2 Chronicles 34

Romani from Romanian (E Romaii Biblia 2020 (Kăldărărihko))

← Chapter 33 Jump to: Chapter 35 →

1O Iosia sas les oxto bărši kana arăslo thagar, thai raisardea treanda thai iekh bărši ando Ierusalimo.

2O kărdea so sî mišto angloa Rai thai phirdeea andel droma pehkă daddehkă le Davidohkă: či deape rigate lendar či ande čečirig či ande bičeačirig.

3Ando trito bărši lehkă raimahko, ta kana sas înkă tărno, lea te rodel le Devlles pehkă daddehkărăs le Davidohkărăs. Thai ando dešuduito bărši, lea te ujearăl le Iudas thai le Ierusalimos le učimatăndar, le idolendar la Astarteeakărăndar, le tipurendar čioplile thai le tipurendar šordine.

4Dea tele angla peste le altarea le Baaliengă, thai šindine le tille dine le khamehkă, kai sas opral pa lende; linčeardea le idolea la Astarteeiakă, le tipuri le čioplime thai le tipuri le šordine, kărdea le poši, thai šudea la pe le mormînturi kolengă kai andinesas lengă jertfe,

5thai phabardea le kokala le rašangă pe lengă altare. Kadea ujeardea o Iuda thai o Ierusalimo.

6Ande le četăçi le Manasohkă, le Efraimohkă, le Simionohkă, thai orta le Neftalohkă, orkai, ando maškar lengă perimatăngo,

7dea tele le altare, kărdea kotora le idolea la Astarteeiakă thai le tipuri le čioplime, kărdea le poši, thai šindea sa le tille dine le khamehkă ande soa čem le Israelohko. Pala kodea amboldi'lo ando Ierusalimo.

8Ando dešuoxtoto bărši lehko raimahko, pala so ujeardea o čem thai o khăr, tradea le Šafanos, o šeau le Açaliahko, le Maaseias, o šerobaro la četateako thai le Ioaxas, o šeau le Ioxazahko, o arhivari, te lašarăn o khăr le Raiehko, lehkă Devllehko.

9Găline koa baro rašai o Xilchia, thai dine o rup andino ando Khăr le Devllehko, kai tidinesas les ăl Leviçea le arakhaditorea le pragohko, kata o Manase thai o Efraimo, thai kata sai kolaver rig le Israelosti, kata soa Iuda thai o Beneamino thai katal manuši le Ierusalimohkă.

10Dine les andel vast le buterengă thodine la buteasa ando Khăr le Devllehko. Kadala dine les le butearengă kai kărănas buti koa lašardimos le Khărăhko le Raiehko,

11ta on dine les le kašterengă thai le vazditorengă, kaste tinen baŕ čioplime thai kašt andal phalea andoa kăptušimos le khărăngo kai rimosardesas le ăl thagr le Iudahkă.

12Le manuši kadala kărdine buti pativales ande pesti buti. Sas thodine talaoa dikhlimos le Iaxatohko thai le Obadiahkă, Leviçea andal šeave le Merarehkă, thai le Zaxariahkă thai le Mešulamohkă, andal šeave le Chexatiçăngă. Sa kukola andal Leviçea, kai jeanenas te dilaban mišto,

13dikhănas pal butea thai trdenas sa le butearen kai sas le kărdimahkă sakomoda buteandi. Mai sas i aver Leviçi, logofeçea, barimata thai udaritorea.

14Ande leaka kana ankaladine o rup kai sas andino ando Khăr le Raiehko, o rašai o Xilchia arakhlea o liil la Krisako le Raiehko, dino andoa Moise.

15Atunči o Xilchia lea o divano thai phendea le logofotohkă le Šafanohkă: „Arakhlem o lill la Krisako ando Khăr le Raiehko.” Thai o Xilchia dea o lill le Šafanohkă.

16O Šafano nigărdea le thagarehkă o lill. Thai kana dea dindimos le thagares, phendea: „Le kanditorea tiră kărdine sa so mothodea pe lengă.

17Tidine o rup kai arakhadeolas pe ando Khăr le Raiehko, thai dine les andel vast le dikhlitorengo thai le butearengă.”

