Jonah 3

Kirundi (Bibliya Yera 1951, 1967 (Burundi))

← Chapter 2 Jump to: Chapter 4 →

1Maz’ ijambo ry’Uhoraho rija kuri Yona ubugira kabiri, riramubarira,

2riti Va hasi uje i Ninewe, ca gisagara kinini, ukibūrire imbūri nzokubgira.

3Nuko Yona ava hasi aja i Ninewe, nk’ ukw ijambo ry’ Uhoraho rivuze. Kandi Ninewe car’ igisagara kinini c’agahebuza, kugikikuza rwar’ urugendo rw’ imisi itatu.

4Yona atangura kuja mu gisagara agenda urugendo rw’umusi umwe; arasemerera, ati Hasigaye imisi mirongwine, Ninewe hagakomvomvorwa.

5Maz’ abantu b’i Ninewe bemera Imana, bashinga ngo habeho kwisonzesha, baca bambara amagunira, uhereye k’ūhambaye ugashitsa kuri nyarucari hanyuma y’abandi.

6Inkuru zishika ku mwami w’i Ninewe, ahaguruka ku ntebe yiwe yiyambura imyambaro yiwe, yambara igunira, yicara mu munyota.

7Agera ko bamamaza i Ninewe icagezwe ciwe n’ic’ abaganwa biwe, ngo Ntihagire umuntu agira ico atamira, n’ibitunzwe n’uko, vy’amasho n’imikuku, ntihagire ico birya cank’ amazi binywa;

8arikw abantu ni bambare amagunira, n’ibitunzwe babiyapfuke, baheze bambaze Imana bakobeje, kandi bahindukire, umuntu wese areke inzira yiwe mbi, bareke n’umuryano uri muri bo.

9Nta wubizi: kumbure Imana yohindukira, ikīgarura, ikareka uburake bgayo bg’inkazi, ntiduhone.

10Maz’ Imana ibona ibikorwa vyabo, ingene bahindukiye, bakareka inzira yabo mbi; nukw Imana irīgarura ngo ntibatēze ivyago yari yabagereye, ntiyabibatēza.

← Chapter 2 Jump to: Chapter 4 →