Romans 12

Romani Baltic Latin (Biblija - Pe Baltitko Romani čib (Romanes) 2019)

← Chapter 11 Jump to: Chapter 13 →

1Paldavá, pšalále, me mangáva tumen Devléskire tangipnasa, te otdén pes sarésa syr svénto džidó otdyibén i savó trej Devléske vaš tumaró god'varó dynaribén (služenije) Léske godiása i ilésa.

2Na dživén adiáke, syr adalé-viekoskire manušá dživéna, ne paruven pes, neviakiren tumarí godý, sob (kaj) tuménge te džinén, so Devléskiri vólia isyn lačhí, bidošengiri i čačuný.

3Paldavá me rakiráva kažnonéske tuméndyr: na duminen pal péste butedýr, syr trej te dumines; ne duminen god'vares pir tumaró patiaibén, savó Devél dyjá kažnonéske tuméndyr.

4Paldavá, syr manušéste isyn jekh masá i but pašá dre léste, ne na saré pašá, so ke jekh, keréna dová-pac';

5adiáke-pac' i ame saré khetané sam sýrby jekh masá dre Xristosóste, a kóli ame na sam khetané, tedy ame sam pašá jekh jekhéske.

6Ne paldová, syr aménde isyn rázna talany pir bahtalypén, savó isyn dynó aménge, tedy javása te dynarinás Devléske lénca, konéske isyn dynó taláno: te javél proróko, mek te rakirél pir patiaibén, savó isyn léste:

7kóli vari-konéske dynó te pomoginel javirénge, mek odová manúš te pomoginel; ci, kóli vari-konéske dynó te javél sykliakiribnáskiro, mek odová manúš te sykliakirél.

8Ci, kóli vari-konéske dynó te podrikirél manušén, mek odová manúš te podrikirél; kóli vari-konéske dynó te rozdel čororenge, mek odová manúš te na tanginél, mek te del saré iléstyr; ci kóli vari-konéske dynó te javél rása, mek odová manúš te kerél mištés péskiri butý. Kóli vari-konéske dynó te dykhél pal javirende, mek odová manúš te kerél davá radymása.

9Mek te javél čačuný tumarí pšalýtko patýv; risjon krig fuipnastyr i kerén lačhipén:

10sykavén patýv jekh jekhéske pšalytkone patyvása i tanginen jekh jekhés: kutiakiren (važynen) jekh jekhés;

11na javén kirné-maséngire, xačon duhósa, kiéli tumé dynarinena Devléske.

12Radynénpe dro tumarí nadiéia: javén zoralé (tvarda) dro piridživipen; ŭsády (sak) mangénpe Devléske;

13pomoginen (poden vast) Devlytkoné manušénge, kiéli lénde isyn trébima, dykhén ilésa pal odolé manušénde, savé javéna ke tumé.

14Bahtiakiren odolé manušén, savé tradéna tumen; bahtiakiren, a na košen.

15Radynénpe khetané odolé manušénca, savé radynénape, i rovén khetané odolé manušénca, savé rovena.

16Dživén syr malá (drúgi) maškír péste; na phutjon, a javén kandune; na duminen pal péste, so tumé san drieván god'varé:

17na kerén čoripén pale pal xolý nikonéske, kerén lačhipén saré manušénge;

18kóli davá saštý tumaré rigátyr, dživén dro ramánjo (miro) saré manušénca.

19Miré malá, na kerén nisavó čoripén nikonéske pal péste, pšála miré, fedýr jačkiren štéto vaš Devléskiri xolý; pal-dová so, syr isyn čhindló: “Jačkiren davá Mánge, Me keráva”, – rakiréla Raj Devél.

20I kóli tyró vérgo (vrogo) isyn bokhalo, čarav les; kóli jov kaméla te p'jel, de te p'jel léske; pal-dová so, kóli tu kerésa adiáke, tu kedesa léske pe šeró xačkirdé vangara.

21Na domek, sob (kaj) xolý te lel lófo (zor) pe túte, ne kokoró pirizorjakir xolý lačhipnása.

← Chapter 11 Jump to: Chapter 13 →