Malachi 2

Romani Ursari 2018 (Biblia Ande Chib Romani)

← Chapter 1 Jump to: Chapter 3 →

1Akana tumen e popura, tumenge si gava alav.

2Te na asunena man, ta ni kamena lache olietar te den liubao me Anaveke, phenel o Del kai si le sa e zor, me ka proketiv tumen ta ka proketiv tumare lache ezgode. Ta i diem tumen armaia, soke ni asunden man lache olietar.

3Ka cherav te perel pe tumare simiche zatrania, ta ka chudav pe tumaro mui o gadope katar e zivirinie kai dien kurbanura. Ta i tumen ka chudav.

4Ta ka llanen kai me sem kai diem gava alav, te na jasaol so diem e Levie.

5So diem le saia o zivoto ta e pas, te sai del man liubao ta te blagosil man. Ta vou darailo mandar ta angla ma blagosisarda man.

6O Levi sikavela o chachipe ta ni kojavela. Saia orta ta chacho manchar, ta bute llenen cherda te muken o bilachipe.

7Soke o popo morabi te sikavel e llenen te pinllaren man, ta o foro ka aven lete te sikol katar o zakono, soke vou si bichaldo e Devletar kai si le sa e zor.

8A tumen ni llan po lacho drom, ta cherden bute llenen te durion katar o zakono, ta tumen phagen o alav e Levieko, phenel o Del kai si le sa e zor.

9Goleke, i me cherden tumen gado ta llubri angla o foro, soke tumen ni guruven me droma ta ni chinen kris orta saurrenge.

10¿Inai amen isto gua Dad? ¿Ni cherda amen isto guia Del? ¿Soke kojava iek avere ta phaga o alav kai o Del achilo amare puranenchar?

11O Juda ni kandel e Devle, ta ando Jerusalem ta ando Israel cheren ezgode but bilache. O Juda mukla ando lallao o cher kai o Del volil, ta e murusa katar o Juda lie diskinien kai blagosin avere delen.

12O Del ka chudel katar amaro foro gole llene kai cherel gale ezgode makar te avela iek lleno kai del ofrenda e Devleke kai si le sa e zor.

13Tumen ka ucharen ausenchar o altar e Devleko. Ka roven ta ka urkin soke ni ka lav ios tumari ofrenda.

14Ta ka puchen: ¿Soke? Soke o Del dikhla so cherdan kai ni sana orta che rromiaia kai lian kana sana terno. ¡Voi saia chi rromi ta jalan lake sovel kai ka ave orta laia!

15¿Inai isto o Del kai cherda e esnaga ta e duo? ¿A so mangel o Del? Vou mangel chave orta ta chache e Devleke. Arakhen tumen ando tumaro duo, te na kojaven tumare rromi kai si tumenchar sar kana sena terne.

16Soke o Del e Israeleko phenel kai inai leke drago o mukliardipe, ta inai leke drago o lleno kai mukelpe katar pi rromi ta cherel o bilachipe.

17O Del si chinio tumendar, ta tumen puchen: ¿Soke si chinio amendar? Kana tumen phenen gia: E Devleke drago o lleno kai cherel o bilachipe. Ta kana tumen phenen: ¿Kai si e kris orta katar o Del?

← Chapter 1 Jump to: Chapter 3 →