Zephaniah 2

Quechuan QXO (Biblia en Quechua del sur de Conchucos)

← Chapter 1 Jump to: Chapter 3 →

1Penqakuyta mana yachaq Judá runakuna, jutsa rurayta dëjayänaykipä llapaykikuna qorikaykur yarpachakuyay.

2Tayta Dios rabyanqan junaq manarä chämunqanyaq jutsa rurayta dëjayay. Mana dëjayaptikiqa imayka päjata vientu apar ushakätsinqannömi ushakätsiyäshunki.

3Kay patsachö humildi runakuna, Tayta Diosta llapaykikuna ashiyay. Mandamientunkunata cäsuqkuna, mana yachaq tukullar pay munanqannö kawayay. Tsaynö kawayaptikiqa capazchi Tayta Dios rabyanqan junaq salvayäshunkimanpis.

4Gaza markapis tsunyaqmi tikranqa. Ascalón markapis pasaypam ushakanqa. Asdod markachö täraqkunapis junaqpam suwapuyanqa. Ecrón markachö täraqkunatapis matsupita muntita tronqueaqnömi jitariyanqa.

5¡Allaw! ¡Costachö täraq filisteo runakuna, qamkunapis llakipaypämi kayanki! Castigayäshunaykipämi Tayta Dios nin: «¡ Canaánchö täraq filisteo runakuna, chipyaqmi ushakätsiyäshayki!

6Lamar cercanchö chakrakunapis ashmakuna mitsikuyänan pastu chakrakunamanmi tikranqa. Tsaychö üsha kunchakunallam kanqa».

7Kawaykar quëdaq Judá runakunatam sïqa librina kawayänanpä Tayta Dios yanapanqa. Paykunapäna tsay chakrakuna kaptinmi ashmankunata tsaychö mitsikuyanqa. Ascalónchö kaykaq wayikunachömi punuyanqapis.

8Tayta Diosmi nin: «Noqa wiyarqümi Moab nación runakuna y Amón nación runakuna kuyanqä runakunata ashlliyanqanta. Tsaynöllam wiyarqü kuyanqä runakunata manakaqman churayanqanta. Paykunaqa Judá runakunapa chakrankunata qechurmi rïcuyäyashqa».

9Tsaymi Israel runakunata kuyaq y llapanta mandaq Tayta Dios jurar nin: «Sodoma markanömi Moab nacionpis ushakanqa. Gomorra markanömi Amón nacionpis ushakanqa. Chakrankunachöpis kashallam kanqa. Wakin chakrankunapis pasaypam qarayanqa. Desiertunömi imayyaqpis kanqa. Kawaykar quëdaq kuyanqä runakunam paykunapa imaykankunatapis apayanqa. Allinnin kaq chakrankunata qechuskirmi tsaychö täyanqa. Ninqäqa rasunpam kanqa».

10Tsaynö paykunata päsanqa pasaypa runa tukuyanqanpitam. Paykunam llapanta mandaq Tayta Dios kuyanqan runakunata manakaqman churayashqa.

11Kay patsachö adorayanqan llapan dioskunata Tayta Dios ushakätsirmi Moab nación runakunata y Amón nación runakunata pasaypa castiganqa. Tsaymi karu islakunachö täraq runakunapis markankunachö Tayta Diostana adorayanqa.

12«Etiopía runakuna, qamkunatapis espädäwanmi ushakätsishayki».

13Tsaynöllam Tayta Diosqa norti kaq läduman aywar Asiria nacionta ushakätsinqa. Nínive markachö täraq runakunata ushakätsiptinmi pasaypa jäkuq quëdanqa.

14Tsay partiqa ashmata mitsikuyänallanpänam kanqa. Imayka niraq munti ashmakunam tsaychö kayanqa. Tukuwan killikshallanam vïgakunachöpis punuyanqa. Tsaykuna waqanqanpis ventänapam wiyakämunqa. Punkukuna ushakaptinmi cedru tablawan entablayanqanpis alayrina kanqa.

15Tsay markachö täraq runakunaqa ima desgracia päsananpä kanqanta yarpayllapis manam yarpäyantsu. Tsaymi shonqullankunachö niyan: «Noqantsikpita masqa ¿pinatä kanqa?» Tsaynö niyaptinpis markankunata ushakätsiptinmi chucaru ashmakuna täkuyänanpä kanqa. Tsayta rikarmi marka lädunpa päsaqkuna makitapis taqllarrä kushipäyanqa.

← Chapter 1 Jump to: Chapter 3 →