2 Peter 3

Romani Baltic Latin (Biblija - Pe Baltitko Romani čib (Romanes) 2019)

← Chapter 2 Jump to:

1Dróga miré! Ĥáda, javír lyl me čhináva tuménge. Me sýrby džangavava dalé lylenca te ripirén čačipén i tumarí žužy godý,

2sob (kaj) tumé te ripirén lavá, savé angledýr svénta proróki phendlé i pal priphenybén amaré Ráskire – Devléskiro i Zrakhibnariskiro, so dyné tumaré Apóstoly.

3Ne angledýr saréstyr džinén, so dre palatuné (posliednia) dyvesá javéna nahrata manušá, savé javéna te sanpe xoliames tuméndyr, a kokoré jone javéna te kerén duredýr, so lénge pir godý pir nalačhé-péskire maséngiro tyrdypén,

4i jone javéna te rakirén: “I kaj ža Léskiro lav, so Jov dyjá, kiéli Jov javéla? Pal-dová so dolé poratyr, kiéli myné amaré dadá nisó na parudyja, syr sys sozdynó svéto.”

5Kadasavé manušá duminena i sýrby na džinéna dová, so ĥará Devél priphendiá i kerdépe bolybén i phuv paniéstyr i paniésa,

6paldavá i ĥaratuno svéto sys začhudo paniésa ke xasibén.

7Ke davá bolybén i phuv, so isyn kakaná, rakhenape Devléskire lavésa vaš jag ke/žýko sendoskiro dyvés i ke xasibén vaš nadevlytkone manušénge.

8Ne jekh dyvés na moginéla te javél garadó tuméndyr, dróga miré, so Devléste jekh dyvés isyn syr bar (tysjonco) berš, i bar berš isyn, syr jekh dyvés.

9Devél na zarikirelape te kerél dová, pal so Jov dyjá lav, syr vari-savé manušá ginéna, so davá javéla na syg, ne Jov ĥará vyrikiréla tumen, i na kaméla, sob (kaj) vari-kon te xasjol, ne sob (kaj) saré te risjon ke Devél.

10Ne Devléskiro dyvés javéla syr čor ratý, i tedy bolybén grukimasa džála krig jakhéndyr i saré bolybnýtka koterá shačona, i phuv i saró, so isyn pe láte, javéna čhučé (pusta).

11Pal-dová so kóli saré častyra (priedmiety) javéna bilade, to tedy tuménge triej te dživén sventes i te otdén pes Devléske;

12i te užakiren i te tyrdenpe zoralés, sob (kaj) sygedýr te javél dová dyvés, kiéli javéla Devél, dyvés, dro savó bolybén javéla shačkirdo i saré koterá, so isyn pe bolybén, javéna rozbilade jagása.

13Ne pir Devléskiro dynó lav ame užakirasa nevó bolybén i neví phuv, kaj javéla te dživél čačipén.

14Paldavá, dróga miré, kóli užakiréna tumé saró davá, pričhuvén zor te javén angíl Léste bibangiakire i bidošengire i te javén dro ramánjo;

15i prilén dre godý dová, so Raj Devél ĥará vyrikiréla amen i déla saštypen te zrakhaspe, syr dová-pac' i amaró drógo pšal Pávli, savéske dyjá godý Devél, čhindiá tuménge pal davá,

16adiáke-pac' Pávli rakiréla pal davá dre saré péskire lylá; dre lénde isyn vari-so, so isyn pharó te ĥaljos, i manušá, savé isyn tempa i nane zoralé dro patiaibén, but piririskirena, so jov čhindiá dre lylá, syr i dre javír pašá Čhinybnástyr. Kadasavé manušá sýrby kokoré pe péste lydžána xasibén.

17I paldavá tumé, dróga miré, syr tumé akaná angledýr džinén davá, rakhénpe, sob (kaj) tumé te na kerén grého i te na patián dre frentyma khetané kadalé manušénca i te na otperen xorale patiaibnastyr

18a te barjon dro bahtiakiribén i te udžinén fedýr amaré Ras-Devlés, i Zrakhibnaris (Spasitieljos) Isusós Xristosós. Te javél Léske sláva kakaná i pe saré viéki. Amín'.

← Chapter 2 Jump to: