Colossians 4

Romani Ursari 2018 (Biblia Ande Chib Romani)

← Chapter 3 Jump to:

1Tumen kai si tumen sluge morabi te aven gazda lache tumare slugenchar. Na bristaren kai i tumen si iek Gazda ando miloso.

2Molintumen suako llive ta den fala e Devle.

3Molintumen i pala amende te sai o Gazda putarel amenge e udara, te sai da orba katar e lachi viasta ta te sikava e ezgode gurudine kai o Kristo mangel te cherel, goleke sem phanglo.

4Molintumen te sai sikavav gaia orba bristomaia sar trubulpe.

5Morabi te aven bizai e llenenchar kai ni pachan ta cheren o lachipe suako drom kana sai cheren le.

6Tumari orba morabi te avel lachi ta gugli suako drom, ta kana ka puchen tumen vareso morabi te llanen te sai den orba.

7Amaro phlal o Tikiko kai voli le ta kai si iek chacho phlal kai pomozil amen ta kai radisarda manchar amare Gazdake, ka phenel tumenge sa so cherav me.

8Goleke bichalav le tumende te phenel tumenge sar sam ta te del tumen zor.

9Lea llal i o Onesimo, amaro chacho phlal kai voli le, kai vou si iek tumendar. Von ka phenen tumenge sa so llalpe kate.

10O Aristarko kai si manchar ande rubie bichalel tumenge salami, ta i o Markos, o pharnavo e Bernabeko. Te llala o Markos tumende, me phendem tumenge so si te cheren, morabi te aven lea pachivale.

11I o Jesus kai ikharen le Chacho bichalel tumenge salami. Maskar e judiura samo von si kai radisarde manchar pala e charoina e Devleki ta die man but zor.

12Bichalel tumenge salami o Epafras, iek sluga e Jesukristoko; vou si iek tumendar ta vou suako drom molilpe pala tumende te aven orta ta zurale ta te cheren e volia e Devleki.

13Me sem o lleno kai dikhav sar brigilpe pala tumende ta pala e llene kai si ande Laodisea ta i ande Ierapolis.

14O Lukas, o doktori kai voli le, i vou bichalel tumenge salami, ta i o Demas.

15I Me bichalav salami e phlalenge kai si ande Laodisea ta e Ninfake ta e khanllirake kai chidiniaol ande leko cher.

16Kana ka chitin tumen gava lil, bichalen le i kai e khanlliri ande Laodisea te sai chitin i kote gava lil.

17Phenen gaia ezgoda e Arkipoke Trudisao te chere sukar o rado kai die tut ando anav e Gazdako.

18Me o Pablo pisiv gava salami isto me vastea. Na bristaren tumen kai sem phanglo. O volipe e Devleko te avel tumenchar.

← Chapter 3 Jump to: