Colossians 4

Romani Baltic Latin (Biblija - Pe Baltitko Romani čib (Romanes) 2019)

← Chapter 3 Jump to:

1Rajale, javén čačuné ke pishárja (raby), ripirén pal dová, so i tuménde isyn Xuláj dro Bolybnáskiro Rajo.

2Mangénpe Devléske saró časo, javén pe stréga parikiribnasa;

3mangénpe Devléske khetané adiáke-pac' pal aménde, sob (kaj) Devél te psiravel (te otphandel) aménge vudár vaš lav te rosphenas Xristosóskiro garadó čačipén, pal savó me som beštó dro štaribén,

4sob (kaj) me te moginav te rakiráv manušénge, adiáke syr trej.

5Dživén i lydžán pes god'vares napatiaibnaskirenca, pričhuvén iló ke kažno vakancyja (slučajo).

6Mek te javél tumaró lav saró časo bahtalypnasa i pričhude londesa, sob (kaj) tumé te džinén, syr kažnoné manušéske te otphenen.

7Pal mánde saró rosphenéla tuménge Tihiko, drógo pšal i patiaibnýtko khangirjákiro dynári i drúgo (mal) pir butý dre Raste-Devléste,

8savés me bičhadjom ke tumé vaš dová, sob (kaj) jov te udžinel pal tumaré réndy (diély) i, sob (kaj) te podrikirél tumaré ile,

9jov javéla ke tumé khetané Anisimosa, amaré patiaibnytkone i drogoné pšalesa, savó isyn tuméndyr: jone rosphenena tuménge pal saró, syr ame adáj sam.

10Piridela “ramanie” tuménge Aristarho, savó isyn beštó khetané mánca, i Marko Varnavaskiro plimieniko (bano), pal savéste me tuménge čhindjom; kóli jov javéla ke tumé, prilén les,

11i Isúso, savés prokharde Iusto, jone trindžine isyn Judendyr maškír butende malende pir butý, savé kerdé butý vaš Devléskiro Kralipén, i savé podrikirenas man.

12Piridela “ramánjo” tuménge tumaró Jepafraso, Isusóskire-Xristosóskiro pishári, savó saró časo mangelape Devléske zoralés pal tuménde, sob (kaj) tumé te javén tvarda i zoralé dro patiaibén i te kerén saró pir Devléskiri vólia.

13Paldavá me dophenava pal léste, so jov keréla drieván pharí butý pal tuménde i pal odolénde, savé dživéna ke Laodikija i ke Iierapoljo,

14piridela “ramánjo” tuménge Luka, amaró drógo sastypnari (vračo), i adiáke-pac' Dimaso.

15Piridén “ramánjo” i miré pšalénge dre Laodikija, i Nimfanoske, i léskire kheritkoné khangirjake,

16kiéli javéna te ginen davá lyl tuménde, mek te proginen les i dre khangirí Laodikiicenge, a dová lyl, savó Laodikijatyr, proginen i tumé.

17I phenén Arhiposke, mek jov te kerél syr trej dynaribén, savó jov prilyjá dre Raste-Devléste.

18Davá piridyiben “ramánjo” isyn čhindló miré, Pavliskire vastésa. Ripiren, so me som beštó dro štaribén. Mek te javél bahtalypén sarénca tuménca. Amín'.

← Chapter 3 Jump to: