Leviticus 4

Romani Ursari 2018 (Biblia Ande Chib Romani)

← Chapter 3 Jump to: Chapter 5 →

1O Del dia orba e Moisesea ta phenda leke:

2Phen e israelenge kai kana vareko cherela varesavo bilachipe kai ni mangela te cherel e zakonoke, ta cherela vareso kai ni trubulpe te cherel.

3Te avela o popo mai baro kai cherda gava bilachipe ta cherela te perel gua bilachipe po foro, vou morabi te del e Devle iek telcho te na avel nasualo sargo kurbano pala o bilachipe kai cherda.

4Ka inllarel le angla o Del kote katar delpe ande chara kai chidiniaon. Kote ka thovel po va upral pe leko soro, ta mapalal ka mundarel le angla o Del.

5Mapalal isto vou ka lel cherricha rat katar o telcho, ta ka inllarel le kai e chara kai chidiniaon.

6Kote ka chingarel po nai e ratea ta ka chudel pe naiea efta droma angla o Del karing e kortina katar o santuario.

7Ta o popo ka lel cherricha katar gua rat ta ka makhel e singa katar o altar katar o taimano kai khandel sukar, kai si andre ande chara kai chidiniaon, ta sa ogua rat kai achela, ka chordol angla o altar kai phabardol kurbanoko, kai si ande chara kai chidiniaon angla o Del.

8Mapalal ka ikanel katar o telcho kai diape kurbano pala o bilachipe, sa e khoi kai ucharel e porra,

9e dui bubreskura ta e khoi kai si upral pe lende, ta e khoi kai si upral pe leke zea, ta e khoi kai si po buko, morabi te ikanen len.

10Isto gia sar ikandol katar e guruv kai delpe kurbano pala e pas. Mapalal o popo ka phabarel le upral katar o altar kai phabardol kurbanoko.

11A e morchi e telchoki ta sa leko mas, ta leko soro, leke porrne, leke porra ta sa leke gosnia kai si ande leko lli,

12ta sa o telcho, ka ikanen le avri katar o pero pe rig jaladi kote kai chuden o prajo e iagako, ta kote upral po prajo ka thove kasta ta ka phabare le iagaia upral pe kasta kote kai chudelpe o prajo e iagako, kote ka phabardol.

13A sa o foro katar o Israel te cherela o bilachipe, a von ni mangena te cheren le, ta niko lendar ni acharda kai so cherde saia iek bilachipe pe zakonura e Devleke,

14ta kana ka llangliolpe o bilachipe kai cherde, morabi sa te den iek telcho sargo kurbano pala o bilachipe, ta ka inllaren le kai e chara kai chidiniaon,

15ta kote e phure katar o Israel ka thoven pe va upral po soro e telchoko angla o Del, ta isto kote ka mundaren le.

16Mapalal o popo mai baro ka inllarel cherricha rat e telchoko ande chara kai chidiniaon,

17ka chingarel po nai ando rat ta pe naiea ka chudel o rat efta droma angla o Del karing e kortina kai ucharel e rig but santa.

18Mapalal gole ratea ka makhel e singa katar o altar kai si angla o Del, kai si ande chara kai chidiniaon. Ta sa ogua rat kai ka achel ka chordol angla o altar e kurbanoko, kai si kote katar delpe ande chara kai chidiniaon.

19Ta ka ikanel katar o telcho sa leki khoi, ta ka phabarel la upral po altar.

20Ta ka cherdol gale telchoia isto gia sar cherdol e telchoia kai delpe kurbano pala o bilachipe, gia o popo ka lel lengo prostipe, ta ka aven prostime.

21Mapalal ka ikanel e telcho avri katar o pero, ta ka phabarel le gia sar phabarda e purvo telcho. Gava si o kurbano sa e foroko.

22A kana cherela o bilachipe iek birovi e foroko, ta phagela varesavo zakono e Devleko, ka avel dosalo i te na manglaia te cherel le.

23Ta kana ka acharel o bilachipe kai cherda, morabi te inllarel iek busno te na avel nasualo te del le kurbano.

24Ka thovel po va upral po soro e busneko ta ka mundarel le angla o Del, pe rig kote kai mundardon e zivirinie kai phabardon, soke si iek kurbano pala o bilachipe.

25Mapalal o popo ka lel cherricha rat katar e zivirinia kai die le kurbano pala o bilachipe, ta ka makhel e singa katar o altar kai phabardol o kurbano, ta mapalal so achela katar o rat ka chordol angla o altar kai phabardol o kurbano,

26ta ka phabarel sa e khoi upral po altar, isto gia sar cherdol kana delpe o kurbano pala e pas. Gia o popo ka lel o prostipe katar o bilachipe e biroveke, ta o bilachipe ka avel leke prostime.

27A vareko katar o foro te cherela iek bilachipe kai vou ni kamela te cherel, ta te avela dosalo kai phagla o zakono e Devleko,

28kana ka acharel kai cherda o bilachipe, morabi te inllarel iek busni te na avel nasuali te del la kurbano pala o bilachipe kai cherda.

29Ka thovel po va upral po soro e busniako kai del kurbano pala o bilachipe, ta mapalal ka mundarel la po than kai phabardol o kurbano.

30Ondaka o popo ka lel pe naiea cherricha rat, ta ka makhel e singa katar o altar katar o kurbano, ta sa o rat kai ka achel ka chordol angla o altar kai phabardol o kurbano.

31Ta ka ikanel sa laki khoi, gia sar ikandol e khoi katar o kurbano kai delpe pala e pas, ta o popo ka phabarel e khoi upral po altar sargo e khan kai khandel sukar e Devleke. Gia o popo ka del kurbano pala le te avel prostime, ta gia ka avel prostime leko bilachipe.

32A gua manus te anela iek bakri te del la kurbano pala o bilachipe, morabi te anel iek bakri te na avel nasuali.

33Ta ka thovel po va upral po soro e bakriako, ta mapalal ka mundarel la sargo kurbano pala o bilachipe po than kote kai mundardon e zivirinie.

34Ondaka o popo pe naiea ka lel cherricha rat katar o kurbano, ta ka makhel e singa katar o altar kai phabardol o kurbano, ta sa o rat kai achela ka chordol angla o altar.

35Mapalal ka ikanel sa laki khoi isto gia sar ikandol katar o bakro kai delpe kurbano pala e pas, ta o popo ka phabarel e khoi po altar upral pe ofrenda phabardi e Devleki, ta gia o popo ka lel o prostipe katar o bilachipe gole lleneke, ta o bilachipe ka avel prostime.

← Chapter 3 Jump to: Chapter 5 →

Recommended Reading

Commentary Leviticus Commentaries → Devotional Leviticus Devotional Guide → Get This Bible Romani Ursari (Biblia Ande Chib Romani) Study Bible →