bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Romani
/
Romani Ursari 2018 (Biblia Ande Chib Romani)
/
Esther 2
Esther 2
Romani Ursari 2018 (Biblia Ande Chib Romani)
← Chapter 1
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 3 →
1
Mapalal katar gala ezgode kana o charo Asuero achilo mai esmiro, diape golli katar sa so cherda e Vasti ta katar o zakono kai cherda pala laki dos.
2
Ondaka e llene kai radina ande leki charoina phende: Morabi te roden e charoke chea terne ta sukar,
3
goleke o charo morabi te bichalel llenen ande sa e phuvia kai vou gazdaril ta te anen e cheen ando cher e diskiniengo kai si le ando foro o Susa, te arakhel len o Egai kai si o eunoko kai arakhel e diskinien. Ta o Egai, te del len so trubul len te dikhon ios mai sukar,
4
ta e chei kai ka avel mai drago e charoke, ka cherdol charoina ta ka thovelpe po than katar e Vasti. Goia orba avila drago e charoke.
5
Ando foro Susa zivila iek judio kai ikhardola Mardokeo, chavo e Jaireko, unuko e Simieko, ta paraunuko e Kiseko kai saia katar e vicha e Benjamineki.
6
Kana o Nabukodonosor, charo katar e Babilonia, inllarda phanglo e Jekoniase, charo katar o Juda, i o Kis saia maskar e llene kai o Nabukodonosor inllardaia phangle katar o Jerusalem ande Babilonia.
7
E Mardokeo saia chorri katar leko kako kai ni saia la ni dad ni dei, ta vou liaia la sargo pi chorri kana mulo lako dad ta laki dei. Voi ikhardola Ester, ta saia but sukar lako mui ta i laki esnaga.
8
Kana lleli a viasta katar so mangela o charo, chidie bute cheen ando cher e charoko kai si ando foro Susa, ta mukle te arakhel len o Egai, o eunuko kai arakhela e diskinien, ta maskar lende saia e Ester.
9
E Ester pela but drago e Egaieke, goleke dia la e mai lache ezgode te dikhol mai sukar, ta dia la te jal o mai lacho jape. Mukla te radin lake efta katar e mai lache sluge kai sea ando cher e charoko, ta inllarda la lenchar kai e mai lache sobe katar e charoina e diskiniengi.
10
E Ester ni phenda niso katar pi vicha ni katar pi familia, soke o Mardokeo phendaia lake te na phenel niso.
11
Ta o Mardokeo phiravelape suako llive angla e bar katar o cher e diskiniengo, te llanel sar saia e Ester ta so cherena laia.
12
Desudui chon radisarde gole cheenchar te cherdon mai sukar. Mai anglal sov chon thovena pe lengi esnaga zeitino katar e mirra, ta ogola sov chon thovena merisura ta khand sukar golendar kai thoven e diskinie. Kana getosarde, suako chei sikadola iek po iek angla o charo Asuero,
13
ta mukena te furiadon katar sogo saia ando cher e diskiniengo ta te inllaren gola ezgode kai o cher e charoko.
14
Kana perela e riat suako chei llala te nakhel e riat e charoia, ta thiarinako llala kai aver cher e diskiniengo kai arakhela o gua eunuko e charoko o Saasgaz kai arakhela e diskinien kai sea konkubine, mapalal ni avela pale kai o charo, lligo ni mangela vou te ikharel la pale pe lako anav soke avila leke drago.
15
O Dad katar e Ester saia o Abiail, kai saia kako katar o Mardokeo kai lia la te bariarel la kana saia minoni. Kana avilo lako vreme te llal kai o charo, inllarda samo so phenda lake o Egai, o eunuko e charoko kai arakhela e cheen. Ta e Ester perela drago saurrenge.
16
Ta inllarde la kai o cher e charoko te den la kai o charo Asuero ando desto chon kai ikhardola Tebet, ta o eftato burs kai vou charoila.
17
O Asuero lia le iek volipe but baro pe Ester sar ni volisarda nikada ni iekhe diskinia. Ta voi avila gia drago e Asueroke, kai avilo laia mai posteno neko sa e cheenchar kai sea lea, ta thoda pe lako soro e korona e charoinaki ta thoda la po than katar e Vasti.
18
Mapalal cherda iek bari slava pala e Ester, ta ikharda sa e llenen kai radina leke ta e llenen kai pomozina le ande leki charoina, ta cherda te pochinen mai cherricha katar e love kai si dine e charoke, ta dia but ezgode e llenen, gia sar cheren e charura.
19
Kana inllarena e cheen pe ogoia rig katar e charoina e diskiniengi, o Mardokeo besela po udar katar e cher e charoko.
20
Gia sar o Mardokeo phendaia e Estereke, voi ni phenda niso katar pi vicha ni katar pi familia, voi cherda sa so phendaia lake o Mardokeo, gia sar vou sikavela la.
21
Ta kana o Mardokeo saia po udar katar o cher e charoko, asunda sar dena pe orba o Bigtan ta o Teres, dui eunukura kai arakhena o udar katar o cher e charoko. Von dui dikhena sar ka cheren te mundaren e charo e Asuero.
22
Kana o Mardokeo llangla so mangena te cheren, phenda le e Estereke kai saia charoina, ta voi phenda le e charoke ando anav katar o Mardokeo.
23
Thodepe te llanen mai sukar katar gaia orba, ta kana llangle kai saia istina, chinde e duie eunukonenge te umblaven len. Ta angla o charo pisisarde gala ezgode ando lil kai pisilpe sa so cherdol ande lengi phuv.
← Chapter 1
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 3 →
All chapters:
1
2
3
4
5
6
7
8
9
10