Hebrews 5

Romani Baltic Latin (Biblija - Pe Baltitko Romani čib (Romanes) 2019)

← Chapter 4 Jump to: Chapter 6 →

1Pal-dová so kažno anglatunó rašáj lélape manušéndyr i čhuvélape vaš manušénge, sob (kaj) te dynarinél Devléske: te janel svénto dyibén i dáry pe altárjo vaš grehengiro otmekiben;

2a pal-dová, so adasavó rašáj kokoró nane zoraló pir saró, Jov moginéla te sykavél kovlypen ke manušá, savé na džinéna i odolé, savé zmardepe čačuné droméstyr,

3i pal léskiro bizorjakiriben léske trej te janel svénta dyibená, syr pal péskire, adiáke-pac' i pal manušéngire gréhi.

4I nijékh na moginéla (na dela ráda) te lel patýv te kerél daja butý vaš Devléske kokoró péstyr, a kodová, konés Devél čhudiá, adiáke-pac', syr i Aronos (Aaronós).

5Adiáke-pac' i Xristóso na Kokoró Péske dyjá daja sláva te jačél Anglatuné Rašása, ne davá kerdiá Devél, Kon phendiá Léske: “Tu san Miro Čhavó, Me jacjom adadyvés Tyré Dadésa (Tyró Dad).”

6Jov adiáke-pac' rakiréla dro javír štéto: “Tu javésa Rašáj pe saré viéki, adasavó-pac' pir rašaipen, syr Mielhisedeko sys.”

7Kiéli Xristóso dživdiá pe phuv, Jov baré godlása i jasvénca mangdiá i mangdiápe Devléske, Kon mogindiá te zrakhél Les meribnástyr. Devél šundiá Les pal Léskiri dar angíl Léste;

8mek Jov sys Devléskiro Čhavó, Jov vysyklyja te kandel pir Péskire mén'ki;

9i kiéli Xristóso kerdiá ke kónco / jagóro (spolnindia) davá saró, Jov jaciá i te zrakhél manušén pe saré viéki, savé kandéna Les,

10i Devél priĥalyja Les Anglatuné Rašása adasavesa-pac', syr sys prilyno pir rašaipen Mielhisedeko.

11Aménge trej te rakiras but pal davá, ne davá isyn pharó te piriphenas tuménge, pal-dová so tumé ĥaljona povólin'kes (nasyges).

12Pal-dová so tuménge pal davá časo treindiá kokorenge te sykliakirén manušén; ne tumen nevéstyr trej te sykliakiras pal anglatuné čačipená pal Devléskiro lav, i tuménge iščo (inké) trej thud te p'jen, a te na xas čačunó xabén, pal-dová so tumé san sýrby čhavoré.

13Kažno, kon dživéla pe thud, na ĥaljola sykliakiribén pal čačunó lav, pal-dová so kadasavó manúš isyn sýrby bijáto (čhavoró),

14ne stala manušá moginéna te xan čačunó xabén, pal-dová so jone vysyklyne džiibnastyr i pir godý te phenén rozn', kaj isyn lačhipén i kaj isyn fuipén.

← Chapter 4 Jump to: Chapter 6 →