Colossians 1

Romani Ursari 2018 (Biblia Ande Chib Romani)

Jump to: Chapter 2 →

1Me o Pablo, apostol katar o Jesukristo pala e volia e Devleki, ta o phlal o Timoteo,

2bichala salami e llenenge kai si katar o foro santo kai si ande Kolosas, phalalen kai sen chache ando Jesukristo. Amaro Dad, kai si o Del, te del tumen po volipe ta pi pas.

3Suako drom kai moli amen pala tumende da fala e Devle, o Dad katar amaro Gazda o Jesukristo.

4Soke asundam e viasta katar o pachape kai si tumen ando Kristo Jesus, ta katar o volipe kai si tumen pala sa o foro santo.

5Tumen cheren gala ezgode soke asunden e orba chachuni kai si ande lachi viasta ta llanen so si tumenge gurudino ando miloso

6ta sar kai avili tumende gaia orba, barili ta dikhol so cherel pe suako rig katar e phuv, isto gia sar avilape maskar tumende sar kai asunden katar o volipe e Devleko, ta acharden leko chachipe.

7Gala ezgode sikadalen tumenge amaro phlal kai voli le, o Epafras. Vou radisarda amenchar ta si iek chacho sluga e Kristoko.

8Vou anda amenge tumari viasta, ta sar o Duo cherel te avel tumen volipe.

9Goleke, amen sar kai asundam sa gala ezgode, ni muklam te moli amen pala tumende ta te manga e Devletar te sikavel tumen so vou mangel, ta te del tumen suako bizaipe, ta te acharen so del o Santo Duo.

10Ta gia sai zivin sar trubul te zivin e llene kai si e Gazdake, ta ka cheren e ezgode kai leke si drago, ta ka cheren but ezgode lache, ta ka barion ando bizaipe te sai llanen mai but katar o Del.

11Goleke, manga e Devletar pe bare zoriaia te cherel tumen zurale, gia tumen sai ka terpin suako ezgoda esmiro ta veselimaia,

12ta ka den fala e Dade, soke vou lacharda tumen te len ande leki charoina villeloki e ezgode kai phenda kai ka del e sante foro.

13O Del braduisarda amen katar e zor katar o truniariko, ta inllarda amen kai e charoina leke Chaveki gole kai volil,

14ta pala le si amen o braduipe ta o prostipe katar o bilachipe.

15O Kristo si sar dikhol o Del kai nasti dikha le. Vou si leko edino Chavo kai saia mai anglal katar sa so si cherdo.

16Ande lete o Del cherda sa so si ando miloso ta pe phuv, so sai dikhol ta so nasti dikhol, ta i e duura kai gazdarin zoriaia, ta sa ande lete si cherde ta leke si cherde.

17O Kristo saia mai anglal katar sa e ezgode, ta pala lete sa ezgode achen pe po than.

18Ta o Kristo si o soro e khanllirako, a leki esnaga si e khanlliri. Ta o Kristo si mai anglal katar sa e ezgode, goleke vou saia o purvo kai ustilo katar o meripe te sai avel o purvo pe sa e ezgode.

19Soke ando Kristo si sa e zor e Devleki,

20ta cheres lete, o Del phagla e joli kai saia ande sa e ezgode. Sa so si pe phuv ta i sa so si ando miloso, ta cherda te avel e pas cheres o rat kai o Kristo perada po krusto.

21Tumen omanglal sena dur katar o Del ta sena leke dusmanura, ta mislina tumen ta cherena o bilachipe,

22ta akana o Kristo phagla goia joli ta cherda tumen te aven lea ande iek than pala po meripe kai vou nakhla kana cherdilo manus, te sai aven tumen angla le santura ta jalade ta bi dosako.

23A te avelpe gia, morabi te thoven tumaro pachape ande orba katar e lachi viasta kai asunden. Gaia si e orba katar e lachi viasta kai phendili pe suako rig katar e phuv, ta kai me o Pablo pomoziu te phendol.

24Akana veseliu man katar e patnia kai nakhav pala tumende, soke gia ka resav te lau i me ande mi esnaga sa e dukha kai lia o Kristo pala e khanlliri kai si leki esnaga.

25O Del cherda te avav iek sluga e khanllirako, te inllarav leke alava pe suako rig pala tumaro lachipe,

26so o Del mangel te cherel ta saia gurudino bute bursenchar ta kai akana sikadilo e sante foroke.

27Lenge mangla o Del te sikavel o baro barvalipe katar gaia orba kai si sa e phuvienge. Ta gaia orba gurudini si: O Kristo, kai si maskar tumende ta si o baripe kai tumen aduricharen te avel tumen.

28Amen phena e orba katar o Kristo ta sikava saurren pe suako bizaipe te sai aven orta ando Kristo.

29Goleke cherav gaia buchi ta radiu sa e zoriaia kai o Kristo del man.

Jump to: Chapter 2 →