1 Corinthians 3

Romani Sinte 2024 (O Debleskro Lab 2024 (Sinte-Manouche))

← Chapter 2 Jump to: Chapter 4 →

1Mire phrala, me nay rakrom t'mentsa gar har patslentsa, kay djivenn yaake, har o Debleskro Dourho kamella. Me hounte rakrom t'mentsa har kolentsa, kay djivenn pengro phouro djipen. T'mer hans har tikne čave an o patsepen.

2Me dom t'men thoud te piyell, oun kek mass te rhal. Kova nay dandran t'mer gar. Ninna kanna nay rhan kova gar.

3T'mer djivenn yaake har te prindjrenn o Yezous Kristes gar. Te hi čingepen mank t'mende, oun te zilverenna, palle djivenna yaake har i menshe, kay prindjrenn o Yezous Kristes gar.

4Yek t'mendar penella: “Me krau, hoy o Paulo penella.” Oun ko vavar penella: “Me rikrau man ap o Apolleste.” Me penau t'menge: Yaake rakrenn kol menshe, kay prindjrenn o Debles gar.

5Dikenn, koon hi o Apollo, oun koon hom me, o Paulo! O Debleskre boudepangre ham mer oun kram, kay van t'mer patslo. Hakeno mendar kras koy boudi, har o Devel leste das.

6Me hom har i harho, kay vitsras o djob an i phoub. O Apollo hi har yek, kay čoras o pani pre. Oun o Devel moukas o djob bares te vell.

7Kova, kay o djob an i phoub vitsrella, hi gar bareder har kova, kay o pani pre čorella. O Devel hi bareder, kay moukell o djob bares te vell.

8Kova, kay o djob an i phoub vitsrella hi yaake baro har kova, kay pani pre čorella. Oun o Devel dell hakenes, hoy leskri boudi moldo hi.

9Mer ham o Debleskre boudepangre. T'mer han o Debleskri harhetikri phoub. Oun t'mer han har i kheer, hoy o Devel peske krella.

10O Devel his lačes ap mande oun das man i boudi, te boudrap ap ko kheer. Yaake čivom me i telstoune barra. Me krom kova, har i gosevo boudepaskro, koon hayvella khera te krell. Ap kol telstoune barra čivell i vavar boudepaskro vavar koova pre. Hakeno hounte dell garda, hoy yob pre čivella.

11Kek nay čivella i vavar telstouno bar, har ko bar, hoy čiddo hi. Kova hi o Yezous Kristo.

12Hi boudepangre, kay čivenn sonakay, roup, kouč barra, pre. Vavar čivenn kasht, phouss, khass pre.

13Vell ko dives, kay dikenn le, hoy hakeno pre čivas. Ap ko dives vell lauter an i yag. Oun koy yag sikrella, hoy haki boudi moldo hi.

14Te rhačrell kova gar krik, hoy yek pre čivas, lell yob čomone o Deblestar.

15Te rhačrell kova an i yag krik, hoy yob pre čivas, nashrell yob lauter. Yob kokres djal gar nashedo. Yob hi har yek, kay nashell dran i kheer vin, hoy rhačella.

16Djinenn t'mer gar, kay han t'mer o Debleskro kheer, oun kay o Debleskro Dourho an t'mende djivella?

17Koon o Debleskro kheer paash krella, koles phagella o Devel. O Debleskro kheer hi o Debleske. Oun kava kheer han t'mer.

18Ma rhorhenn t'men kokres! Koon patsella, te hi lo gosevo ap kay phoub, kova hounte dikell dren, te molella leskro gosvepen či.

19Kova, hoy pash i menshende gosvepen hi, hi an o Debleskre yaka dinlepen. An o Debleskro lab hi činlo: O Devel taprell kolen an lengro rhorhepen, kay penenn pendar, kay yon gosevo hi.

20Hi ninna činlo: O Devel djinella, hoy an i menshengro dji glan djala, kay lengro gosvepen či molella.

21Doleske hounte sharell pes kek mensho, koon peskro sikepaskro hi. Lauter hi t'maro:

22o Paulo, o Apollo, o Kefas. Oun t'maro hi ninna: kay phoub, o djipen, o merepen, kova, hoy kanna hi, oun kova, hoy vella. Lauter hi t'maro.

23T'mer han o Yezous Kristeskre. O Yezous Kristo hi o Debleskro.

← Chapter 2 Jump to: Chapter 4 →