James 5

Romani Baltic Latin (Biblija - Pe Baltitko Romani čib (Romanes) 2019)

← Chapter 4 Jump to:

1Kakaná šunén tumé, barvalé manušále, rovén i godlen zoralés angíl xasibén, savó javéla pe tuménde.

2Barvalypén tumaró kirnyja, i uribén xaja mel' (mol')

3Pe tumaró suvnakáj i rup irža lyjá upralypén, daja irža javéla syr dophenybén pe tuménde, i shala tumaré masá syr jag. Tumé skedyné péske kučipén pe palatuné dyvesá.

4Ĥáda, isyn mazúri (nagrada), saví tumé na dopleskirde butiarnenge, savé ukedenas maró tumaré feldatyr, dalé lové déna ĥodla jasvénca i léngiri gódla dogijá ke bolybnáskire-jangoléngiro Raj Devél.

5Tumé dživdé dro barvalypén pe phuv vaš péskire-maséngiro kamiben; tumé čaliakirde tumaró per pe xasiakiriben;

6tumé sendindle i muliakirde manušén, savoe sys čačunoe; jone na sys proti tuménde.

7Pšalále, vyrikiren ĥará (dlúges), paka javéla Raj Devél. Ĥáda, ĥavitko manúš užakiréla aplodo phuvjátyr i vaš leske jov užakiréla ĥará (dlúges), paka javéla tasiarluno (rannjo) i koriguno (pozdnjo) bryšýnd.

8Tumé adiáke-pac' vyrikiren ĥará (dlúges): javén zoraledýr péskire ilenca dro patiaibén, pal-dová so Devél javéla syg pašyledýr.

9Pšalále, na den ĥondiá (na uzdyhinen) xoliása jekh pe jekhéste, sob (kaj) tumé te na javén sendindle. Ĥáda, isyn terdó Sendári pašýl vudár.

10Pšalále miré, sykljon prorokendyr, syr jone stradyndle i syr ĥará jone užakirde, savé rakirdé Devléskire lavéstyr.

11Ĥáda, ame ginasa bahtalenca odolé manušén, savé sys zoralés terdé dre mén'ki. Tumé šundlé pal Iovaskiri tvárdyma dre mén'ki i dykhné, so jov doresciá dro kónco (dro jagóro) Devléstyr, pal-dová so Devél drieván tanginela i žalinela manušén.

12Angíl saréstyr, miré pšalále, na sovlahan ni bolybnasa, ni phuvjása, i nisave javire sovlahasa; ne mek te javél tumaró lav “ny, ai”, syr “ny, ai”, a tumaró lav “nad” syr “nad”, i tumé na javéna tel séndo.

13Ci vari-kon tuméndyr menčynelape? Mek jov te mangélpe Devléske. Ci isyn vari-kon rado tuméndyr? Mek jov te bagal psalmy.

14Ci isyn vari-kon nasvaló tuméndyr? Mek jov te kharel ke pe godephuren Khangirjátyr, i mek jone te mangénpe Devléske pe léste, i mek jone te makhen les olivitkone dzetesa vaš Devléskiro lav;

15i mangipén Devléske patiaibnása vysastiakirela nasvales i Devél keréla zoralesa les; a kóli jov kerdiá gréhi, tedy saró javéla otmekno léske.

16Pridžinen péskire gréhi jekh angíl jekhéste, sob (kaj) tumé te vysastjon: čačuné manušéskiro mangipén keréla bari butý.

17Proróko Ilíia sys adasavó-pac' manúš, syr i ame sam, ne jov saré iléstyr mangdiápe Devléske, sob (kaj) te na javél bryšýnd; i na sys bryšýnd pe phuv trin berš i šov čhoná,

18i nevéstyr mangdiápe Devléske jov, i bolybén dyjá bryšýnd, i phuv nevéstyr lyjá te del aplodo.

19Pšalále miré, kóli vari-kon tuméndyr zmarelape čačuné droméstyr, ne javír manúš riskiréla les pale ke Devél,

20mek te džinél odová manúš, so kodová manúš, kon riskirelas pale ke Devél grehitkoné manušés, jov zrakhéla les meribnástyr, i but léskire gréhi javéna garadé.

← Chapter 4 Jump to: