Ecclesiastes 11

Romani Sinte 2024 (O Debleskro Lab 2024 (Sinte-Manouche))

← Chapter 10 Jump to: Chapter 12 →

1Vitse tiro maro ap o pani; oun tou hatseh les pale pal boud divessa.

2Phage tiro maro an kotya, oun de les efta, orhta menshenge; tou djineh gar, havi bibarht vell pral kay phoub.

3Te hi i volke pherdo pani, palle denn le brishin ap i phoub. Oun te perell i rouk – nay vell ap i čači rig, nay vell ap i servi rig – kote kay lo perella, kote ačell lo čiddo.

4Koon ap o phourdepen garda della, ko čivell kek djob an i phoub, te vell kova baro. Oun koon ap i volke garda della, ko anell gar o baro djob an peskro kheer dren.

5Tou djineh gar havo drom o phourdepen djala, oun har i kokale kerdo venna an i dakro per. Yaake nay djineh tou vitar gar, hoy o Devel halauter krella, oun har yob halauter krella.

6Doleske čip o djob taysarla an i phoub, oun mouk gar tele bis an i rati. Tou djineh gar, hoy bares vella, kava te kova, oder hake douy.

7Shoukar hi menge, te dikas i momeli. Oun mare yakentsa hi mishto, te dikenn le o kham.

8I mensho, te djivell lo boud bersha, mou vell lo barhtelo pral hako bersh, kay djivell lo. Mou bistrell lo gar, te venn kale divessa. Ninna kolla hi boud. Halauter, hoy vella, hi menge khatedo.

9Terno morsh, mouk tiro dji te givell an tire terne bersha! Ab barhtelo yaake rah, har terno hal. Kre, hoy tiro dji touke penella oun tire yakentsa mishto hi; oun biste gar, te vell i dives, kay rakrell o Devel o čačepen vin pral toute oun halauter, hoy kral.

10Dja koleske dran o drom, hoy anell touke rholi oun douka. Ko tsiro, kay hal i čavo oun i terno morsh, hi sik trouyel.

← Chapter 10 Jump to: Chapter 12 →