1 Corinthians 16

Romani Sinte 2024 (O Debleskro Lab 2024 (Sinte-Manouche))

← Chapter 15 Jump to:

1Kanna kamau te rakrell pral i love, hoy t'mer khetne čivenn i patslenge. Krenn kova yaake, har me les ninna penom kol patslenge an o them Galatia.

2Hako kourko čivell hakeno t'mendar yaake boud love ap i rig, har leske djala. Yaake hounte čivenn kol love gar khetne ap ko dives, kay vau pash t'mende.

3Te vom pash t'mende, rodenn t'menge morshen vin, kay hi mishto an t'mare yaka. Oun me bičrau len kol loventsa an o foro Yerusalem, oun dau len lila peha, hoy dren činlo hi, koneske kol love hi oun konestar.

4Te vals mishto, te djap me ninna koy, palle nay djan le mantsa.

5Miro drom pash t'mende djal pral o them Macedonia. Kote ačau gar, vau yaake sik har djala pash t'mende.

6Kamau i tsiro pash t'mende te ačell. Te djala, ninna pral o vend. Te djau me doureder, palle vals shoukar, te venn t'mer mantsa i tikno kotar drom.

7Kava kopo kamau gar te vap pash t'mende i tikno tsireske. Me kamoms te ačap i rah tsiro pash t'mende, te kamell o Devel kova ninna.

8Kate an o foro Efesus ačau, bis te vell ko baro dives, hoy kharella Fingsta.

9Kate nay boudrau me mishto o Debleske, ninna te hi kate boud menshe, kay krenn mange miri boudi phares.

10Te vell o Timoteo pash t'mende, palle len les yaake mishto pre, te vell les kek traash. Oun te dikell kek ap leste tele! Yob boudrell ninna o Debleske har me. Te vell lo pale pash mande, djan i kotar drom leha! Me oun i phrala, kay pash mande hi, ačah kate yaake rah, bis te vas lo pash mende pale.

12Boud kope penom me ap maro phraleste Apollo, te vell yob kol vavar phralentsa pash t'mende. Yob kamell kova kanna gar. Te vell i mishto tsiro, vell lo pash t'mende.

13Denn garda, te ačenn an o patsepen! Ma trashenn! Ačenn zoreles!

14Lauter, hoy t'mer krenna, krenn dran o kamlepen o tselo djiyestar!

15Mire phrala, t'mer prindjrenn o Stefano oun kolla, kay an leskro kheer djivenna. Yon hi kol patsle, kay glan i tsele vavarende an o them Akaya ap o Yezouseste patsan. Yon boudrenna pengri tseli zoryah i patslenge. Mangau t'men,

16shounenn ap kolende oun ap savende har yon, kay boudrenn o Debleske pengri tseli zoryah!

17Me hom barhtelo, kay vas o Stefano, oun o Fortunato, oun o Akayko pash mande. T'mer nay van gar. Doleske hom barhtelo, te nay van yon pash mande.

18Yon kran miro dji zoreles, yaake har yon ninna t'mare djia zoreles kran. Rikrenn t'men ap save menshende!

19I tsele patsle an o them Akaya penenn t'menge lače laba. Ninna kol douy, o Akvila oun i Priska, oun kol vavar patsle, kay khetne venna an lengro kheer, penenn boud lače laba ap t'mende, kay han lengre phrala oun phenya an o patsepen.

20I tsele patsle penenn t'menge lače laba. Penenn t'menge lače laba, oun taprenn t'men trouyel, oun denn t'men i čoum. Koleha sikrenn t'mer, te han phrala oun phenya an o patsepen.

21Ačenn o Debleha! Kova činau me, o Paulo, miro vasteha.

22Koon o Yezouses, maro rayes, gar kamella, ap koleste vell i bibarht! Maranatha!

23O lačepen maro rayestar, o Yezousestar, djal t'mentsa!

24Me kamau t'men lauteren o djiyestar. Mer ham yek an o Yezous Kristeste.

← Chapter 15 Jump to: