Song of Solomon 5

Romani from Romanian (E Romaii Biblia 2020 (Kăldărărihko))

← Chapter 4 Jump to: Chapter 6 →

1Me šoama ande mîŕî bar, phene, tărnie, tidau e smirna mîŕă mirezmença, xau o stupo le avdinehko mîŕă avdinesa, peau e moll mîŕă thudesa… – Xan, amal, pen thai mateon kamblimastar! –

2Sutemas, ta o illo sas ušteado… sî o mui mîŕă kamblimenehko kai marăl: „Pîtăr mangă, phene, kuči, golumbo, bibezexalio! Kă o šero sî mangă pherdo iasfčeareati, le zbîrlea sî mangă pherde le piteaimatar la reateakă.” –

3„Šudem mîŕî raxami, sar te xureava ma pale? Xaladem mîŕă pînŕă: sar te melarau le pale?

4Ta o kamblino muŕo šutea o vast pai xîv le drugosti, thai falea ma nasul lestar atunčea.

5Uštilem te pîtrau mîŕă kamblimenehkă, ando čiro kai pa mîŕă vast pitealas Eesmirna, thai pa mîŕă naia pitealas e mai alosardi smirna pe le mînere le drugohkă.

6Pîtărdem mîŕă kamblimenehkă; ta o kamblino muŕo teleardeasas, Kărdilosas bidikhlo. Čealadiuas, kana delas mangă duma. Rodem les, ta či arakhlem les; dem mui pe leste, ta či deamaanglal.

7Le pîndarea kai den roata e četatea arakhle ma; marde ma, dukhade ma; line muŕo dikhlo le străji pal zîdurea.

8Rudi tume phabarimasa, šeia le Ierusalimohkă, te arakhăna mîŕă kamblmenes, so phena lehkă?… Kă sîm nasfali kamblimatastar! –

9So sî te kamblimenes mai but dă sar aver, o, kutea e mai šukar maškar le juwleango? So sî te kamblimenes mai but dă sar aver, ta rudis ame kadea iagasa? –

10O kamblno muŕo sî parno thai lollo, anklindoi anda deši mii.

11O šero lehko sî khă kununa sumnakui uji, le le ball lehkă sî sar varesar valuri, sî kale sar o korbo.

12Le iakha lehkă sî sar varesar gulumbea pe rig le isvoarăndi, naiarde ando thud, thai xodindoi pe ande lehko mui o pherdo.

13Le bučii lehkă sî sar varesar thodimata mirezmengă, ande save bareon straturi sungaimahkă; le ušt lehkă sî sar varesar krinea, anda savi thawdel e mai alosardi smirna.

14Le vast lehkă sî varesar angrustea sumnakune, thodine andel baŕ le xrisolitohkă; o stato lehko sî khă tipo fildešohko lustruime, garado andel baŕ le safirohkă;

15le pînŕă lehkă sî sar varesar tille marmorakă parne, thodine pe varesar temelii sumnakahkă ujehkă. O dičimos lehko sî sar o Libano, fal khă tărno alosardo sar le čedrea.

16O taloi lehko sî dăsar guglimos thai sa lestii fiinça sî pherdi drabarimos. Kadea sî muŕo kamblino, kadea sî o kučii muŕo, šeia le Ierusalimohkă! –

← Chapter 4 Jump to: Chapter 6 →