Exodus 34

Romani Ursari 2018 (Biblia Ande Chib Romani)

← Chapter 33 Jump to: Chapter 35 →

1O Del phenda e Moiseseke: Chin isto tu dui table barrastune isto gia sar sea ogola table, te sai me pisiv pe lende isto gola alava kai sea pisime ande purve table, gola kai phaglan.

2Ta i lachar tut te sai like po burdo Sinai thiarinako rano, te sikado mange pe rig mai vazdini katar o burdo.

3Niko te na likel tuia, ta te na dikhol niko pe sa o burdo, ta te na aven bakre ni guruva kai jan angla o burdo.

4O Moises chinda dui table barrastune pe vastenchar isto gia sar sea e purve table. Ta thiarinako rano, lia e dui table barrastune ta likisto po burdo Sinai, gia sar o Del phendaia leke te cherel.

5Ondaka o Del fulisto ande iek oblako ta achilo kote e Moisesea, ta phenda po anav Jeova.

6Ta nakhlo angla o Moises, ta phenda bare avazea: ¡Jeova! ¡Jeova! zuralo ta pherdo zalba ta lacho, kai ni joliaol oma, ta baro ando volipe ta ando chachipe.

7Pe milia porodura achel chacho ande po volipe, ta prostil sa o bilachipe, ta i llanav te dukhavav e llenen kai cheren o bilachipe, ta lenge chaurren, ta lenge unukonen, ta lenge para unukonen, ta i lenge paraunukonenge chaurren.

8Ondaka o Moises, oma thoda po soro llik tele pe phuv ta blagosisarda.

9Ta phenda: ¡Devla! ¡Devla! Te si de istina kai voli man, aide maskar amende. Chachimaia gala llene ni kanden, a tu prostisar sa amaro bilachipe, ta le amen sargo cho foro.

10Ondaka o Del phenda e Moiseseke: Thoven sama, me akana ka achav pe iek orba sa che foroia. Ka cherav ezgode but bare kai ni cherdile ande nisavi aver phuv, ta sa e llene kai zivin maskar tumende ka dikhen so sai cherel o Del, soke ka avel iek ezgoda but bari so ka cherav me tumenchar.

11Cheren so phendem tumenge allive, ta me ka tradav tumendar e llenen kai ikhardon amorreura, kananeura, jititura, fereseura, jeveura ta e jebuseura.

12Te na achen pe ni iek orba e llenenchar kai zivin ande phuv kai ka den, gia te na cheren tumen te peren ande lengo bilachipe.

13Tumen ka phagen lenge altarura ta lenge dela barrenge ta ka zatrin lenge slike katar e Asera.

14Soke ni ka de changa angla nisavo del, soke o Del mangel tumen samo peke. Soke leko anav si o Del kai mangel tumen samo peke.

15Te na achen pe ni iek orba e llenenchar kai zivin ande gaia phuv. Soke von ka cheren o bilachipe angla pe dela, ta ka den len kurbanura ta ka ikharen i tumen, ta tumen ka jan katar lenge kurbanura.

16O sai perel drago tumenge te zinin tumare chaurren e chorrenchar katar gola llene, ta kana lenge chorra ka cheren o bilachipe te blagosin gole delen kojamne, ka cheren i tumare chaurren te cheren o bilachipe te blagosil len.

17Ni ka cheren tumenge dela katar o sastri biladino.

18Ka cheren e slava katar o marrno kai ande lete inai levadura, gia sar phendem tumenge te cheren. Ka jan marrno kai ande lete inai levadura efta llive ando chon kai ikhardol Abib, soke ande gua chon likisten katar o Ejipto.

19O purvo chaurro kai ka biandol tumenge ka avel murno, ta isto gia maskar che guruva, che bakre, che busne, o purvo si murno te biandola murus.

20A pala o purvo magarcho sai ka den man iek bakro o iek busno a te na dena le, ka phagen e korr e magarchoki. Ta morabi te den pala suako chaurro mai purano so si dino.

21Sou llive ka radi, a o eftato llive ni ka radi ni te avela ando vreme kana a chidiniaol so si ando vostano.

22Ka vazden slava katar e purve septelie katar o lliu kana ka avel o milai ta e slava katar o chidipe katar e vostanura kana ka liken katar o burs.

23Trin droma ando burs ka aven sa e murusa angla o Del tumaro Gazda, o Del katar o Israel.

24Soke me ka tradav angla tumende ogole phuvien ta ka bariarav tumari phuv. Ta gia niko ni ka tromal te lel tumari phuv, so tumen avena angla tumaro Del trin droma ando burs.

25Kana ka den kurbanura na den ande iek than o rat ta o marrno kai si ande lete e levadura, ta na guruven thiarinake so achela katar o kurbano kai diape ande slava katar e Paskua.

26Morabi te inllaren katar e mai lache septelie kai del e phuv ando cher e Devleko tumaro Gazda. Ni ka chiraven e busnen ando thut lenge dako.

27Ondaka o Del phenda e Moiseseke: Pisisar gala alava, soke gala alava si pe so ka achav tuia ta e israelenchar.

28O Moises achilo kote e Devlea saranda llive ta saranda racha ta ni jala ta ni pila niso gola llivesa. Ta kote pisisaile e alava pe so achile, e des zakonura.

29Mapalal o Moises fulisto katar o burdo Sinai ta inllarela e dui table katar o zakono, a kana fulisto katar o burdo ni acharda kai leko mui klichila soke diaia orba e Devlea.

30Kana o Aaron ta sa e israelitura dikhle kai o mui e Moiseseko klichila, daraile ta ni avile pasa le.

31A o Moises ikharda len, ta kana o Aaron ta sa e mai bare katar e israelitura irisaile kote kai saia o Moises, vou dia orba lenchar.

32Mapalal avile sa e israelitura, ta o Moises dia len sa e alava kai o Del diaia le po burdo Sinai.

33Kana dia orba lenchar ucharda po mui iekhe dikhloia.

34Kana o Moises avela angla o Del te del orba lea, ikanela o dikhlo ta achela gia lligo ni likela kotar. Ondaka phenela e israelenge e alava kai diaia le o Del te phenel.

35Kana dikhena e israelitura o mui e Moiseseko kai klichila, vou pale thovela o dikhlo pe po mui, ta mukela le thodo lligo ni dela pale te del orba e Devlea.

← Chapter 33 Jump to: Chapter 35 →