Romans 5

Romani Baltic Latin (Biblija - Pe Baltitko Romani čib (Romanes) 2019)

← Chapter 4 Jump to: Chapter 6 →

1I pal-dová so amen priĥalyne pal čačunende pir patiaibén, aménde isyn ramánjo (miro) Devlésa pir amaré Raste-Devléste, Isusóste Xristosóste,

2pir Savéste ame sam domekne pir patiaibén ke davá bahtiakiribén, dre savó ame kakaná dživasa, i ame radynasape, so aménde isyn nadiéia pe Devléskiri sláva.

3Ne na dre jekh davá isyn amarí rádyma, a ame adiáke-pac' radynasape dre amaré pharipena, pal-dová so ame džinása, so pir pharipén barjola amaró vyrikiriben.

4Pir vyrikiriben ame jačasape tvardedyr dro xaraktiero, a xaraktiero duredýr déla nadiéia.

5I amarí nadiéia na podlydžala amen, pal-dová so Devléskiri láska pir Svénto Dúho (Fáno) pherdiakirdiá amaré ile laskasa, saví dyný aménge:

6pal-dová so Xristóso, kiéli ame sámas grehítka, dro časo, Savó Devél uphendia, myjá pal nadevlytkonende.

7Ci meréla vari-kon pal čačuné manušéste? Saštý (moginéla) te javél, so pal vari-savé lačheste, vari-kon i skedéla muršypen te merél,

8ne Devél dophenéla Péskire laskasa ke ame, so Xristóso myjá pal aménde, kiéli ame iščo (inké) sámas grehítka.

9Paldavá kakaná, kiéli ame sam pridžindle čačunenca Léskire ratésa, ame butýr patiása dre dová, so ame zrakhasape pir Léste Devléskire xoliátyr.

10Kóli angledýr ame sámas vérgi Devléske i kakaná ame jaciám dro ramánjo (miro) Lésa pir Léskire Čhavéskiro meribén, tedy butýr saréstyr kakaná, syr ame jaciám dro ramánjo, ame nadieinasape te zrakhaspe Léskire džiibnasa.

11I na jekh davá, ne ame i radynasape pir amaré Raste-Devléste, Isusóste Xristosóste, pir Savéste ame doresciam (dolyjam) kakaná ramánjo Devlésa.

12Paldavá, syr pir jekhe manušéste grého zagijá dro svéto, i pal davá grého jaciá meribén, adiáke meribén jaciá pe saré manušénde, pal-dová so saré kerdé grého:

13pal-dová so grého sys dro svéto angledýr Zakonóstyr, ne grého na ginelape, kóli nane Zakóno;

14ne meribén rikirdia zor pe manušénde Adamostyr ke Mójza, adiáke-pac' i pe odolénde, kon na kerdiá dasavo grého, syr Adamo, savó sys, syr óbrazo Odoléske, Konéske treindiá te javél.

15Ne Devléskiro taláno pir bahtalypén, davá nane ž dová-pac', syr Adamoskiro grého? Pal-dová so, kóli pir jekhe-manušéskiro proštaviben but manušá myné, tedy ci pe but butýr manušá doreséna Devléskiro bahtalypén i taláno pir bahtalypén jekhe Manušéstyr Isusóstyr Xristosostyr délape vaš sarénge.

16Ne Devléskiro taláno isyn na sýrby séndo pal jekhe manušéste, savó kerdiá grého; pal-dová so grého, savó kerdiá jekh manúš, lydžála ke séndo, ne Devléskiro taláno pir bahtalypén isyn sýrby čačipnáskiro pridžinyben pal buténgire-manušéngire gréhi?

17A kóli pir jekhé-manušéskiro proštaviben meribén lyjá te rikirél lofo (zor), tedy ci pe but butedýr vól'no čačipnáskiro dáro i but but bahtalypén javéna te kralinen dro odolengiro džiibén, savé priléna len pir Jekhéste Isusóste Xristosóste:

18paldavá, syr jekheskiro manušéskiro grého jandiá séndo saré manušénge, adiáke-pac' jekhe Manušéskiro čačunó réndo pridžinela saré manušén čačunenca vaš džiibén, savó déla džiibén sarénge.

19Pal-dová so, syr pal jekhe manušéskiro nakandypen kerdépe but manušá grehitkonenca, adiáke-pac' i pal Jekhe Manušéskiro kandypen but manušá jačénape čačunenca.

20A Zakóno sys dynó, sob (kaj) te javél butýr i bicialedyr grehoskiro ĥalyibén; ne odój, kaj sys butýr grého, odój sys i butýr bahtalypén;

21pal-dová so, syr grého rikirdia zor pe meribén, adiáke-pac' i bahtalypén javéla te lydžál te rikirél lófo (zor) pe čačipén, savó janéla ke viéčno džiibén pir Isusóste Xristosóste, amaré Raste-Devléste.

← Chapter 4 Jump to: Chapter 6 →