Leviticus 16

Romani Ursari 2018 (Biblia Ande Chib Romani)

← Chapter 15 Jump to: Chapter 17 →

1O Del dia orba e Moisesea mapalal kana mule e chaurre e Aaronoke, kana avile pasa o Del ta mule.

2Ta o Del phenda e Moiseseke: Phen che phlaleke e Aaronoke te na del suako drom ando santuario palal katar e kortina angla o propisiatorio kai si upral katar e arka, te na merel, soke me ka sikadivav ande iek oblako upral po propisiatorio.

3O Aaron morabi te del ando santuario iekhe telchoia te del le kurbano pala o bilachipe, ta iekhe bakrea te del le kurbano phabardo.

4Morabi te thovel pe pete o fistano santo cherdo katar o lino, uchardi leki esnaga e sosteenchar katar o lino, ta te avel pe lete o kavisi, ta e mitraiaia cherdi katar o lino ka ucharelpe. Gala si e patave sante, goleke mai anglal te thovel len pe pete, vou morabi te jalavel pi eznaga e paiea.

5Ta pala e israelitura ka lel o Aaron dui busne te del len kurbano pala o bilachipe, ta iek bakro te del le kurbano phabardo.

6Ondaka ka del etelcho kurbano pala piro bilachipe te sai lel o prostipe isto katar piro bilachipe ta katar pi familia.

7Mapalal ka lel e dui busne ta ka del len angla o Del, kote katar delpe ande chara kai chidiniaon.

8Mapalal ka chelelpe te dikhel pe savo busno ka perel. Iek ka avel e Devleke, a o gua e Azazeleke.

9O busno kai ka perel pe lete te avel e Devleko, ka del le o Aaron kurbano pala o bilachipe.

10A o busno kai ka perel pe lete te avel katar o Azazel, ka anel le llundo angla o Del te sai lel o prostipe katar o bilachipe, ta mapalal ka chudel le po pusto, kai o Azazel.

11A o Aaron ka del e telcho kurbano pala piro bilachipe, te sai lel o prostipe katar piro bilachipe ta katar pi familia.

12Mapalal ka lel iek insensario pherdo angara phabarde kai ikande len katar o altar kai si angla o Del, ta leke va pherde taimano kai khandel sukar drobome, ta ka inllarel le palal katar e kortina.

13Ta ka thovel o taimano upral pe iag angla o Del, ta o thuv katar o taimano ka ucharel o propisiatorio kai si upral katar e arka katar e alava. Gia o Aaron ni ka merel.

14Ta i kalel cherricha rat katar o telcho, ta pe naiea ka chudel o rat karing o propisiatorio pe leki rig karing likel o kham. Mapalal ka makhel pe naiea kai si ando rat efta droma o propisiatorio pe leki rig angluni.

15Mapalal ka mundarel e busne sargo kurbano pala o bilachipe e foroko ta ka inllarel o rat palal katar e kortina, ta ka cherel e ratea isto gia sar cherda e ratea katar o telcho, ta ka rispil la upral po propisiatorio ta anglal katar o propisiatorio.

16Gia ka chistol o santuario katar sa o pokalipe ta o bilachipe e israelengo. Isto gia morabi te cherel e charaia kai chidiniaon, kai si maskar lende ta maskar lengo pokalipe.

17Kana o Aaron ka avel andre ando santuario te lel o prostipe katar o bilachipe, ta lligo ni ka likel, niko nasti ka avel andre ande chara kai chidiniaon lligo ni ka lel o prostipe katar piro bilachipe ta pe familiako ta katar sa eforoko katar o Israel.

18Ta ka likel te chistol o altar kai si angla o Del. Ka lel katar o rat e telchoko ta katar o busno ta ka makhel upral e singa ta truial o altar.

19Ta pe naiea ka chudel o rat upral po altar efta droma. Gia ka chistol le katar o pokalipe e israelengo.

20Kana o Aaron ka gotovil o rado te chistol o santuario, e chara kai chidiniaon ta o altar, ka bichalel te anen e busne kai si llundo,

21ta ka thovel o Aaron pe va upral po soro e busneko, ta ka phenel pe lete sa o bilachipe, e israelenego. Gia ka thovel sa o bilachipe po soro e busneko, ta iek lleno chinado goleke ka inllarel le po pusto ta kote ka muliarel le.

22Gia kana ka jasaol o busno po pusto, ka inllarel pea sa lengo bilachipe pe riga kai ni zivil niko.

23Mapalal o Aaron ka del ande chara kai chidiniaon, ta ka ikanel petar e patave katar o lino kai thodaia pe pete te del ando santuario, ta ka mukel len kote.

24Mapalal o popo ka jalavel pi esnaga e paiea ando santuario, ta mapalal kana ka thovel pe pete pe patave, ka likel te del piro kurbano ta o kurbano kai si te del pala o foro, ta gia ka lel o prostipe piro ta e foroko.

25E khoi katar o kurbano pala o billachipe ka phabarel la po altar.

26A o lleno kai inllarda e busne te mukliarel le e Azazeleke, ka jalavel pe patave ta ka jalavel pi esnaga e paiea, ta mapalal ka del ando pero.

27O telcho ta o busno kai diepe kurbano pala o bilachipe, ta kai lengo rat inllarde ando santuario te sai lelpe o prostipe katar o bilachipe, ka inllaren len avri katar o pero, ta lengi morchi, lengo mas, ta lenge gosnia, ka aven phabarde.

28O lleno kai ka phabarel len, morabi te jalavel pe patave ta ka jalavel pi esnaga e paiea, ta mapalal sai ka del ando pero.

29Gava zakono ka avel ostade tumenge: O llive desto katar o chon eftato, tumen morabi te allunin ta te muken sa tumaro rado, e israelitura ta i e llene kai aven katar aver phuvia ta kai zivin maskar tumende,

30soke gua llive ka lelpe o prostipe katar tumaro bilachipe, ta ka achen chiste katar tumaro bilachipe angla o Del.

31Gava si iek zakono ostade: Gua llive ka avel tumenge iek llive but sukar kai ni ka radin ta ka allunin.

32O popo kai thode pe lete o zeitino ta kai si chinado te lel o than pe dadeko sargo popo, vou ka cherel gava rado te lel o prostipe katar o bilachipe. Ka thovel pe pete e patave cherde katar o lino e patave sante.

33Ta ka cherel o chistope katar o than kai si but santo, ta katar e chara kai chidiniaon, ta katar o altar, ta ka lel o prostipe katar o bilachipe e poponengo ta katar sa e foro kai chidiniaol.

34Gava ka avel iek zakono ostade tumenge, iek drom ando burs te sai len o prostipe katar sa o bilachipe katar o Israel. Ta o Moises cherda gia sar o Del phenda leke te cherel.

← Chapter 15 Jump to: Chapter 17 →