Hebrews 13

Romani Baltic Latin (Biblija - Pe Baltitko Romani čib (Romanes) 2019)

← Chapter 12 Jump to:

1Sykavén patýv duredýr jekh jekhéske, syr pšála.

2Prilén ilésa manušén, savé javéna ke tumé, pir davá tumé khardé dro kher Jangolen, mek jone na džindlé len.

3Ripiren manušén, savé xane men'ki, sýrby i tumé khetané lénca sánas dro štaribén; manušén, savé stradyndle, sýrby i tumé kokoré stradynenas masenca.

4Mek te javél romandunó (suprúžesko) džiibén dre patýv pir saró, i čačipén maškír lénde te na javél magirdó; Devél javéla te sendiakirél biladžakuné manušén i manušén, savé dživéna džuvliénca syr romá bi sovlakiro.

5Na javén ĥálka (žadna) ke lové, parikirén Devléske pal saró, pal-dová so Jov phendiá: “Me na jačkirava i na mekava tut.”

6Paldavá ame zoralés rakirasa: “Devél pomoginela mánge, i mánge nane sóstyr te darav, so moginéla te kerél mánge manúš?”

7Ripiren péskire sykliakiribnar'jen (nastavniken), savé lydžiné tumen i sykliakirdé tumen Devléskire lavéske, dykhén pe léngiro džiibén ke kónco (ke jagóro); javén dasavé-pac' dro patiaibén, syr jone isyn.

8Isúso Xristóso isyn Adasavó-pac' atasiá, adadyvés i pe saré viéki.

9I na denpe, sob (kaj) javír nadžindle sykliakiribena te zmaren droméstyr tumen, pal-dová so fedýr saréstyr, sob (kaj) te podrikirél tumaró iló Devléskiro bahtalypén, a na xabena, savé na jandlé nisavó šukaripén odolénge, savé zalenape dalésa.

10Aménde isyn altárjo, savéstyr na moginéna te xan odolé manušá, savé keréna butý vaš Devléske dre šátra;

11pal-dová so riskiribnáskire-murdalengire trúpy, savengiro rat Anglatunó Judéngiro Rašáj ianéla dro Svénto Štéto syr svénto dyibén pal grého, xačkirena pal davá stáno (lod),

12paldavá i Isúso, sob (kaj) te svencynel manušén grehéndyr Péskire ratésa, menčyndiape pe meribén pal fóro:

13i paldavá vydžasa ke Jov pal fóro, sob (kaj) i aménge te lydžas pe péste dasavo xoliamó saben manušéndyr, syr Jov:

14pal-dová so aménde pe daja phuv nane stalo fóro, i ame rodasa fóro, savó javéla viéčno dro Bolybnáskiro Rajo.

15Paldavá javása saró časo pir Isusóste te slavinas Devlés lavéngire-sventoné dyibnasa, – davá isyn amaré lavá, kiéli ame pridžinasa, so Jov isyn amaró Raj Devél.

16Na bistren te kerén lačhipén javire manušénge i te dielinenpe (te ulavenpe) (te den kotér (kusko) iléstyr) javire manušénca, pal-dová so dasavé lačhé réndy, sýrby svénto dyibén isyn lačhó Devléske.

17Kandén péskire sykliakiribnar'jen, savé lydžána tumen, kerén saró, so jone phenéna tuménge; pal-dová so jone saró časo pekenape (zabotisona) pal tumaró dúho (fáno), jone isyn sýrby manušá, savé javéna te otphenen angíl Léste, sob (kaj) jone te kerén radymása davá, a na te den ĥondiá (na te ŭzdyhinen), tedy na javéla fededýr tuménge.

18Mangénpe pal aménde: ame zoralés patiása, so ame saró kerása žužé patyvása i dživasa pir čačipén.

19Me drieván mangáva tumen te mangénpe, sob (kaj) me mogindjom sygedýr te risjovav ke tumé.

20Devél, Savó déla ramánjo (miro), Savó otdžidiakirdiá muléndyr amaré Ras-Devlés, Isusós Xristosós, Baré Čhupnaris pir rat viečnone Zavietostyr,

21mek te del Jov zor tuménge te kerén butý lačhés, sob (kaj) te kerén saró tumé pir Léskiri vólia. Mek Jov pir Isusóste Xristosóste te kerél dová dre aménde, so isyn lačhó Léske, Savéske te javél sláva pe saré viéki’. Amín'.

22Me drieván mangáva tumen, pšalále, te prilén miro lav syr podrikiribén, me nábut i čhindjom tuménge.

23Džinén, so amaré pšalés Ximás vymekne štaribnastyr; kóli jov javéla syg adarík, me javáva khetané lésa ke tumé.

24Piridén “paklono” tumaré sykliakiribnar'jenge, savé lydžána tumen, i saré sventoné manušénge. Piridena “paklono” tuménge manušá Italijatyr.

25Mek te javél bahtalypén sarénca tuménca. Amín'.

← Chapter 12 Jump to: