Lamentations 4

Romani Baltic Latin (Biblija - Pe Baltitko Romani čib (Romanes) 2019)

← Chapter 3 Jump to: Chapter 5 →

1Syr kalyja suvnakái! Syr parudyja žužó suvnakái! Bará sventoné štetóstyr rosčhurdyne pir kažno venglo, kaj gásy rozdžana.

2Dróga Sionoskire čhavé, savé isyn mol syr žužó suvnakái, syr da lénge déna patýv sýrby ĥlejakire sudinkenge, so kerdiá kučikengiro (goršečniko).

3Až i rupuči [čudoviščy / šakalihi-ju.o.] déna ciucia te čaraven péskire tyknen, ne miré – manušéngire čhaja jačné pharé-iléskire sýrby strausy čhučé prahendyr.

4Tykné-masengiri čibori uhtylelape zoralés pal taloj dro léngiro mujoro, syr kaména paní: tykné bijaty mangena maró, ne nijékh na phagiréla (na déla) koteroro lénge.

5Kodolé, kon xaja delikatesy, isyn nábut so džidé pe vulícy (pe gásy); kodolé, konés barjakirdé dro loló plaščo, oblena kučy ĥnejo.

6Pharó-sendiakiriben pal čoripén, so kerdé miré-manušéngire čhaja, isyn zoraledýr pharé-sendiakiribnastyr, so doresné pal Sodomoskiro grého. Dová fóro sys rado telé pal jekh menta (minuta) adiáke, so nijékh na dyjá ráda te podel vast.

7Jerusalimóskire thagárja sys jasnedyr ivestyr i parnedyr thudestyr; jone sys lolikanedyr, dre masá rubinendyr; jone vydycjonas sýrby sapfiry.

8Kakaná jone vydycjona kaledyr boveskire meliatyr, jone džána pir gásy, len na pindžkirena. Léngiri cýpa uhtylelape zoralés ke léngire kokalý, joj vyšutija i jaciá syr kašt.

9Kodolenge, konés muliakirdé kurtalása, isyn bahtaledyr adalendyr, savé meréna bokhátyr. Pal-dová so jone našavena povolin'kes (liéntes) zor i kljoko, pir dová, so na uhtyléla (nádosi) feldýtka aplody.

10Vastá lačhé-iléskire džuvlién kerade péskire bijatén: jone sys mas lénge, kiéli pyjá bedypen pe Jerusalimóskire manušénde.

11Raj Devél vypherdiakirdia péskiri bari xolý, Jov vyčhudiá Péskire-xoliakiri jag. Jov xačkirdiá jag pe Sióno, i joj pohaia sarésa foróskire fundamienty.

12Králja pe phuv i saré džiibnarja pe svéto na patiandyné, so namal i vérgo zadžála dre Jerusalimóskiri pórta, –

13saró davá pal foróskire prorokénde i pal léngiro – rašángiro čoripén, kon pročhude čačuné – manušéngiro rat maškír davá fóro.

14Jone psirdé syr kororé pir gásy, jene magirdé pes ratésa adiáke, so nijekhe manušéske sys naštý te čilavel léngire ídi.

15Manušá dénas gódla pe lénde: “Džán krig, magirdé! Džán krig! Džán krig! Džán! Na čilaven amen.” Syr jone psirdé trusciál Najudénde, isys phendló maškír lénde: “Jone na dživéna butýr adái!”

16Ráskire-Devléskiri xolý roskerdiá len pe pašá. Jov na javéla te kerél patýv lénge. Nikón na kutiakirdia ni rašán, ni sykadiá láska ke godephuré.

17Amaré jakhá khinyne te dykhén ivjá (darmes), so vari-kon podela vast aménge. Ame dykhciam amaré vučardiatyr (bašniatyr) pal manušénde, savé na dyné ráda te zrakhen amen.

18Amaré vérgi tradynepe pal aménde pir amaré špery (sliady), so ame na mogindiam te džas javrí pe gása. Amaró kónco (jagóro) isyn pašýl, amaré dyvesá syg končynenape, pal-dová so javdiá amarí xas'.

19Amaré šale sys sygedýr kidendyr (orlendyr) pe bolybén, jene tradynepe pal aménde dre bérgi; jone užakirde čorahanés amen pe čhučé prahi.

20Amaré kralís, savó isyn sýrby maró dre amaró džiibén, konés Raj Devél pomakhcia syr kralís, uhtyldé dre léngire ganbinia. Pal léste ame phendiam: “Ame javása te dživás maškír Najudénde tel léskiri zer (tienjo).”

21Rádynpe i jav viesjolo (xotno), Edomoskiri Čhaj, kon dživéla pe phuv Uz. Tahtáj adiáke-pac' javéla pirdál ke tu: tu matjosa, i tu nangiakiresa pes.

22O, Sionóskiri Čhaj, pharó sendiakiriben končyndiape: Raj Devél na javéla te lydžál tut krig dro pliéno. Ne Jov sendiakiréla tut pal Tyró čoripén, Edomoskiri Čhaj. Jov otčhakirela tyré gréhi.

← Chapter 3 Jump to: Chapter 5 →