18O logofăto o Šafana mai phendea le thagarehkă: „O rašai o Xilchia dea ma khă lill.” Thai o Šafana drabardea les angloa thagar.

19Kana ašundea o thagr le divanuri la Krisakă, šindea pehkă çoale.

20Thai o thagar dea kakoa mothodimos le Xilchiahkă, le Axikamahkă, o šeau le Šafanohko, le Abdonohkă, o šeau le Mikahko, le Šafanohkă, o logofăto, thai le Asaiahkă, o kanditorii le thagarehko:

21„Telearăn thai pušen le Raies anda mande thai andoa ašimos le Israelohko thai le Iudahko, dikhlimasa kal divanuri kadale lillehkă kai arakhadi'lo. Kă bari xolli šordile pa amende andai rig le Raiesti, anda kă amară dadda či nikărdine o divano le Raiehko, thai či pherdine sa so sî ramome ande kadoa lill.

22O Xilchia thai kukola tradine le thagarestar, găline kai prooročiça e Xulda, e romni le Šalumosti, o šeau le Tošexatohko, o šeau le Xasrahko, o străjero le çoalengo. Oi bešelas ando Ierusalimo, ande kolaver rig e mai čiorî la četateati. Pala so phendine so sas le phendimahko,

23oi dea le anglal: „Kadea del duma o Rai o Dell le Israelohko: „Phenen le manušehkă kai tradea tume mande:

24„Kadea del duma o Rai: „Dikta, tradaua prikăjimata poa than kadoa thai pal manuši lehkă, thai kadea sa le armaia ramome andoa lill kai drabardea pe angloa thagar le Iudahko.

25Anda kă mekline Ma thai andine tămîia avră devlengă, xollearindoi Ma anda sal butea lengă vastengă, e xolli Mîŕî šordeola pa kadoa than, thai či atărdeola.”

26Ta te phenen le thagarehkă la Iudakărăhkă kai tradea tume te pušen le Raies: „Kadea del duma o Rai, o Dell le Israelohko, dikhlimasa kal divanuri kai ašundean le:

27„Anda kă teo illo šindi'lo, anda kă meklentutele angloa Dell, kana ašundean le divanuri phendine Lestar dikhlimasa ka kadoa than thai ka lehkă manuši, anda kă mekleantutelal angla Mande, anda kă šindean te çoale thai ruian angla Ma, i Me, ašundem, – phenel o Rai. –

28Dikta, tidaua tu paša te dadda, avesa thodino ande pačea ando mormînto tiro thai či dikhăsa le iakhănça tirănça sa le prikăjimata kai tradaua le poa than kadoa thai pal manuši lehkă.” On nigărdine le thagarehkă o phendimos kadoa.

29O thagar tidea sal phurăn andoa Iuda thai andoa Ierusalimo.

30Pala kodea ankăsto koa Khăr le Raiehko, sa le manušença le Iudahkă thai sa le manušença le Ierusalimohkărănça, le rašança thai le Leviçănça, thai sa le poporosa, dă kata o mai baro ji koa mai çînoro. Drabardea angla lende sa le divanuri le lillehkă le phanglimahkă, kai arakadilisas ando Khăr le Raiehko.

31O thagr bešelas pe pehko skamin le thagarimahko, thai kărdea phanglimos angloa Rai, ujilindoi pe te phirăl pala o Rai thai te arakhăl le mothiodimata Lehkă, le sîkaimata Lehkă, thai le krisa Lehkă, anda soa illo thai anda sea lehko duxo, thai te pherăl le divanuri le phanglimahkă, ramome ando lill kadoa.

32Thai kărdea te šon pe ando phanglimos sa kola kai arakhadeonas pe ando Ierusalimo thai ando Beneamino. Thai le manuši le Ierusalimohkă kărdine buti pala o phanglimos le Devllehko, o phanglimos le Devllehko lengă daddengo.

33O Iosia dureardea sa le marimata anda sal čema le šeavengă le Israelokă, thai kărdea ta sa kola kai arakhadeonas ando Israelo te kanden le Raiehkă, lengă Devllehkă. Ande soa čiro lehka čivavako, či duri'lo kata o Rai, o Dell lehkă daddengo.

← Chapter 33 Jump to: Chapter 35 →