmi Sofonías willakurqan. Sofoníasqa Cusipa tsurinmi karqan. Cusiqa Gedalíaspa tsurinmi karqan. Gedalíasqa Amaríaspa tsurinmi karqan. Amaríasqa Ezequíaspa tsurinmi karqan.

2Tayta Diosmi nin: «Kay patsachö kaqkunataqa llapantam ushakätsishä.

3Runakunatapis ashmakunatapis llapantam ushakätsishä. Pishqukunatapis lamarchö pescädukunatapis llapantam ushakätsishä. Mana cäsumaq runakunatapis chipyaqmi ushakätsishä. Kay patsachö llapan runakunatam ushakätsishä». Tayta Diosmi tsaynö nin.

4«Judá runakunata y Jerusalénchö täraqkunatam castigashä. Baalta adoraqkunata y ruratsiyanqan ïdulukunatapis llapantam ushakätsishä. Baalta sirviq sacerdötikunatapis llapantam ushakätsishä.

5Wayi jananman yarkurkur ciëluchö kaykaq qoyllurkunata qonquriykur adoraqkunatapis ushakätsishämi. Qonquriykur adoraykämarpis dios Molocta adoraqkunatapis ushakätsishämi.

6Tsaynöllam ushakätsishä mana cäsumaqkunata, mana ashimaqkunata y mana rugamaqkunatapis».

7Tayta Diospa puntanchö llapaykikuna upälla kayay. Juzganan junaq chaykämunnam. Tsay junaqpämi Tayta Dios sacrificiuta alistashqa. Sacrificiuman qayatsinqan runakunapis listunam kaykäyan.

8Tayta Diosmi nin: «Tsay juzganä junaqmi castigashä nación mandakuqkunata, reypa tsurinkunata y jäpa runakunapa costumbrinta qatir mana adoramaqkunata.

9Tsay junaqmi ïdulu adoraqkunata llapanta castigashä. Tsay runakunaqa adorayanqan ïdulukunapa templunman churayänanpämi suwakuypa y asaltaypa imaykatapis qoriyan».

10Tayta Diosmi nin: «Tsay junaqmi chikiqninkuna atacayaptin Pescädu jutiyuq punkupita pasaypa qayaräyanqan wiyakämunqa. Marka lädun barriuchö qayaräyanqanpis wiyakämunqam. Lädun jirkankunachö qayaräyanqanpis pasaypa mantsariypämi wiyakämunqa.

11«Mactes barriuchö täraqkuna, llapayki waqayay. Tsay junaqmi llapan negociantikuna wanuyanqa. Rantikuqkunaqa llapanmi ushakäyanqa.

12Tsay witsanmi chiwchiwan aktsikur Jerusalénchö täraqkunata imanö kawaykäyanqantapis rikashä. Tsaychömi jutsata rurar tranquïlu kaykaq runakunata castigashä. Tsay runakunaqa shonqunkunallachömi niyan: «Tayta Diosqa manam castigantsu. Payqa manam allitapis ni mana allitapis rurantsu».

13Tsaynö nikäyaptinmi chikiqninkuna llapan imaykankunatapis apayanqa. Wayinkunatapis juchutsirmi ushayanqa. Täyänanpä shäritsiyanqan wayikunachöpis manam täyanqatsu. Üvakunata plantarpis vïnunta manam upuyanqatsu».

14Tayta Dios juzganan junaq chämunanpäqa ichikllanam faltaykan. ¡Tsay junaqqa cercachönam kaykan! Tsay junaq pasaypa mantsariypä kaptinmi alli chölu runakunapis qayaräyanqa.

15Tsay junaqmi Tayta Dios pasaypa rabyanqa. Tsaymi runakuna pasaypa llakikur ima ruraytapis puëdiyanqatsu. Qayaraykarmi ushakäyanqa. Pasaypa tsakaymi kanqa. Yana pukutaywanmi mantsariypä tsakaskinqa.

16Tsay junaq alli murallashqa markakunaman y jatusaq törrikunaman amparakuyaptinpis contran runakunam atacayanqa. Atacaptin mantsarirmi cornëtata tukar qayaräyanqa.

17Tayta Diosmi nin: «Runakunata castigaptïmi llakikurnin tsakäpakushqanö puriyanqa. Tsaynö kayanqa mana cäsumar jutsata rurayanqanpitam. Yawarninkunapis patsachömi mashtaranqa. Ayankunapis wanunnörämi mashtaräyanqa».

18Tayta Dios juzganan junaqqa manam qellayninkunapis ni qorinkunapis runakunata salvanqatsu. Paymi pasaypa rabyarnin kay nacionta chipyaq ushakätsinqa. Illaqpitam kay nacionchö täraqkunata llapanta ushakätsinqa.

Jump to: Chapter 2 →