1 Corinthians 13

Romani Ursari 2018 (Biblia Ande Chib Romani)

← Chapter 12 Jump to: Chapter 14 →

1Te dava orba e chibia e manusenge ta i e suechonenge, ta te na avel man volipe, sen sargo iek sastri kai basel o iek sinbalo kai asundol.

2I te avela man dini e poroka te llanav so si te avelpe, ta te llanava sa e ezgode gurudine e Devleke ta sa o bizaipe, ta te avela man iek pachape gia baro kai sai miskou e burdura, ta te na avela man volipe, ni sem niso.

3I te dava sa so si man te jan e llene kai si chorre, ta i te dava mi esnaga te phabardol pala lende, ta te na avela man volipe, gua niso ni blazil mange.

4Kana e manuse si le volipe suako ezgoda terpil ta si lacho, inai le joli, ni blagosil vou pe, ta ni cherel baripe ande pe,

5ni phenel bilache alava, inai lakomo ta ni achel joliariko averea,

6ni veselilpe ando bilachipe, veselilpe ando chachipe.

7Ka si le volipe sai prostil suako ezgoda, sa sai pachal, sa sai aduricharel, ta sa sai terpil.

8O volipe nikada ni ka merel. Iek llive e poroka katar so si te avelpe ni ka avel ios, ta ni ka delpe orba ande aver chibia ta ni ka trubulpe o bizaipe.

9Soke o bizaipe e poroka ta sa so llana akana, inai orta.

10A kana ka avel so si orta, sa ogola ezgode ni ka aven ios.

11Kana sema minono, dava orba, misliva man ta acharava sargo iek minono, a kana barilem, muklem palpale e ezgode kai cheren e minone.

12Akana dikha katar e geldala ando truniariko, a iek llive ka dikha e Gazda angla amende. So pinllarav akana inai orta, a iek llive ka pinllarav e Devle gia sar vou pinllarel man.

13Si trin ezgode kai nikada ni ka meren: O pachape, so adurichara ta o volipe, a o mai baro lendar si o volipe.

← Chapter 12 Jump to: Chapter 14 →