Song of Solomon 4

Romani from Romanian (E Romaii Biblia 2020 (Kăldărărihko))

← Chapter 3 Jump to: Chapter 5 →

1So mundro san, kamblie, so šukar san! Te iakha sî iakha gulumbakă, tala teo dikhlo. Te ball sî sar khă kîrdo busneango, ašili po gor lebarăbaŕăhko le Galaadohko.

2Te dandd sî sar khă kîrdo bakreango mîŕadea, kai anklen andoa naimos, sa jemene, thai či iekh anda lende nai stearpo.

3Le ušt tiră sî sar ăkh firo kîrmîzohko, thai o mui tiro sî mundruço; e buka tiri sî sar dopaši rodia, tala teo dikhlo.

4E koŕ tiri sî sar o turno le Davidohko, vazdino kaste avel ăkh khăr armengo; ăkh mia skuturea phanden pe lestar, sa skuturi zuralengă.

5Lidui te čiučea sî sar dui pui čerbohkă, sar le jemenea kha busneorakăvăšui, kai xan maškar le krinea.

6Ji kana šudreol pe o des, thai ji kana našen le ušalea, avaua tute, baŕbaro mirohko, thai tute, pleai tămîiako.

7San šukar dă sa, kamblie, Thai nai tu či khă bibandimos.

8Av mança ando Libano, tărnie, av mança ando Libano! Dikh andoa gor le barăbaŕăhko Amanahko, andoa gor le barăbaŕăhko Seniro thai le Xermonohko, andal gardimata le leiengă, andal baŕlebară le pardošengă!

9Čiordean muŕo illo, pheneo, tărnie, čiordean muŕo illo khă dikhlimasa, dăsar iekhăsa andal lançuçuri kata ti koŕ!

10So astardimos ande te răzgăimata, phene, tărnie! Le răzgăimata tiră kučearăn mai but sar e moll, thai le mirezme tiră sî mai čeailimahkă sar sal mirezme!

11Avdin piteal andal ušt tiră, tărnie, avdin thai thud sî tala ti šib, thai o khandimos te çoalengo sî o khandimos le Libanohko.

12San khă bar phandadi, phene, tărnie, khă isvoro phandado, khă xaing pečetluime.

13Le šeave tiră sî khă bar rodiiendi, le mai lašença roade, kale mălinea thai nardo;

14nardo thai šofrano, papura khandimatasti thai skorçišoara, sako modença tufarença tămîiakărănça, smirna thai aloia, le mai lašença mirezmença.

15Khă xaing andal barea, khă isvoro paiença juwinde, so thawdel andoa Libano.

16Uštita, krivăçule! Av, braval katar karingavelodes! phurden pa mîŕî bar, kaste pitean le khandimata anda late! – Te šol pe muŕo kamblino ande pesti bar, thai te xal anda lakă roade le Alosarde!

← Chapter 3 Jump to: Chapter 5 →