Mark 8

Romani Baltic Latin (Biblija - Pe Baltitko Romani čib (Romanes) 2019)

← Chapter 7 Jump to: Chapter 9 →

1Dre dola dyvesá, kiéli nevéstyr sys but manušá, i manušénge adalenge na sys nisó te xan, Isúso khardiá sykliaibnytkonén i phendiá:

2“Mánge isyn tango (žalko) adalen manušén, jone trin dyvesá isyn Mánca i lénde na jaciápe xabén;

3kóli Me rozmekava krig len pir kherá bokhalenca, jone pir drom vymarenape zorjátyr, pal-dová so but léndyr javné durál.”

4“A syr ame adáj pe dasavo štéto, kaj nisó nane, lathasa adákicy maró, sob (kaj) sarén te čaliakiras?” – otphendlé sykliaibnýtka.

5“Kicý tuménde isyn laby maró?”, – phuciá tedy Isúso. “Eftá (bitrinéngiro deš)”, – phendlé sykliaibnýtka.

6Tedy Isúso phendiá sarénge te bešén pe phuv, lyjá eftá laby, parikirdia Devléske pal davá, phagirdiá maró i lyjá te piridel len sykliaibnytkonénge, a odolé rozdenas maró manušénge.

7Lathnepe lénde i nabutka mačhé; Isúso parikirdia Devléske pal lénde i phendiá sykliaibnytkonénge te rozden len.

8Saré xané i čalyne i koterá, savé jačnépe, jone skedyné dre eftá korzíny (khudé).

9Sarén, kon xaja, sys štar tysjoncy manušén. Tén'ci Isúso rozmekcia manušén,

10I jekhátyr Jov besciá dre bárka i khetané sykliaibnytkonénca javdiá ke Dalmanufakire štéty.

11Odój ke Isúso podginé Farisiéi i lyné te dophenen Léske. Lénge treindiá te uhtylén Les dro lav i jone trebindle Léstyr ĥiertýk (znamiénijo), sob (kaj) te sprobinen Les.

12Isúso xor dyjá ĥondiá i phendiá: “Palsó adalé manušá trebinena dívy? Rakiráva tuménge čačipén: ni saví ĥiertýk tuménge na javéla.”

13Jov jačkirdiá len, nevéstyr besciá dre bárka i dyjape pe javír rig.

14I sykliaibnýtka bistyrde te len pésa maró, lénde dre bárka sys jekh marikly.

15Pir drom Isúso lénge priphendiá: “Dykhén, rakhénpe Farisiejengire roščynatyr (zakvaskatyr) i kralískire Irodoskire roščynatyr.”

16I lyné jone te rozduminen maškír péste: “Palsó da Jov rakiréla pal droždžy? Naúšto paldová, so ame na lyjam peso maró?”

17Isúso udžindiá davá, phendiá lénge: “Rakiribén na pal dová, so tumé na lyné maró. Naúšto usajékh tumé kakaná na dykhéna, i na ĥaljona? Naúšto ile tumaré sarésa zašutine?

18Naúšto, kóli tuménde isyn jakhá, tumé usajékh na dykhéna? Isyn kaná, tumé usajékh na šunéna? A syr ža tumé na ripirena.

19Kóli Me phagirdjom pandž maré pe pandž tysjoncy manušénde, kicý pherdé korzíny (khudé) koterenca tumé skedyné?” “Dešudúi”, – rakiréna Léske.

20“Ne kóli Me eftá (bitrinéngiro deš) labenca čaliakirdjom štar tysjoncy manušén, kicý pherdé khudé koterenca tumé skedyné?” “Eftá”, – phendlé jone Léske.

21Isúso phendiá: “Ne syr ža tumé usajékh na ĥaljona?”

22Jone javné dre Vifsaida; ke Isúso jandlé korores, i mangné Les, sob (kaj) Jov te čilavel les.

23Isúso lyjá korores pal vast, lydžijá gavestyr, čungardia pe léskire jakhá, čhudiá vastá upré pe léste i phuciá: “Dykhésa vari-so?”

24Odová podykhciá trusciál (krugom) i rakiréla: “Dykháva manušén; jone psiréna sýrby kaštá (drevy).”

25Isúso iščo (inké) jékhvar čhudiá vastá léske pe jakhá, odová manúš podykhciá kučes i sastija, jov jaciá te dykhél saró jasnes i šukár!

26Isúso bičhadiá les kheré priphenybnasa: “Ne džá pale dro gav i na rákir ni konesa odój.”

27Isúso sykliaibnytkonénca giné Galilejatyr dre gavá Kiesarijakire Filiposkire. Pir drom Isúso phuciá Péskire sykliaibnytkonendyr: “Pal konéste Man priléna manušá?”

28Sykliaibnýtka otphendlé Léske: “Jekh rakiréna, so Tu san Iáno Boldeipnari; javír rakiréna, so Tu san Ilíia; trita, so Tu san jekh ĥaratuné prorokendyr.”

29“A tumé pal konéste Man ginéna?” I Pétri otphenéla Léske: “Tu san Xristóso.”

30I Isúso priphendiá šylales lénge te na rakirén ni konéske pal davá.

31I Isúso lyjá te sykliakirél len, so Manušéskire Čhavéske javéna darane mén'ki, so Les na priĥaljona godephuré i rašángire barydyrá, so Jov javéla muliakirdo, i pir trin dyvesá Jov otdžidjola.

32Jov mamúj (priames) rakirélas pal davá. I Pétri khardiá Les dre rig i lyjá te vyrakirel Les.

33Isúso risijá i dykhciá Péskire sykliaibnytkonén i priphendiá šylales Petriske: “Krig Mándyr, nálačho! Tu duminesa pal manušýtko, a na pal Devlýtko.”

34I Jov khardiá manušén i Péskire sykliaibnytkonén i phendiá lénge: “Konéste isyn pe iló te džal pal Mánde, mek te otphenelpe péstyr, mek te lel trušúl péskiro i te džal pal Mánde.

35Pal-dová so, kon myslinela dro iló džiibén péskiro te zrakhél, odová xasiakiréla les, i kon otdéla džiibén péskiro pal Mánde i pal Jevángielija – odová zrakhéla les.

36Ne savó lačhipén javéla manušéske, kóli léste javéla saró, so léske trej dalé svetóstyr, a jov xasiakiréla péskiro viéčno džiibén.

37Naúšto saštý (moginéla) te javél pe svéto vari-so, so isyn kučedyr péskire viečnone džiibnastyr?

38Kon kadavá grehitkoné i biladžaipnytkone rodóstyr ladžala Mándyr i lavéndyr Mirendyr, odoléstyr i Čhavó Manušéskiro ladžala, kiéli javéla dre Dadéskire – Péskiri jarko sláva sventoné Jangolenca.”

← Chapter 7 Jump to: Chapter 9 →

Recommended Reading

Commentary Mark Commentaries → Devotional Mark Devotional Guide → Get This Bible Romanes Study Bible →