James 3

Romani Baltic Latin (Biblija - Pe Baltitko Romani čib (Romanes) 2019)

← Chapter 2 Jump to: Chapter 4 →

1Pšalále miré! Mek tumé te na saré ginen pes sykliakiribnaskirenca, pal-dová so tedy amen javéna te sendinén baré strogimasa.

2Pal-dová so ame saré častes obštavasape pir grého. Kóli vari-kon na keréla grého lavésa, odová manúš isyn bidošakiro, savó moginéla te phandel sýrby cuglienca saré péskire masá.

3Ĥáda, ame čhuvasa cugli (udily) dre muiá grenge, sob (kaj) jone te kandén amen, i tedy ame rikirasa zor pe saré léngire masá.

4Adiáke-pac' i pármy (korabli), savé jone te na javén baré i saví zoralý balvál len te na tradel, len lydžála nabaré ruljosa (sterosa) parmakiro steritko (rulitko), karik jov zakaméla.

5Adiáke-pac' i čib isyn, xaj, nabari paš amaré masengiri, ne but šarelape. Dykh, saví isyn nabari jag, ne syr baró veš joj xačkiréla.

6Čib-davá isyn sýrby doiá-pac' jag, savjátyr moginéla te javél but fuipén; čib isyn maškirál amaré masengire pašá, so kaliakirela saró i moginéla te shačkirel saró amaró džiibén jagása, saví džála liunostyr (adostyr).

7Pal-dová so sarén murdalén i čiriklien, sarén džidalen, savé isyn pe phuv i dro paní, manúš léla zor pe lénde, sob (kaj) jone te kandén les.

8Ne čib nikón manušéndyr na moginéla te phandel; davá isyn čoripén, savó naštý te urikires, joj isyn pherdý meribnytkone trutasa (jadosa).

9Čibasa (čibjasa) barjakirasa ame Devlés-Dadés, i košasa manušén, savén Devél sozdyjá pir Péskiro dykhibén.

10I kadalé-pac' uštendyr džála lavengiri bari patýv i košybén. Pšalále miré, na trej, sob (kaj) adiáke te javél.

11Ci moginéla te thadel jekhe ĥanyngatyr gudló i kirko paní.

12Pšalále miré, na moginéla inžyritko kašt te bijanél masliny, ci vinagradoskiri rand' inžyro? Adiáke-pac' i jekhe ĥanyngatyr na moginéla te thadel londo i gudló paní.

13Kon isyn tuméndyr te javél god'varó i te džinél saró; mek jov te sykavél davá pe réndo péskire lačhé džiibnasa i kovlé-ilytkone godypnasa;

14ne kóli dro tumaró iló tuménde isyn kirko zevlynypén i tumé keréna pir xolý, tedy na šarenpe vučés i na xohaven pe čačipén.

15Davá nane godypén, savó džála bolybnástyr, jov isyn phuvjákiro, biduhoskiro i džála nalačhestyr.

16A kaj isyn zevlenypen i xolý, odój javéla syr búnto maškír manušénde i saró čoripén.

17Ne godypén, savó džála bolybnástyr, angledýr saréstyr jov isyn žužó grehostyr, ramanjono, štyl (tiho), vyrikiréla but, na phandela manušés, isyn pherdó tangipnasa i lačhé rendénca, sendinela šerá (rávnes) manušén, nane dujemitko.

18A čačipén déla aplodo odolé manušénge, savé kokoré keréna ramánjo (miro) i pričhuvena zor vaš davá.

← Chapter 2 Jump to: Chapter 4 →