Judges 17

Kiche 1995 (Quiché Bible)

← Chapter 16 Jump to: Chapter 18 →

1Pa tak ri u juyub ri Eprain, jekel wi jun achi, Micaiy u bi',

2ri xuk'alajisaj c'u chuwäch ri u nan, xubij che: “Ri jun mil ruc' jun sient (1,100) sak puak ri xebeläk'ax che la, ri rumal wa' xc'okoj la ri eläk'om, wuc' in c'o wi. In xineläk'an che la; camic c'ut quintzelej che la, xinta' c'ut xbij la chi jachom la pu k'ab ri Ajawaxel rech catak la u banic jun dios ri je'l u banic ri cäch'uk rij ruc' sak puak.” Xutzelej c'u ri sak puak che. Xubij c'u ri u nan: “¡Are ta ri Ajawaxel cattewichinic wal!”

4Aretak xtzeletaj ri puak rumal ri Micaiy che ri u nan, ri u nan xujach quieb sient (200) sak puak che jun ch'ayal sak puak, rech cäban jun dios ri je'l u banic ch'ukum rij ruc' sak puak, ri man xbeytaj ta u banic rumal, ri xujacha' can pa rachoch ri Micaiy.

5Ri Micaiy c'o jun c'olbal re k'ijilanic chupam ri rachoch, xuban jun atz'iak nim u k'ij xukuje' niq'uiaj diosib chic e aj ja jun chque ri e u c'ojol xucoj che cojol tabal tok'ob.

6Chupam c'ut ri k'ijol ri' man c'o ta ajawinel pa Israel, chquijujunal are cäquiban ri cäkaj chquiwäch.

7C'o chupam ri tinimit Belen aj ramak' ri Juda jun ala ri xak cärokxanila' rib chila', aj Levi c'ut.

8We ala ri' xel bic pa Belen, che u tzucuxic jun c'olbal chic ri cajeki' ta wi, cätajin c'u cäbin pa tak ri juyub re Eprain aretak xopan cho rachoch ri Micaiy.

9“¿Jawije' a petic wi?” xcha' ri Micaiy che. “Pa Belen nu petic wi,” xcha' ri ala. “In aj levi cätajin quintzucuj jun c'olbal ri quinjeki' ta wi.”

10“Chatcanaj ba' can wuc',” xcha' ri Micaiy che, “rech catoc che nu cojol tabal tok'ob xukuje' jacha' ta ne che kas nu tat. In quintoj lajuj rakan sak puak chawe che ri jun junab, quinya' c'u awatz'iak, xukuje' ri catijo.”

11Ri aj levi xunimaj xcanaj can cho rachoch ri Micaiy, xux c'u jacha' jun chque ri e u c'ojol.

12Ri Micaiy xucoj ri aj levi che u cojol tabal tok'ob, xjeki' c'u can cho rachoch.

13Are c'u pa u c'u'x ri Micaiy chi kas ta u lak'apum ri u tewichibal ri Dios, rumal rech chi c'o jun aj levi pa ri rachoch ri u cojom che cojol tabal tok'ob.

← Chapter 16 Jump to: Chapter 18 →