Mark 2

Romani Ursari 2018 (Biblia Ande Chib Romani)

← Chapter 1 Jump to: Chapter 3 →

1Nakhle nesave llivesa, ta o Jesus dia pale ando Kafarnaum. Ta asundilo kai vou avilo chere.

2Ta chidinaile but llene, gachin kai ni resena ni kai o udar, ta vou phenela lenge e lachi viasta.

3Ondaka avile star llene ta inllarde lete iekhe llene kai nasti phirela.

4Ta sar nasti thovena le pasa o Jesus soke sea but llene chidine, cherde iek putardipe upral po cher ta fuliarde gole bange ande iek postelia.

5Kana o Jesus dikhla lengo pachape, phenda e bangeke: Chavea, cho bilachipe si prostime.

6A nesave llene katar e kovacha e zakonoke kai besena kote, mislisaile:

7¿Soke gava del gola orbe? Pe alavenchar kusel e Devle. Samo o Del sai prostil o bilachipe.

8A o Jesus llangla so mislina, ta puchla len: ¿Soke mislin tumen gia?

9¿So si mai lesno, te phene e bangeke: Cho bilachipe si prostime, o te phene leke: Uste, le chi postelia ta phir?

10Goleke ka sikavav tumenge kai o Chavo e Manuseko si le e zor pe phuv te prostil o bilachipe. Ondaka phenda e bangeke:

11Chuke phenav, uste, le chi postelia ta llatar kai cho cher.

12Ondaka isto kote ustilo o nasualo, lia pi postelia ta llelotar kotar, angla sa e llene. Saurre chudisaile, ta blagosisarde e Devle, ta phenena: Nikada ni dikhlam iek ezgoda sargo gaia.

13Mapalal o Jesus pale llelo pasa e mora ta sa e llene avena lete, ta vou sikavela len.

14Kana nakhela, dikhla e Mateo o chavo e Alfeoko, kai besela po stali, kote kai pochindol e love e phuviake. O Jesus phenda leke: Aide pala ma. O Mateo ustilo ta llelo pala le.

15Iek llive kai o Jesus saia besindo pe sinia ande Mateoko cher, ta publikanura ta i bilache llene besena lenchar, soke but llene llana pala le.

16Nesave kovacha e zakonoke, kai sea fariseura, kana dikhle kai o Jesus jala gole llenenchar, puchle e disipulonen: ¿Soke tumaro kovachi jal e publikanonenchar ta i e bilache llenenchar?

17Kana o Jesus asunda len, phenda lenge: E llene kai si saste ni trubul len doktori, ka trubul doktori, si e nasualen. Me ni avilem te ikharav e chachen, me avilem te ikharav e bilachen.

18Iek llive e disipulura katar o Juan kai kristila ta e disipulura katar e fariseura allunina, ta avile nesave llene kai o Jesus ta puchle le: E disipulura e Juaneke ta i katar e fariseura allunin, ¿A soke chire disipulura ni cheren le?

19O Jesus phenda lenge: ¿Sai allunin gola kai si ikharde pe iek biau kana si lenchar o chavo kai zinilpe? Kana si lenchar o chavo kai zinilpe nasti allunin.

20A ka avel o llive kana ka len lendar gole kai zinilpe, ondaka von ka allunin.

21Niko ni thovel iek kotor chiti nevo pe iek fistano purano, soke o kotor o nevo chikniol ta chirdel, ta cherel te chindol ios mai but o chiti o purano.

22Ta ni thodol e mol nevi ande morcha purane, soke e mol e nevi cherel te pharron e morcha, ta jasaon e mol ta i e morcha. Goleke si te thodol e mol e nevi ande morcha neve.

23Iek llive sabado o Jesus phirela maskar o lliu, leke disipulura phirena ta chirdena ta ikanena o lliu.

24Ondaka e fariseura phende leke: ¿Soke che disipulura cheren ando llive sabado so nasti cherdol?

25A vou phenda lenge: ¿Nikada ni chitisarden so cherda o David kana vou ta i gola kai sea lea nakhena pe nuzda ta sea bokhale?

26Sar dia andre ando cher e Devleko kana o Abiatar saia o mai baro maskar e popura, ta jala e marrne kai sea chinade e Devleke, kai samo e popura sai jana gua marrno, a vou dia te jan gua marrnoi e llenen kai sea lea.

27Ta i phenda lenge: O sabado cherdilo e manusenge, a na e manusa e sabadoke.

28Goleke, o Chavo e Manuseko si Gazda i po sabado.

← Chapter 1 Jump to: Chapter 3 →