2 Thessalonians 2

Romani Baltic Latin (Biblija - Pe Baltitko Romani čib (Romanes) 2019)

← Chapter 1 Jump to: Chapter 3 →

1Ame drieván mangasa tumen, pšalále, te na kuninenpe dro dová, so amaró Raj-Devél, Isúso Xristóso javéla, sob (kaj) te skedel amen ke Pe.

2I sob (kaj) tumé te na sygnjon te zdžan godiatyr ci i te na piridživen pal duhoskiro sykaibén, ni lavéstyr, ni lylestyr, sýrby davá ame bičhadiam, savé vyphenena, so Ráskire-Devléskiro dyvés kakaná javdiá.

3Dykhén, sob (kaj) nijékh te na xohavél tumen: pal-dová so kadavá dyvés na javéla ke / žýko dová časo, paka javéla otgiiben Devléstyr i javéla sykado grehengiro manúš, savéske trej te xasjol;

4jov javéla te džal proti saró svénto, so kharéna Devlésa ci sventymasa, adiáke, so jov bešéla dre Devléskiri Khangirí sýrby Devél i javéla te vydel pes pal Devléste.

5Naúšto tumé na ripirena, so me, kiéli sómas ke tumé, rakirdjom tuménge pal davá?

6I kakaná tumé džinéna, so na domekela les te sykavél pes dro léskiro časo.

7Pal-dová so čorahany bizladoskiri zor kakaná keréla butý, i jekh paka obrikirela saró davá, i jov javéla te kerél davá ke/žýko dová časo, paka léna les krig.

8I tedy bi zakonoskiro grehengiro manúš sykavéla pes, savés Raj Devél Isúso zamarela (muliakiréla) Péskire ušténca, kiéli javéla.

9Bizakonoskiro manúš javéla nalačheskire zorjása, jov javéla te sykavél bari zor, i xohané znamiénii (ĥiertyká) i dívy,

10jov javéla saré xohaibnasa vaš manušénge, savé xasjona pal dová, so jone na prilyné čačuný patýv vaš péskiro zrakhibén.

11I pal davá Devél bičhavéla zor lénge, sob (kaj) jone te perén tel došvale sykliakiribén i te patián xohaibnaske.

12Mek te javén sendindle saré, kon na zakamdiá te patial čačipnaske, ne vykedyjá načačipén.

13Ne aménge trej, pšalále, saró časo te parikiras Devléske pal tuménde, savén Raj Devél vykedyjá, pal-dová so Jov angledýr vykedyjá tumen vaš zrakhibén pir Duhoskiri zor i patiaibén dro čačipén;

14ke savó Jov i khardiá tumen pir amaró rosphenyben pal bahtalý zan (zvies'), sob (kaj) tuménde te javén paš dre sláva amaré Ráskire-Devléskiri, Isusóskire Xristososkiri.

15I paldavá, pšalále, javén zoralé pir dúho (fáno) i rikirenpe uphenybnaske, savéske tumé sánas vysykliakirde, ci pir lav, ci pir amaró lyl.

16Mek Kokoró amaró Raj Devél, Isúso Xristóso, i Devél amaró Dad, Savéske jaciám dróga ame i dyjá pir bahtalypén viéčno podrikiribén i lačhí nadiéia,

17te podrikirél tumaré ile i te kerél zoraledýr tumen dro kažno lav i lačhó réndo.

← Chapter 1 Jump to: Chapter 3 →